Markus 15 - Sura Magali Nuntu Ngkatuwu

I Yesu ri suara i mPilatu 15:1-5

¹ Mowuro-wuro mpodago, nadadusi Majalisi Agama tesua waʼa tadulako ntadu mpanyomba, waʼa topombawanaka nto Yahudi pai waʼa guru agama mogombo ncoroba. Napungu ntau seʼe i Yesu nepa nakeni Sira nawaika i Pilatu.

² Meoasi i Pilatu ri Yesu natoʼo, “Bara monco kojo siko. Mokole nto Yahudi?” Mesono i Yesu ndatoʼo, “Ewancetumo pantoʼomu!”

³ Maria pau waʼa ntadulako ntadumpanyomba anu mantuluri Sira.

⁴ Meoasi woʼu i Pilatu ri Sira natoʼo, “Wenu painaka bareʼe nupokono masono? Peole ewambeʼi kasondonya pau ntau seʼe anu mantuluri siko!”

⁵ Paikanya i Yesu bareʼe mo liu-liu mesono, painaka jingki raya i mPilatu.

I Yesu ndabotusi da ndapepate 15:6-15

⁶ Sangkani-sangkani posusa Pasa, biasanya i Pilatu da malapa sambaʼa tau anu ndatarunggu malulu perapi ntau sondo.

⁷ Ri raya ntarunggu, ri oyo waʼa ntopeewa anu mepepate sindara ngkaguaga, reʼe tau sambaʼa toʼonya i Baraba.

⁸ Mompasambaka tau sondo mamperapi ri Pilatu da naka ndalapaka tau seʼe sambaʼa tau anu ndatarunggu ewa anu ndapobiasa.

⁹ Meoasi i Pilatu ri tau seʼe, “Bara ndipokono da kulapaka komi Mokole nto Yahudi setu galami?”

¹⁰ Maka naincani i mPilatu ewambeʼi kasina ndaya waʼa ntadulako ntadu mpanyomba ri Yesu, painaka napepombaika ntau seʼe Sira ri siʼa.

¹¹ Paikanya waʼa ntadulako ntadu mpanyomba mampasuaka pau waʼa ntau sondo da naka naperapi ntau seʼe ri Pilatu i Baraba da nalapaka tau seʼe.

¹² Mompau woʼu i Pilatu ri tau sondo natoʼo, “Ane ewanceʼe da kukuja tau anu nditoʼo mokole nto Yahudi seʼi?”

¹³ Meboo-boomo tau seʼe natoʼo, “Paku ri kaju ndapanggo siʼa!”

¹⁴ Meoasi i Pilatu natoʼo, “Paikanya nunjaa jaʼa-Nya?” Jamaʼaimo karimbo mpeboo-boo ntau seʼe mantoʼo, “Paku ri kaju ndapanggo siʼa!”

¹⁵ Ua daraya i mPilatu mampakawongko raya ntau sondo, nalapakamo tau seʼe i Baraba. Nepa napokau tau mantabasi i Yesu, roo setu napepombaikamo i Yesu da ndapampaku ri kaju ndapanggo.

I Yesu ndapasinggiri 15:16-20

¹⁶ Nakenimo waʼa ncurodado i Yesu ri kareʼe mpobotusi anu ri banua i mpetoro nepa napeboo mompasambaka waʼa ncurodado.

¹⁷ I Yesu napaporengkoka juba makodara, nepa naena ntau seʼe makota ungka ri raʼa anu marui, napaposongkoka Sira.

¹⁸ Roo setu nepa metabe tau seʼe natoʼo, “Tabe mokole nto Yahudi!”

¹⁹ Natima ntau seʼe toko nabobakika woʼo i Yesu, natupesi lio-A nepa mombukotu manyomba ri suara-A.

²⁰ Ri karoʼonya mampolegaka i Yesu, nayali ntau seʼe juba makodara setu nepa napatakaka muni rengko-A ngkalio-A. Roo setu nakeni mpesuwu ntau seʼe Sira da ndapaku ri kaju ndapanggo.

I Yesu ndapaku ri kaju ndapanggo 15:21-32

²¹ Ri yae njaya nariso ntau seʼe tau sambaʼa mampasaʼa kaju ndapanggo i Yesu. Tau setu nepa mewalili ungka ri lipu da mesua ri kota. (Toʼonya i Simo – to Kirene – papa i Alesande pai i Rupu.)

²² Ndakenimo i Yesu ri buyu sambaʼa toʼonya, “Gologota”, posokinya “Kareʼe nTakumboʼo”.

²³ Njairia Sira ndapapainuka anggoro anu ndagaloka mire, paikanya bareʼe ndapokono i Yesu mainu anggoro setu.

²⁴ Roo setu napaku ntau seʼe ri kaju ndapanggo Sira, napotila ntau seʼe rengko-A da nakanoto tila sambaʼa-sambaʼa tau ndatendeka dadu.

²⁵ Pampaku ri kaju ndapanggo i Yesu setu mewali ri tinti sasio mowuro.

