Epesus 5 - Sura Magali Nuntu Ngkatuwu

Katuwu ntau i mPue 5:1-20

¹ Komi inceʼemo waʼa ana mPue Ala anu ndapotowe, inceʼe painaka da ndipari-pari malulu pandiri i mPue Ala.

² Katuwumi da nakuasai ntowe ewa i Kerisitu mampotowe kita. Sira mampepombaika koro-A tila ngkatesorepakata, mewali sambaʼa panyomba anu mawongi anu mampakawongko raya mPue Ala.

³ Komi inceʼemo dompu i mPue Ala. Inceʼe painaka posalara pai waʼa mpowia anu bareʼe sintinaja bara kabagagu da neʼe reʼe ri oyomi. Da naka neʼe napoyondo ntau ntaninya da mantoʼo komi mampowia waʼa anu ewancetu.

⁴ Bareʼe sintinaja komi da mampasimbaju waʼa mpowia mposalara bara mantoʼo-ntoʼo waʼa mpau anu kagota-gota bara powuti-wuti anu bareʼe madago. Moruana ndipasowaka waʼa mpau mpeunde ri Pue Ala.

⁵ Da ndipaincani kojo, tau anu toposalara bara anu bareʼe madago poʼengkonya, tau bagagu (waʼa poʼengko anu ewanceʼe, siwiamo pai manyomba ri lamoa), tau anu ewanceʼe bareʼe nakoto da mewali tau i ngKerisitu pai i Pue Ala.

⁶ Neʼe boi malipo rayami mampedongeka waʼa mpasimbaju anu bereʼe yowenya. Maka pura-puranya setu podo mampapebete karau ndaya mPue Ala ri waʼa ntau anu bareʼe mepoʼinaya ri Sira.

⁷ Mewali neʼe kojo boi ndiposintuwuka waʼa ntau anu ewa ncetu.

⁸ Komi seʼe i owi maroo-roo ri raya mbani. Seʼi-seʼi komi mewalimo tau i mPue, posokinya komi maroo-roomo ri karemenya. Inceʼe painaka komi sangaya-ngaya da tuwu ri rara ndeme.

⁹ Maka ungka ri rememo setu da mebete waʼa mpowia anu madago pai monco ri pangkita mPue Ala.

¹⁰ Ndipompari-mparimo da ndipaincani nunjaa pepokono ndaya i mPue Ala.

¹¹ Neʼe ndiposintuwuka waʼa ntau anu poʼengkonya nakuasai mbani, da nditilawangi pura-puranya setu. (

¹² Maka waʼa mpowia ntau seʼe anu nasambunika setu, kamonconya kojo sako da ndapasimbaju ndapomaea mata.)

¹³ Pura-pura anu ndapowia ri karemenya inceʼe da yosa pangangkita.

¹⁴ Podo waʼa mpowia anu ri karemenya inceʼe tongawa; inceʼe pai ndapantoʼo, “Pembangumo ee siko anu yore, pai pembangumo ungka ri kapate! Maka i Kerisitu da merara ri wawomu.”

¹⁵ Inceʼe painaka da ndipakadago kojo pelinja ngkatuwumi. Neʼe ewa katuwu ntau tengo; ndipoʼengkomo ewa katuwu ntau loʼe.

¹⁶ Da loʼe-loʼe komi mampake tempo anu reʼe, maka tempo wawaseʼi majaʼa.

¹⁷ Neʼe tengo, paikanya da ndinawa-nawa kojo nunjaa anu silulu pai pepokono i mPue Ala.

¹⁸ Neʼe manginu anggoro rantani mayangu maka inceʼe podo da mampapeumba nawa-nawa majaʼa, paikanya komi da buke pai Inosa mPue Ala.

¹⁹ Ri pompasimbajumi ndipakemo waʼa basa peunde, pai pongayu anu maunde-unde Pue. Mbolimo ri kawongko-wongko ndayami komi da mongayu maunde-unde i Pue.

²⁰ Mau ewambeʼi ntano katedikanakami neʼe marapa peundemi, montarima kase ri Pue Ala Papa ri raya ntoʼo mPueta i Yesu Kerisitu.

Kono katuwu ntau samboko 5:21-33

²¹ Ewa tanda pabangkei i Kerisitu mbolimo komi da mombepedongeka sambaʼa pai sambaʼa.

²² Rongo da medonge ri langkaimu ewa pedongemu ri Pue.

²³ Maka i langkai mewali tadulako ri rongonya ewa i Kerisitu mewali tadulako ri dompu pai Sira ngkalio-A woʼu Mokole Tadungkadago ri dompu anu mewali pepatongawa ngkoro-A.

²⁴ Ewambeʼi pepoʼinaya dompu ri Kerisitu, da ewanceʼe woʼu rongo da mepoʼinaya ri langkainya ri mpengaya-ngaya.

²⁵ Langkai, potowemo rongomu da ewa i Kerisitu mampotowe dompu pai mampepombaika koro-A tila dompu setu.

²⁶ Powia i ngKerisitu ewanceʼe, da ndapangkoto mampakagali dompu ri pompaguru pai mampoliu ue mpopariu, da naka ripurinya singkana ndapepombaika ri Pue Ala.

²⁷ Ewanceʼe da pewalinya nepa da nakoto dompu toa mekakore pai magali ri suara-A ri kabareʼenya reʼe posarinya mau sakodi.

²⁸ Ewanceʼemo woʼu i langkai sangaya-ngaya da mampotowe rongonya ewa koronya ngkalionya. Tau anu mampotowe rongonya posokinya siʼa mampotowe koronya ngkalionya. (

²⁹ Bereʼe tau anu mampobanciika koronya ngkalionya. Paikanya da naporewu pai da najagai mpodago ewa i Kerisitu woʼu mamporewu dompu-A.

³⁰ Maka kita inceʼemo parewa ngkoro i ngKerisitu.)

³¹ Lau ndaʼuki ri Sura Magali, “Inceʼe puʼunya painaka tuama da mampalaika ine pai papanya da maroo-roo sangkani-ngkani pai rongonya maka tau seʼe mewali sambaʼa-mbaʼamo.”

³² Nuntu setu mayombu posokinya. Inceʼe kupasintolio ewa pokenta i ngKerisitu pai dompu.

³³ Paikanya nuntu setu lawi reʼe pokentanya pai komi woʼu. Mbolimo langkai da mampotowe rongonya pai da naepe rongonya setu ewa koronya ngkalionya pai rongo da mompari-mpari mantubunaka langkainya.