Epesus 2 - Sura Magali Nuntu Ngkatuwu

Ungka ri kapate melimba ri katuwu 2:1-10

¹ Kamonconya komi i owi matemo tanoanami maka komi tuwu ri raya ncalaa pai meewa ri waʼa ncongka i mPue Ala.

² Ri sindara setu malulu waʼa mpoʼengko lino seʼi; posokinya komi mepoʼinaya ri waʼa ngkuasa anu ri raoa, inceʼemo inosa anu wawaseʼi mangkuasai waʼa ntau anu bareʼe meaya ri Pue Ala.

³ I owi kita seʼe siwia pai waʼa ntau seʼe; kita tuwu malulu engko ngkatolinota, tapowia nunjaa anu pepokono ndayata pai nawa-nawata anu majaʼa. Ri tempo setu kita woʼu tesua ri waʼa ntau anu ndapokarau i mPue Ala siwia pai waʼa ntau ntaninya.

⁴ Paikanya bangke kojo kapande ndaya i mPue Ala! Anu tongawa ri ndapampotowe kita,

⁵ mau kita matemo ua waʼa mpeewata, Sira mawali mpatuwu kita sangkani-ngkani pai i Kerisitu. Mewali podo ua kapande ndaya i mPue Ala, Sira mancorepaka komi.

⁶ Ua kita sambaʼa-mbaʼa pai i Kerisitu painaka i Pue Ala mampatuwu kita sangkani-ngkani pai Sira, da naka kita woʼu moparenta sangkani-ngkani pai Sira ri raya ncuruga.

⁷ Pampowia i mPue Ala ewanceʼe da naka ri tempo anu nepa darata da nakita ntolino ewambeʼi kapande ndaya i mPue Ala anu ndapatongawa ri kita mampoliu i Kerisitu Yesu.

⁸ Maka podo ua kapuru ndaya-A painaka komi ndasorepaka ua peaya ndayami. Inceʼe banya sili lengemi, paikanya pombai mpuru i mPue Ala;

⁹ banya wua mpotetalami, inceʼe painaka neʼe reʼe anu mampekiundeka kono inceʼe.

¹⁰ Kita ndapapewali i mPue Ala ri raya i ngKerisitu, i Pue Ala mamponinika kita da mawianaka waʼa anu madago anu roomo Ndapatokaka kita.

Ndapasambaʼa-mbaʼa ua i Kerisitu 2:11-22

¹¹ Da ndiendo ndayamo katedikanakami ntongo i owi; komi ndatoʼo, “Tau anu bareʼe ndasuna”, pantoʼo nto Yahudi anu mampetoʼo-toʼoka tau seʼe anu roo ndasuna (anu ndatinako ndaya inceʼemo tau seʼe anu maratamo petondoni anu napowia ntolino ri koro ntau seʼe).

¹² Ri tempo setu komi bareʼepa sambaʼa-mbaʼa pai i Kerisitu, komi ntongo mewali tau anu ri sambalikunya anu bareʼe tepesua ri imba ntau anu ndapilisi i mPue Ala. Komi bareʼe tesua ri pojanji mPue Ala anu ndapatoka tila waʼa ntau-A. Komi tuwu ri lino seʼi ri kabareʼenya reʼe pampomata-mata pai ri kabareʼenya ndiincani Pue Ala.

¹³ Paikanya seʼi-seʼi, ua komi sambaʼa-mbaʼamo pai i Kerisitu Yesu, komi anu i owi lawa, seʼi-seʼi mosumo ua kapande i ngKerisitu.

¹⁴ Maka i Kerisitu ngkalio-A anu mampasimadago pai mampapokenta kita. Sira anu mampasambaʼa-mbaʼa kita waʼa nto Yahudi pai waʼa ntau anu banya to Yahudi, mewali sambaʼa banca. Ua kapate i ngKerisitu, Sira mageromo rindi watu anu maoyoti kita inceʼemo poʼiwali.

¹⁵ Waʼa mpadika agama nto Yahudi, waʼa ncongka pai waʼa ada agama ndapalisimo i ngKerisitu, da naka banca radua setu mewali sambaʼa banca tolino anu dawoʼu anu mompasambaʼa-mbaʼamo pai i Kerisitu. Ewanceʼemo powia i ngKerisitu anu mampareʼe kasimadago.

¹⁶ Ua kapate-A ri kaju ndapanggo, i Kerisitu mampasambaʼa-mbaʼa radua banca setu, pai mampapokenta tau seʼe pai i Pue Ala, painaka bareʼemo reʼe poʼiwali.

¹⁷ Inceʼe puʼunya i Kerisitu rata mampobambarika Nuntu ngKatuwu kono kasimadago ri komi; madago komi anu i owi lawa ungka ri Pue Ala, ewanceʼe seʼe to Yahudi anu mosu ri Pue Ala.

¹⁸ Ri raya i ngKerisitu, kita pura-pura – madago to Yahudi pai anu banya to Yahudi – ua potetala Inosa mPue Ala anu sambaʼa-mbaʼa setu takoto mantimosuki i Papa.

¹⁹ Mewali komi banyamo tau mencua bara tau anu ri sambalikunya. Wawaseʼi komi sangkani-ngkani mewali tau i mPue Ala. Komi tepesuamo bangani ncombori i mPue Ala.

²⁰ Komi ndawangu ri wawo mpondasi anu napatunda waʼa ncuro pai waʼa nabi paikanya watu mpompakarosonya i nceʼemo i Kerisitu.

²¹ Siramo anu mampapodede katewangunya mewali sambaʼa Banua mPue Ala anu magali, tepatani tila i mPue.

²² Ua katuwumi sambaʼa-mbaʼa pai i Kerisitu, komi ntongo ndawangunaka sangkani-ngkani pai waʼa ntau ntaninya da mewali sambaʼa banua tila i mPue Ala; njairia da peari Inosa mPue Ala.