AYUBI 9 - Sura Magali Nuntu Ngkatuwu

I Ayubi 9:1–10:22

^1-2 Paikanya mesono i Ayubi, natoʼo, “Lawi kuincanimo incetu, pompaumu setu monco, paikanya ewambeʼi da napangkoto ntolino da mampokara-karaka pai da manangi i Pue Ala?

³ Ri sancowu pompeoasi anu ndapeoasi i mPue Ala sako sambaʼa bereʼe anu nasono ntolino.

⁴ I Pue Ala setu maʼai ngkaloʼe pai makuasa; isema anu mangkoro da maewa Sira?

⁵ I Pue Ala malimba buyu ri kabareʼenya naincani ntolino, ndaposebuka ua karau ndayaa.

⁶ I Pue Ala mampareʼe lindugi painaka kaenggo-enggo lino, nono anu mancungko lino kanjua-njua.

⁷ I Pue Ala Anu Makuasa mangkoto da mayawa eo mebete ri mpowuro, pai mantaʼamaka waʼa betuʼe merara ri yangi.

⁸ Bereʼe anu mantulungi Sira mantale tongo ndaoa; ndalanda-landasi wutongo naga ri tasi.

⁹ Ndapapodede mangkapa ri yangi tondo selata. Betuʼe Moiku betuʼe Belanti pai betuʼe Karatika.

¹⁰ Bareʼe takoto marata ndaya waʼa anu ndapowia; bareʼe takoto maimba waʼa tanda ngkuasa.

¹¹ Sira melempo ri suaraku pai bareʼe kukita; Sira moliu ri sodipiku pai bareʼe tongawa ri yaku.

¹² Ane Sira da marampa, isema anu mantaha mampetangani? bara anu da meoasi ri Sira, ‘Ee nunjaa anu ndipowia?’

¹³ I Pue Ala bareʼe madika-dika karau pai karameda ndaya; waʼa yunu i Rahabu seʼe meʼuru ri Sira.

¹⁴ Mewali, ewambeʼi da kupangkoto maewa Sira? Pau anu ewambeʼi anu da kusonoka Sira?

¹⁵ Mau yaku bareʼe masala, nunjaa anu da kukoto mampowia? Podo merapi kapande ndaya ungka ri Pue Ala anu da mabotusi yaku?

¹⁶ Ane rapanya da ndasono ane kumeboo ri Sira, ipu rayaku, bara da ndapedongeka oni ngangaku?

¹⁷ Sira anu mampokau lompiu mangagero yaku marangani kapariku bereʼe puʼunya.

¹⁸ Bareʼe ndawai tempo ri yaku da moʼinosa mau podo sarai; ndaranga-rangani kapari ngkatuwuku anu maʼai kojo.

¹⁹ Ara da kupetujuka rosoku maewa Sira? Paikanya peole ngkarosoa! Ane rapanya da kuparata pau mpetadai ri Sia isema anu mantaha da mapeboo Sira ri pobotusi?

²⁰ Yaku todo bareʼe mowia salaa, paikanya ngujuku mompau mantorobaka, sangkani-sangkani wiwiku mampasowa, ja ewa yaku anu napetisala.

^21-22 Yaku bareʼe masalaa, paikanya inceʼe bareʼemo kusawa-nawa. Malentemo rayaku tuwu seʼi. Bareʼemo reʼe anu moyowe ri yaku; anu masala pai anu mayoa, siwiamo seʼe katuwunya; radua seʼe da ndagero i mPue Ala.

²³ Ane tau anu bareʼe masalaa mate ncoroba, podo ndapogeleka i mPue Ala.

²⁴ Lino ndapepombaika i mPue Ala ri tau anu baleparu pai waʼa ntopobotusi puramo ndapakabuta. I Pue Ala anu mampowia pura-pura seʼi, ane banya Sira tampe da isema?

²⁵ Reme-reme ngkatuwuku liumo pura-pura, payamo bareʼe totaʼa kawongko ndaya.

²⁶ Ewa duanga anu majoli, saraija kaliu ngkatuwu, ewa pentilobaka ngkoaʼa, mancangke sinokonya.

^27-28 Ane kupokono tekalumiri mogele ri wongko ndaya, ane kupebutuka da mangkalingani waʼa ngkapari ndaya. Ratamo woʼu susa ndayaku maʼilawu yaku; maka kuincani i Pue Ala mampetisala mpaliu yaku.

²⁹ Mewali, ane ewanceʼe nunjaa woʼu anu da kunawa-nawa?

³⁰ Bereʼe sabu anu da mampakapaya salaaku!

³¹ I Pue Ala madolomaka yaku ri loge, painaka sako rengkoku mampakarikamo yaku.

³² Ane rapanya i Pue Ala setu tolino, da kukoto mampombesonoka Sira, nepa da njoʼu kami mancuaraki topobotusi da mamparoo pura-pura pombetoli.

³³ Paikanya bereʼe topobotusi anu mangkoto da mabotusi kami radua.

³⁴ Tuarapa da ndaowemo i mPue Ala mangahuku yaku pai mampakalawa kaʼai ngkarau ndayaa ungka ri yaku!

³⁵ Bareʼe maeka rayaku ri Sira painaka da kumompau seʼi, maka kuincani rayaku ngkalioku.