Markus 5 - Sura Magali Nuntu Ngkatuwu

I Yesu mampakaʼosa radua tau anu napesuaki inosa majaʼa 5:1-20

¹ Ungka lairia towotemo i Yesu pai waʼa anaguru-A, ri sambote nDano Galilea ri tana Gerasa.

² Menaʼu mpinca i Yesu ungka ri duanga, napagomo ntuama sambaʼa anu mesuwu ungka ri kareʼe dayo.

³ Tau setu napesuaki inosa anu majaʼa, siʼa maroo-roomo ri dayo. Bareʼe nakoto ntau mampungu siʼa sako rante narapasi.

⁴ Maria ngkanimo ndarante palenya, paikanya narapasi rante anu ndapunguka, kawadi anu ndasangkalaka pura mabutu. Maʼai kojo karosonya tau setu, bemoreʼe tau anu mangkoto mangkekenika.

⁵ Mawengi pai mareme tetalanya podo wainjoʼu waimaʼi ri dayo pai pongku-pongku ntana, seʼi mekiu-kiu, natima watu nabalo-baloka koronya.

⁶ Pangkitanya i Yesu ntongo lawa-lawapa, moloncomo siʼa napago i Yesu mombukotu manyomba ri suara-A.

⁷ Meboo tau wando setu marimbo oni nganganya natoʼo, “Boo Yesu Ana Ala Anu Makuasa! Ara da nukuja yaku seʼi? Mamposabi i Pue Ala, kuperapi neʼe nujeani yaku!” (

⁸ Mompau ewanceʼe tau setu ri Yesu, maka ndatoʼo i Yesu ri siʼa, “Inosa majaʼa pesuwu ungka ri tau seʼi!”)

⁹ Ndapeoasi i Yesu ri siʼa, “Isema toʼomu?” Mesono tau setu natoʼo, “Toʼoku i ‘Legio’, maka kami sondo mpodago!”

¹⁰ Roo inceʼe, merapi-rapi puru siʼa ri Yesu natoʼo, “Neʼe kojo ndipapalai kami waʼa inosa majaʼa seʼi ungka ri tana seʼi.”

¹¹ Bareʼe lawa ungka njairia reʼe mbawu sadompu bangke ntongo mampepali pangkoninya ri apa buyu.

¹² Merapi waʼa inosa majaʼa setu ri Yesu, natoʼo, “Ndipokaumo kami da mesua ri waʼa mbawu sinjau!”

¹³ Ndaʼioka i Yesu perapinya, mewali mesuwumo waʼa inosa majaʼa setu njoʼu mesua ri waʼa mbawu. Painaka pura-pura mbawu seʼe molonco ri yaa, manawu tudu ri rano, mate malodongi pura-pura. Temponya radua ncowu karianya mbawu setu.

¹⁴ Moloncomo waʼa ntopojaga mbawu, ndeku ri kota pai ri lipu sampotenginya mampobambarika anu mewali setu. Painaka mesuwumo waʼa ntau sondo, da rayanya mangkita anu mewali setu.

¹⁵ Nadadu ntau seʼe i Yesu, pai nakitamo ntau seʼe, tau anu roo napesuaki inosa majaʼa, njau motunda-tunda. Morengkomo pai mayoamo rayanya. Pangkita ntau seʼe anu ewanceʼe, maekamo raya ntau pura-pura.

¹⁶ Waʼa ntau anu mangkita mata katepewalinya kono tau seʼi, pai waʼa mbawu setu, mantuntu ewambeʼi pewalinya seʼe.

¹⁷ Inceʼe painaka merapimo waʼa ntau ri daera setu, da naka malai i Yesu ungka daera setu.

¹⁸ Peʼulaya i Yesu ri duanga, merapimo tau anu roomo napesua inosa majaʼa setu, da naka maya melulu.

¹⁹ Paikanya bareʼe ndawai i Yesu, ndatoʼo, “Pewalilimo, pobambarikamo ri waʼa ngkasangkompomu, nunjaa anu roo ndapowia i mPue ri siko, inceʼe anu meruu ngkadagonya ri siko!”

²⁰ Malai kojo tau setu natepuʼumo mampobambarika ri daera Sampuyu Kota, nunjaa anu roo ndapowia i Yesu ri siʼa. Jingki raya ntau pura-pura madonge.

Ana i Yairu Weʼa anu maisu juba i Yesu 5:21-43

²¹ Mowote muni i Yesu ri sambote ndano. Ntongo ri wingke Sira, ratamo woʼu waʼa ntau sondo madadu Sira.

