Epesus 6 - Sura Magali Nuntu Ngkatuwu

Ana pai ine papanya 6:1-4

¹ Ee waʼa ana! Tandanya tau anu meaya ri Kerisitu, komi da metubunaka ri tau tuʼami, inceʼe anu sintinaja da ndiwianaka.

² “Tubunaka inemu pai papamu” inceʼemo songka anu kaʼisa ungka ri Pue Ala pai pojanji,

³ ewaseʼi, “Da naka dago ngkatuwumi pai marate inosami ri lino seʼi”.

⁴ Ee waʼa ngkasangkompo anu mewali papa! Neʼe ndipowia anu da mampakalose raya waʼa anami. Moruana da ndiponinika tau seʼe mepoʼinaya ri songka i mPue.

Anamayunu pai puenya 6:5-9

⁵ Ee waʼa ngkasangkompo anu mewali anamayunu! Da ndipedongeka songka mpuemi anu ri lino seʼi. Pura-pura da ndiwianaka ri petubunaka pai ri eka ndaya, ndiponggaleka ri kamonco-monconya, pura-puranya setu ndipowia ewa tila i ngKerisitu ngkalio-A.

⁶ Neʼe ndipowia anu madago podo ri sindara naara-ara mpuemi, podo da napaunde ntolino komi. Paikanya powiami setu da mampatongawa kakominya anamayunu i ngKerisitu, anu mepoʼinaya ri pepokono i mPue Ala ri kaliogu ndayami.

⁷ Potetalami ewa anamayunu setu da ndiwianaka ri kawongko ndayami pai da ndiepe ewa ndipowiaka i Pue, banya ndipowiaka tolino.

⁸ Neʼe ndikalingani, sambaʼa-sambaʼa tau, madago anamayunu bara anu banya anamayunu pura-pura da mantarima ungka ri Pue sili mpowianya anu madago.

⁹ Pai komi waʼa ngkabosenya anu mampotumpu anamayunu! Komi woʼu da ewanceʼe powiami ri waʼa anamayunumi. Neʼe ndisongka anamayunumi ri peekasi. Neʼe ndikalingani kakominya sangkani-ngkani pai waʼa anamayunumi mampotumpu pue anu sambaʼa-mbaʼa inceʼemo i Pue anu ri suruga. Sira bareʼe mampilisi taʼa ntau.

Tikali parewa mpoʼiwali ungka ri Pue Ala 6:10-20

¹⁰ Kapusanya da kutoʼoka komi, mbolimo komi da maroso ua roso anu nditarima ungka kuasa i mPue, maka komi sambaʼa-mbaʼa pai Sira.

¹¹ Ndipakemo ri kagana-gananya parewa mpoʼiwali anu ndawaika komi i mPue Ala da naka ndikoto mekakore maewa waʼa mpekelo i majaʼa anu maria ngaya akalanya.

¹² Maka anu tapoʼiwalika banya podo tolino, paikanya kita mampoʼiwalika waʼa nceta anu mangkuasai tempo anu majaʼa seʼi. Kita maewa waʼa roso inosa i majaʼa anu ri raoa.

¹³ Inceʼe puʼunya seʼi-seʼi ndipatoka ri kasangka-sangkanya pura-pura parewa ungka ri Pue Ala, da naka ndikoto maewa iwali ri eo anu majaʼa. Pai komi da toa mekakore rantani rata ri kapusanya, komi tongawa ntongo makalikija.

¹⁴ Komi da tikali mpaliu. Ndiposoʼo ntongomo katodo ri Pue Ala, pai kayoa ndaya da ndipobaju rante.

¹⁵ Pai ndipotalupamo kabuya ndaya mampobambarika Nuntu ngKatuwu anu mangkeni kalindo ndaya.

¹⁶ Sandeme-sandeme ndipokantamo peaya ndaya; ua peaya ndayami setu da ndikoto mampikasi pura-pura apu mata mpana ungka ri majaʼa.

¹⁷ Katesorepakami da mewali songko waja pai Nuntu i mPue Ala da mewali penai ungka ri Inosa mPue Ala.

¹⁸ Pura-pura setu da ndiwianaka, sangkani-ngkani pai pekakai merapi pompelae ungka ri Pue Ala. Neʼe ndiowe-owe mekakai malulu pombawanaka Inosa mPue Ala. Komi da mainga-inga mpaliu neʼe boi panangi. Neʼe ndiowe-owe mampekakaika pura-pura tau i mPue Ala.

¹⁹ Ndipekakaika woʼu yaku da naka ndawai i mPue Ala loʼe ndaya ri yaku ri sindara pompauku da mampasowa waʼa mpau anu monco. Pai da naka koje ndayaku mampetumbu rahasia Nuntu ngKatuwu setu.

²⁰ Ua Nuntu ngKatuwu setu painaka yaku mewali sambaʼa pomokau, pai wawaseʼi yaku ri raya ntarunggu. Ndipekakaikamo da naka makoje mpaliu yaku mompau kono Nuntu ngKatuwu setu da kupasowa ri gori ngkamonconya.

Petabea anu kapusanya 6:21-24

²¹ I Tikiku, siʼa sambaʼa kasangkompota anu madoyo ri raya ntetala i mPue, siʼamo anu da mampauka komi ewambeʼi katedikanakaku ireʼi, da naka ndiincani katedikanakaku pai tetalaku.

²² Inceʼe puʼunya painaka kupokau siʼa njoʼu ri komi da naka napauka komi ewambeʼi katedikanaka mami, ri komi pura-pura boi masusa rayami.

²³ Mbolimo i Pue Ala Papa, pai i Yesu Kerisitu da mawai jaya ri pura-pura anggota dompu kasambaʼa-mbaʼa pai pombepotowe pai todo ri peaya ri Kerisitu.

²⁴ Mbolimo i Pue Ala da madonco komi pura-pura anu mampotowe Pueta i Yesu Kerisitu pai towe ndaya anu bareʼe da reʼe kabalinya. Petubunaka ungka ri kami, Paulu