AYUBI 8 - Sura Magali Nuntu Ngkatuwu

I Bilida 8:1-22

^1-2 Nepa mompau i Bilida, natoʼo, “Sangkuja ngkasae woʼu da pompaumu monuntu? Waʼa mpaumu podo ewa pokuu ngoyu.

³ I Pue Ala bereʼe ndapampapodenggo anu mayoa; bereʼe kabareʼenya ndakoto mampatoa anu monco.

⁴ Bara waʼa anamu anu masalaa ri Sira, sintinaja tau seʼe da ndahuku.

⁵ Paikanya ane Sira petatondomu merapi kapuru ndayaa pai merapi puru,

⁶ Ane mayoa rayamu bereʼe posarinya, da ronga ndatulungi i mPue Ala siko; pai silinya somborimu da ndawali mpakadago muni.

⁷ Waʼa ngkakoreʼemu anu tetaji setu bareʼepa sangkuja ane da ndapasintolio pai anu nepa da nurata.

⁸ Tau anu loʼe ipiamo da nuendo ndayamo, pai da nupepewolokamo nunjaa anu naepemo waʼa ngkaimu.

⁹ Katuwuta seʼi podo sarai, pai bareʼe taincani bara nunjaa-njaa; waʼa eo ngkatuwuta podo ewa limpayo.

¹⁰ Pedongekamo pau ntau anu loʼe ipiamo, tau seʼe mantotorakaka siko ewanceʼi:

¹¹ ‘Podo ri tana ke ue da katuwu osole, tole podo ri laro da katuwunya.

¹² Ane oti uenya da makese katuwu osole, maliga kojo banya ewa pinamuya ntaninya. Ntongo da matapa bareʼepa jela temponya, siʼa ndatowomo pai ndapoyowekamo.

¹³ Ewanceʼemo tau anu bereʼe puenya. Nakalingani i Pue Ala painaka bareʼmo reʼe pampomata-mata.

¹⁴ Podo sambaʼa gapasi anu kodi-kodi da peloekanya; danga bukaka inceʼe nasarumaka.

¹⁵ Ara maroso danga setu da pekekeni? Ara da nakoto nggapasi setu da peloeka?’

¹⁶ Podo ewa morompa, kadonde ntau anu bareʼe puenya; ane nasindi ndeme malimbokori katuwunya liambari juku-juku bonde.

¹⁷ Kalenya mewewesi ri waʼa mbatu ri tana; maroso pewewesinya bareʼe saru-saru telongkomaka.

¹⁸ Paikanya seʼi-seʼi koisa perabu morompa setu, da ndaepe ewa bereʼe pekekeninya.

¹⁹ Mewali podo ewanceʼe kawongko ndaya ntau majaʼa; da rata tau ntaninya mancawanaka siʼa.

²⁰ Paikanya i Pue Ala bareʼe sangkani da mampalaika tau anu todo, pai bareʼe sangkani da ndatulungi tau anu baleparu.

²¹ Siko da ndapapogele, siko da manggora-nggora ua kawongko ndayamu.

²² Waʼa ntau anu mampobanciika siko da maea pai da ngira, pai banua ntopojampa da ndarongkasi rantani magero.”