Epesus 4 - Sura Magali Nuntu Ngkatuwu

Kasambaʼa-mbaʼa ngkoro 4:1-16

¹ Inceʼe puʼunya painaka yaku – sambaʼa tau ndatarunggu, anu ndatarunggu ua mamporiokoi i Pue – kumerapi kojo ri komi da naka komi tuwu ri poʼengko anu madago ewa tau anu roomo ndapeboo i mPue Ala.

² Komi da tuwu ri kalauka ndaya, ri kalulu ndaya, pai ri kayombu mponawa-nawa. Ndituju towe ndayami ri pombetulungimi sambaʼa pai sambaʼa.

³ Komi da mompari-mpari da naka kasambaʼa-mbaʼa anu ndawai i mPue Ala bareʼe da majaʼa ua komi tuwu ri pombepotowe.

⁴ Maka podo sambaʼa-mbaʼa koro pai sambaʼa-mbaʼa Inosa. Ewanceʼe seʼe komi ndapeboo ri pampomata-mata anu siwia-wia.

⁵ Maka podo sambaʼa-mbaʼa Pue, sambaʼa-mbaʼa peaya, sambaʼa popariu,

⁶ pai sambaʼa-mbaʼa Pue Ala anu mewali Papa ntau pura-pura. Siramo Pue yangi pai lino, anu mampapewali pura-puranya pai makuasa ri pura-puranya.

⁷ Paikanya kita sambaʼa pai sambaʼa ndawaika popadonco malulu anu ndapakanoto i ngKerisitu.

⁸ Lau ndaʼuki ri Sura Magali, “Ri tempo mpepone-A ri kareʼe anu ri wawo ngkandatekanya, maria tawani anu Ndakeni; pai maria popadonco-A Ndawaika to lino.”

⁹ Mewali, ane ndatoʼo “Sira mepone”, posokinya Sira roomo menaʼu tudu-tudu ri kareʼe anu maʼai ngkalaukanya ri lino seʼi.

¹⁰ Pai Sira anu roomo menaʼu setu, Sira seʼe woʼu anu mepone rata-rata ri ungka ngkandatekanya ndaliunaka pura-pura yangi painaka yangi pai lino jukumo ndasualeki.

¹¹ Siramo anu mantila waʼa mpombai ri tolino; ri anu santila marata pombai mewali suro, anu ntaninya mewali nabi; ri anu santila woʼu marata pombai da mampetumbu Nuntu ngKatuwu, pai anu santila woʼu pombai da mamporewu dompu pai waʼa guru agama.

¹² Inceʼe Ndawai tila da mampatimamasi katuwu dompu i mPue Ala ri pamporiokoi i Pue pai mawangunaka koro i ngKerisitu.

¹³ Ane ewanceʼe kita pura-pura mewali sambaʼa-mbaʼa ri peaya anu siwia, pangarata ndaya anu siwia kono Ana i mPue Ala. Pai kita mewali tau anu matinuwumo, pai kakoteranga-rangani katimamanya ewa i Kerisitu.

¹⁴ Kita bareʼemo mompeananggodi ewa tau anu bareʼe todo ponawa-nawa, anu napolegaka mpompaguru mpengaya-ngaya ungka ri waʼa ntau anu kalopu-lopu. Pombamba ntau seʼe mampakalingu raya ntau.

¹⁵ Bareʼe, manoto bareʼe kojo! Paikanya kita da mantuju ewambeʼi anu kamonconya ri raya ngkatowe ndaya, painaka da tongawa ri mpengaya-ngaya kita da timama ewa i Kerisitu anu mewali tadulakota.

¹⁶ Ua popanini-A pura-pura parewa ngkoro mosuncu mpodago, mokenta pura-pura parewa ngkoro setu. Pai ane sangaya-ngaya parewa ngkoro setu molengko ewa katedikanakanya, sangaya-ngaya juku-juku suma ngkoro da tuwu maroso ri towe ndaya.

Katuwu dawoʼu ri raya i ngKerisitu 4:17-32

¹⁷ Inceʼe painaka ri raya ntoʼo i mPue, da kutoʼoka komi ri kayonto-yontonya, katuwumi neʼe ewa katuwu ntau anu bareʼe maincani i Pue Ala, anu podo manawa-nawa anu bereʼe yowenya.

¹⁸ Bareʼe mayoa ponawa-nawanya, bareʼe naincani ntau seʼe katuwu anu ndawai i mPue Ala, maka bareʼe liu-liu naincani ntau seʼe kono i Pue Ala. Tau seʼe mewali ewanceʼe ua kapeni mboʼonya.

¹⁹ Tau seʼe bareʼemo reʼe kaea matanya moʼengko pai mowia malulu sawoyo ndayanya.

²⁰ Paikanya i Kerisitu anu ndiincanimo banya ewanceʼe!

²¹ Ndidongemo kakononya Sira! Pai komi waʼa anaguru-A roomo woʼu ndapaguruka kono kamonco anu tongawa ri Sira!

²² Inceʼe puʼunya painaka nditajimo katolinomi anu masae pai engko ngkatuwu anu masae anu nakuasai waʼa ncawoyo ndaya anu podo mampaka tetaji.

²³ Mbolimo rayami pai nawa-nawami ndadawoʼuni pura-puranya.

²⁴ Mbolimo komi da tuwu ewa tolino anu dawoʼu anu ndapapewali malulu pepokono mPue Ala, inceʼe poʼengko anu monco, mayoa pai magali.

²⁵ Inceʼe painaka komi pura-pura, sambaʼa pai sambaʼa neʼe mombembambasi. Bareʼe maya mombamba-mbamba, maka kita pura-pura mewalimo parewa ngkoro i ngKerisitu.

²⁶ Ane majaʼa rayami, neʼe ndipapaliuka kasengke ndayami setu da mampapopuʼu komi manawu ri salaa. Kasengke ndayami seʼe neʼe nakasoyoka ndeme.

²⁷ Neʼe ndipasoaka tempo tila i majaʼa.

²⁸ Tau anu biasa melima da naowemo melima. Moruana napakadoyo motetala da naka reʼe anu da nakatuwuka narata ungka ri jaya anu monco pai da nakoto mantulungi tau anu mapari katuwunya.

²⁹ Ane mompau komi neʼe ndipake waʼa mpau anu kagota-gota. Ndipobasaka waʼa mpau anu mamponinika pai mantulungi tau ntaninya. Waʼa mpau anu madago pai maʼalusu inceʼe mampareʼe wongko ndaya ri tau anu mampedongeka.

³⁰ Neʼe ndipaka pari raya Inosa mPue Ala, komi roomo ndapakanoto nu Inosa mewali tau i mPue Ala. Inosa setumo anu mawai kanoto Eo ngKatesorepakami sangaya-ngaya da rata.

³¹ Nditajika jaʼa ndaya, sina ndaya pai kapasengke. Neʼe mongari-ngari pai mepara-para. Neʼe madika-dika kodi ndaya ri yunumi bara poʼengko anu siwia pai nceʼe.

³² Paikanya, tuarapa komi da pande mporaya pai maʼalusu sambaʼa pai sambaʼa, bareʼe mombekitanaka sala ewa i Pue Ala bareʼemo mangkitanaka salaami mampoliu i Kerisitu.