²² Ratamo tau sambaʼa i Yairu toʼonya. Siʼa sambaʼa tadulako ri Banua mPekakai ri kota setu. Butu nakita i Yesu, metutu siʼa manyomba ri suara-A,

²³ pai merapi puru siʼa natoʼo, “Guru, anaku anu weʼa majuʼa maʼai, kuperapi ane mabuya raya-Mi, da njoʼu ndijama da nakaʼosa pai neʼe mate!”

²⁴ Njoʼumo kojo i Yesu sangkani-ngkani pai i Yairu. Maria kojo tau anu singkandomu malulu Sira, bareʼemo ndaincani bara ungka ri mbeʼi kamaʼinya.

²⁵ Ri oyo ntau sondo setu lau weʼa sambaʼa anu sampuju pai radua ntaʼumo kajuʼanya bareʼe oti-oti daa.

²⁶ Puramo aga-aganya napobalu nabayarika waʼa ntopopakuli. Paikanya bereʼe anu mangkoto mampakaʼosa siʼa pai jateʼaiwaka juʼanya.

²⁷ Mariamo nadonge mbeʼa setu kono i Yesu. Mekariʼoyo siʼa ri oyo ntau sondo mantimosuki i Yesu ungka ri talikua,

²⁸ natoʼo ri rayanya, “Mau podo joe juba-A kuisu, sangaya-ngaya da osa yaku!”

²⁹ Naisu joe juba i Yesu, ri tempo setu seʼe liu oti daanya. Naepe siʼa osamo.

³⁰ Ri tempo setu seʼe ndaepe i Yesu reʼe roso ngkuasa anu mesuwu ungka ri koro-A. Metorobaka Sira ri waʼa ntau sondo, nepa ndapeoasi, “Isema anu maisu juba-Ku?”

³¹ Mompau waʼa anaguru-A natoʼo, “Guru, ndikitamo kasondo ntau anu mombembejujuli seʼi, ndipeoasi woʼu isema anu maisu Komi?”

³² Ndapapowawo i Yesu tau setu pura-pura, mampepali tau anu maisumo Sira.

³³ Kandende-ndendemo weʼa anu roo majama juba i Yesu, maeka kojo rayanya, mombukotu siʼa ri suara i Yesu, pai napangakuka pura-puranya.

³⁴ Nepa ndatoʼo i Yesu ri weʼa setu, “Ana-Ku, ua peaya ndayamu ri Yaku, osamo siko! Pewalilimo ri karodo ndayamu osamo kojo siko!”

³⁵ Ntongo mompaupa i Yesu, jelamo bara tesangkuja tau anu ndapokau ungka ri banua i Yairu, mantoʼoka i Yairu, “Anami anu weʼa setu matemo, neʼemo ndipakasusa woʼu i Guru.”

³⁶ Bareʼe ndalinga i Yesu pompau ntau anu ndapokau setu, ndatoʼoka i Yairu, “Neʼe ipu rayamu, peayamo!”

³⁷ Melinja mpaliu i Yesu, pai bareʼe ndawai mau sambaʼa tau malulu Sira, podo i Peturu, i Yakobu pai kasangkomponya i Yohane, malulu Sira.

³⁸ Karata ntau seʼe ri banua i Yairu, ndakita i Yesu tau kaiyo-iyomo, motumangi maʼase kojo.

³⁹ Mesua i Yesu ndatoʼoka tau seʼe, “Wenu painaka komi maʼase pai motumangi? Ananggodi sinjau bemate; siʼa podo yore!”

⁴⁰ Napogeleka ntau seʼe i Yesu. Ndapokau i Yesu tau setu mesuwu pura-pura. Roo setu ndasale ine pai papa ananggodi setu sangkani pai anaguru-A tatogo mesua ri lincu ngkanjau ananggodi setu.

⁴¹ Ndakekeni i Yesu pale ananggodi setu ndatoʼoka, “Talita kumi!” posokinya, “Beʼa Kutoʼoka siko pembangu!”

⁴² Liu-liu kalumbangu ananggodi setu melinja. (Maka ananggodi setu sampuyu pai radua ntaʼumo tinuwunya.) Pura-pura anu mangkita pewalinya setu maʼai kajingki ndayanya.

⁴³ Ndatoʼoka tau seʼe pura-pura, “Neʼe kojo boi ndipauka tau ntaninya anu mewali seʼi,” roo setu ndatoʼo woʼu, “Ndipakoni ananggodi seʼi.”