Epesus 3 - Sura Magali Nuntu Ngkatuwu

Tetala i mPaulu tila ntau anu banya to Yahudi 3:1-13

¹ Inceʼe puʼunya painaka yaku, i Paulu, tau anu ndatarunggu ua mamponcuruka i Kerisitu Yesu, tilami komi anu banya to Yahudi.

² Sangaya-ngaya ndidongemo ewambeʼi kapande ndaya mPue Ala anu mampesaraʼuka ri yaku tetala seʼi ua da naka madago komi.

³ I Pue Ala mampatongawa ri yaku ewambeʼi rahasia mpepokono-A. (Kono kaʼinceʼenya reʼemo kuʼuki ri kaʼedenya ri sura seʼi,

⁴ ane roomo ndibasa da ndiincanimo rahasia i ngKerisitu anu kuincanimo yaku.)

⁵ I owi rahasia setu bareʼepa reʼe ndapantoʼoka tolino, pai wawaseʼi Inosa mPue Ala mampatongawamo ri waʼa ncuro pai waʼa nabi.

⁶ Ewanceʼi rahasia setu, ua Nuntu ngKatuwu setu painaka tau anu banya to Yahudi maratamo tila sangkani-ngkani pai to Yahudi ri waʼa mpopadonco anu sambaʼa-mbaʼa pai tesuamo da mantarima nunjaa anu ndajanji i mPue Ala ri Kerisitu Yesu.

⁷ I Pue Ala mawai ri yaku popadonco inceʼemo tetala da mampobambarika Nuntu ngKatuwu. Yaku mancabe popadonco setu mampoliu kuasa mPue Ala anu motetala ri rayaku.

⁸ Ri pura-pura tau i mPue Ala, yakumo anu maʼai ngkakodinya. Mau ewanceʼe ndawai i mPue Ala ri yaku tetala seʼi, tetala mampobambarika Nuntu ngKatuwu ri waʼa ntau anu banya to Yahudi, anu banganinya inceʼemo kakoreʼe i ngKerisitu anu bareʼe da reʼe kapusanya;

⁹ ewanceʼe woʼu da naka mampoliu yaku, pura-pura tau da mangaincani Pue Ala, anu mampapewali yangi pai lino, mawianaka pepokono-A anu reʼemo ungka i piamo tesambunika ri lino seʼi.

¹⁰ Pampokono mPue Ala, da naka wawaseʼi ndapobambarika mampoliu dompu, pura-pura anu mangkekeni kuasa ri raoa da mangaincani kayombu pai kaloʼe mPue Ala ri mpengaya-ngaya katedikanakanya.

¹¹ I Pue Ala mawianaka silulu pai pepokono-A anu bareʼe da reʼe kapusanya anu ndawianaka mampoliu i Kerisitu Yesu Pueta.

¹² Ri peaya ndaya ri Kerisitu Yesu pai ua kasambaʼa-mbaʼata pai Sira ndapasoaka kita da mantimosuki Pue Ala, ri kaliogu mpeaya ndaya.

¹³ Inceʼe painaka kuperapi ri komi neʼe ndipoʼipu kono kapari anu kuepe seʼi, ua komi puʼunya; maka pura-pura setu tila da ngkadagomi.

Towe i ngKerisitu 3:14-21

¹⁴ Inceʼe puʼunya painaka kumombukotu ri suara mPapa.

¹⁵ Maka Siramo anu mampapotoʼo pura-pura anu ri suruga pai anu ri lino.

¹⁶ Kupekakaika ri Pue Ala anu makuasa pai meawa pai mabuya raya-A mawai roso ndaya ua potetala Inosa ri rayami.

¹⁷ Tuarapa ua peayami ri Kerisitu, i Kerisitu da maroo-roo ri rayami, da marosomo katuwumi maka towe ndaya mokalemo ri rayami.

¹⁸ Kupekakaika tuarapa komi sangkani-ngkani pai pura-pura tau i mPue Ala, da ndikoto malele ndaya ewambeʼi kabininya, karatenya, kandatekanya pai kayombunya towe i ngKerisitu.

¹⁹ Anu bareʼe da nakoto nawa-nawa mantubu gori ngkayombunya. Tuarapa da ndiincani towe i ngKerisitu setu, pai puru ndaya i mPue Ala anu bereʼe posarinya, pai gana-gana ndawaika komi.

²⁰ Pai kuasa mPue Ala anu motetala ri rayata, kaʼinceʼenya i Pue Ala da mawianaka maria ngaya anu meruu ri anu taperapi pai tanawa-nawa.

²¹ Mbolimo i Pue Ala anu ndabangkei mampoliu i Kerisitu Yesu, ri raya dompu tuwu salapi tuwu salapi. Teundemo i Pue Ala rantani masae-sae! Ami.