AYUBI 7 - Sura Magali Nuntu Ngkatuwu

¹ Tolino setu ewa ndariso mompari-mpari; mapari katuwunya ewa katuwu ntau ndasaro;

² ewa watua anu mampodaraya kareʼe mpemounya; ewa topotetala mampopea saronya.

³ Pusa sambuya-pusa sambuya katuwuku bareʼe tumotoa; sambengi-sambengi rayaku buke pai susa ndaya.

⁴ Ane kunjoʼu yore, kuepe masae gaga wengi, da rayaku mangkita pesindi ndeme, bareʼe rodo poturuku.

⁵ Koroku buke tolodo pai daa makara, pelaku mawela pai kawera-wera nana.

⁶ Katuwuku anu bemoreʼe pampomata-mata setu melinja pelinja mantotoka da potandonya. meruu kaliganya pai topontanu mayoro masinanya.

⁷ Ndipetiromo, Boo Pue Ala, katuwuku podo ua mawuinaka inosa; payamo kalindo ndaya, bereʼe sako wakanya.

⁸ Seʼi-seʼi ndikita yaku – paikanya bareʼemo masae, ane ndipepali bareʼemo da reʼe.

^9-10 Ewa santai limu anu da paya tolino seʼi da mate bareʼe da wali ngkatuwu. Pura-pura tau anu maincanimo siʼa, da nakalingani pai bareʼemo da naendo siʼa.

¹¹ Inceʼe painaka yaku bareʼe da kumonjii! Kapari ndaya pai kapari ngkatuwu bareʼe kukoto mantodosaka. Sangaya-ngaya da kumompau da kubulere bangani ndayaku.

¹² Wenu painaka yaku seʼi ndijagai pai ndikariani? Ara yaku seʼi naga ntasi anu majaʼa?

¹³ Kumoturu pai mampebutuka mampeosaka kalengeku; Kupepalika da naka ngaʼa ndayaku anu masusa.

¹⁴ Paikanya ndiekasi yaku pai pangipi; ndiparata pangipi majaʼa pai pakita ndaya.

¹⁵ Moruana yaku ndigogoli naka mate painaka tuwu pai koro anu buke pai kapari seʼi.

¹⁶ Malengeku pai malentemo rayaku da tuwu; da rayakumo mate. Ndipapaliumo yaku, maka katuwuku bemoreʼe yowenya.

¹⁷ Ara nunjaa yowenya tolino ri komi? Wenu painaka ndipatomata powianya?

¹⁸ Sampowuro-sampowuro ndiparesa pai santempo-santempo ndiʼuji.

¹⁹ Impia nepa da ndipalaika yaku? da naka reʼe tempoku maomo ngeruku?

²⁰ Ee topojaga, ara marugi siko ua kasalaku? Wenu ndipowia yaku da katudu mata mpenai? Bara yaku seʼi podo mampakanee komi?

²¹ Ara bareʼe da ndikoto mancompo salaku? Bara bareʼe ndikoto mampalisi salaku? Bareʼemo masae yaku da moturu-turu ri raya dayo, pai ane ndipepali yaku bareʼemo da ndirata.”