Markus 2 - Sura Magali Nuntu Ngkatuwu

I Yesu mampakaʼosa sambaʼa tau pungku 2:1-12

¹ Bara sangkuja ndeme ungka lairia mewalili i Yesu ri Kapenau. Tebambarimo kandate-A ri banua.

² Singkandomumo tau maria mpodago. Gori ngkaria ntau bareʼemo reʼe kasoanya, sako ri wombo banua buke-buke tau. Montepuʼumo Sira mampetumbu Nuntu ungka ri Pue Ala ri tau seʼe.

³ Ntongo mompau Sira, jelamo tau aopo mangkati tau pungku sambaʼa da nakenika i Yesu.

⁴ Paikanya nakeni ngkasondo ntau, bareʼe naleʼo ntau seʼe mosu ri Sira. Mewali natembi ntau seʼe ata ri simpontu kalau i Yesu. Roo setu nauyu ntau seʼe tau pungku setu sangkani pai alinya.

⁵ Pangkita i Yesu kabangke mpeaya ndaya ntau setu, ndatoʼoka tau pungku setu, “Ana-Ku, waʼa ncalaamu bareʼemo ndakitanaka!”

⁶ Bara sangkuja guru agama anu njau motunda iretu montepuʼu mompepeoasi ri rayanya,

⁷ “Makoje kojo tau setu mompau ewanceʼe! Siʼa mampetikodi i Pue Ala. Isema anu mangkoto bareʼe da mangkitanaka salaa, ane banya i Pue Ala ngkalio-A?”

⁸ Ri tempo setu seʼe ndaincani i Yesu nawa-nawa ntau seʼe. Pai ndapantoʼo, “Makuja komi mompepeoasi ri rayami ewancetu?

⁹ Mbeʼi anu maruu ngkasarunya: mangantoʼo, ‘Salaamu bareʼemo ndakitanaka bara mangantoʼo’, ‘Pembangumo, pasaʼa alimu pai pelinjamo’!

¹⁰ Paikanya seʼi-seʼi da kutujuka komi kamonconya ri wawo lino seʼi i Ana Manusia makuasa bareʼe mangkitanaka salaa.” Nepa ndatoʼo i Yesu ri tau pungku setu,

¹¹ “Pembangumo, pasaʼa alimu, pai pewalilimo!”

¹² Meoko tau pungku setu, pai liu natima alinya, nepa mesuwu nalulu mata ntau seʼe pura-pura. Jingki raya waʼa ntau setu, naunde i Pue Ala. Natoʼo, “Bepareʼe pangkitata anu ewanceʼi!”

I Yesu mampeboo i Lewi 2:13-17

¹³ Mewalili muni i Yesu ri wiwi nDano Galilea. Sondo tau anu madadu Sira, ndapaguru tau seʼe.

¹⁴ Sindara mpelinja i Yesu iretu, ndakita sambaʼa toponduru asele toʼonya i Lewi ana i Alipiu, motunda-tunda ri kantoro ntoponduru asele. Ndatoʼo i Yesu ri siʼa, “Lulumo yaku!” Meoko i Lewi nalulumo i Yesu.

¹⁵ Ntongo mpangkoni i Yesu ri banua i Lewi, jelamo toponduru asele maria pai waʼa ntau anu napobanciika ntau sondo, mangkoni sangkani-ngkani pai i Yesu pai waʼa anaguru-A. Maka maria ri oyo ntau seʼe malulu i Yesu.

¹⁶ Reʼe bara tesangkuja guru agama ungka ri to Parisi mangkita pangkoni i Yesu sangkani-ngkani pai waʼa nto ponduru asele pai waʼa ntau anu ndatoʼo majaʼa setu. Mewali napeoasi ntau seʼe ri waʼa anaguru-A, natoʼo, “Ara wenu gurumi mangkoni sangkani-ngkani pai waʼa ntoponduru asele, pai waʼa ntau majaʼa setu?”

¹⁷ Ndadonge i Yesu pompeoasi ntau seʼe, pai ndapasono, “Tau anu madonde bareʼe da mampepali sando, podo tau anu majuʼa. Kamaʼi-Ku banya da mampeboo tau anu maepe koronya madagomo paikanya tau anu ndatoʼo bareʼe madago.”

Kono popuasa 2:18-22

¹⁸ Ri anu santempo anaguru i Yohane Topopariu pai waʼa nto Parisi ntongo mopuasa. Reʼe tau jela mampeoasi ri Yesu, “Ara wenu anaguru i Yohane Topopariu pai waʼa anaguru nto Parisi mopuasa, paikanya anaguru-Mi bareʼe?”

¹⁹ Mesono i Yesu, “Ri posusa mpopawawa, ara bareʼe da ndapakoni waʼa linggona? Ane sangkani-ngkanipa pai tau seʼe tumpu ngkoro tuama, sangaya-ngaya da mangkoni.

²⁰ Paikanya reʼe temponya ane tumpu ngkoro tuama bemo lau ri oyo ntau seʼe. Ri tempo setu bareʼe da mangkoni tau seʼe.

²¹ Bereʼe tau anu da mantamba baju anu marumo pai ayapa dawoʼu. Maka ayapa mpontamba setu da marangani kabangke ngkasianya.

²² Ewanceʼe seʼe bereʼe tau anu mangantawa anggoro dawoʼu ri watutu pela anu matuʼa. Maka anggoro dawoʼu setu da mampapebote watutu setu. Kapusa-pusanya radua-duanya tetaji. Anggoro dawoʼu sangaya-ngaya da ndatawa ri watutu anu dawoʼu woʼu!”

Pompeoasi kono eo Umapo 2:23-28

²³ Ri anu sandeme kono ri eo Umapo i Yesu pai waʼa anaguru-A moliu ri tongo bonde gandu, napurusi waʼa anaguru-A wua gandu.

²⁴ Natoʼo nto Parisi ri Yesu, “Ara wenu anaguru-Mi maewa songka agamata, mampowia anu kapali ri eo Umapo?”

^25-26 Mesono i Yesu ndatoʼo, “Bara bareʼepa ndibasa tuntuka anu napowia i Daudi, ri tempo katadu mpanyomba bangke i Abiata. Ri tempo i Daudi pai yununya da yoga, maka natambo mpangkoni. Mesua siʼa ri Banua i mPue, pai mangkoni roti anu roomo ndapanyombaka ri Pue Ala. Pai roti setu natilaka woʼu waʼa yununya. Kamonconya malulu agamata, podo waʼa ntadu mpanyomba anu maya mangkoni roti setu.”

²⁷ Ndatoʼo woʼu i Yesu, “Eo Umapo ndapareʼe gala ntolino; banya tolino ndapareʼe gala eo Umapo.

²⁸ Mewali, i Ana Manusia makuasa pai mangkuasani eo Umapo.”