²⁶ Ri tondo powoʼo-A ndaʼuki pau mpetuluri anu mantoʼo, “Mokole nto Yahudi!”

²⁷ Reʼe woʼu radua to pojampa anu ndapaku ri kaju ndapanggo sangkani-ngkani pai i Yesu sambaʼa ri tondo mokana sambaʼa ri tondo mokaii-A. [

²⁸ Pewalinya ewanceʼe kobanganimo anu natoʼo Ncura Magali, “Siʼa da ndapasiwiamo pai tau majaʼa.”]

²⁹ Waʼa ntau anu moliu njairia montala-ntalambibi seʼi mantusaki i Yesu, natoʼo ntau seʼe, “Sikomo anu da magero Banua i mPue pai da nuwali wangu muni ri raya anu tatogo ndeme?

³⁰ Koisa penaʼu ungka ri kaju ndapanggo setu pai lapasakamo koro-Mu!”

³¹ Ewanceʼe seʼe pompasinggiri waʼa ntadulako ntadu mpanyomba pai waʼa guru agama. Napombepau-pauka ntau seʼe natoʼo, “Tau ntaninya nasorepaka, paikanya koro-Nya ngkalio-Nya bareʼe nakoto mancorepaka!

³² Ane siʼa mokole nto Isaraeli, Mokole Tadungkadago napenaʼumo ungka ri kaju ndapanggo setu da kapangkita pai da kapaaya siʼa!” Waʼa ntau anu ndapaku ri kaju ndapanggo sangkani-ngkani pai Sira seʼe woʼu jajinya mampasinggiri i Yesu.

Kapate i Yesu 15:33-41

³³ Ri kasawi-sawi eo, mawengimo sambawo ntana, tatogo jaa kasaenya.

³⁴ Ri tinti tatogo lauka eo, meboo i Yesu marimbo oni nganga-A ndatoʼo, “Eloi, Eloi, Lama Sabatani?” anu posokinya “Pue Ala-Ku, Pue Ala-Ku makuja ndipalaika Yaku?”

³⁵ Bara tesangkuja tau anu njau njairia madonge peboo-A setu natoʼo, “Pedongeka, i Elia napeboo!”

³⁶ Sambaʼa ri oyo ntau seʼe molonco mantima yuro ri watu naome ri anggoro, mapodi. Nepa nabasula ri wuntu ngkaju sampole pai natora napapaisuka wiwi Yesu, natoʼo, “Popea, taole-oleka bara maʼi kojo i Elia mantaunaka siʼa ungka ri kaju ndapanggo setu.”

³⁷ Meboo i Yesu marimbo oninganga-A, puramo inosa-A.

³⁸ Ayapa anu ndadindi ri raya Banua i mPue masia ungka ri wawonya tudu-tudu ri joenya.

³⁹ Tadulako ncurodado anu mekakore mosu ri puʼu ngkaju ndapanggo, mangkita ewambeʼi kapura inosa i Yesu, natoʼo, “Lawi monco kojo tau seʼi Ana mPue Ala!”

⁴⁰ Njau woʼu bara tesangkuja weʼa anu mampepeoleka pura-pura setu, metada-tada lawa, mangkita pura-pura anu mewali setu. Njau i Salome, i Maria Madalena, pai i Maria ine i Yakobu anu mangura pai i Yose.

⁴¹ Tau seʼemo waʼa mbeʼa anu malulu i Yesu pai anu mamporiokoi Sira sindara ri Galilea. Pai maria woʼu waʼa mbeʼa ntaninya anu malulu i Yesu jela ri Yerusale.

Pangadayo i Yesu 15:42-47

^42-43 Ngkinowiamo sindara ngkarata i Yusu to Arimatea. Siʼa sambaʼa anggota Majalisi Agama anu ndatubunaka. Siʼa woʼu sambaʼa tau anu mampopea da pontepuʼu i mPue Ala momparenta ewa sambaʼa Mokole. Eo setu eo pompatoka inceʼemo eo kabareʼepanya eo Umapo. Inceʼe painaka bareʼe maekanya njoʼu siʼa ri Pilatu, mamperapi watangkoro i Yesu.

⁴⁴ Jingki raya i mPilatu madonge kapatemo i Yesu. Napeboo waʼa ncurodado napeoasi bara masaemo kapate i Yesu.

⁴⁵ Butu nadonge pompetumbu ntadulako ncurodado setu, naʼiokamo i mPilatu perapi i Yusu da mantima watangkoro i Yesu.

⁴⁶ Naolimo i Yusu, ayapa lena anu maʼalusu. Roo setu njoʼumo siʼa mantudumaka watangkoro i Yesu ungka ri kaju ndapanggo, nepa nasompunika ayapa anu naoli setu. Timamamo pura-pura nepa nadika watangkoro i Yesu ri raya dayo. Dayo setu inceʼemo kumapa anu ndapaʼati. Roo setu naduli ntau seʼe watu bangke ndadampoka wobo dayo setu.

⁴⁷ Sindara setu njau i Maria Madalena pai i Maria ine i Yose mampepeole ri mbeʼi padika i Yesu.