AYUBI 6 - Sura Magali Nuntu Ngkatuwu

I Ayubi 6:1–7:21

^1-2 Nepa mesono i Ayubi, natoʼo, “Ane rapanya kapari ndayaku seʼi da ndadasi kaneenya,

³ manoto da meruu kaneenya painaka rangiʼi, Mewali neʼe ndipojingki ane pauku bareʼe timama pai maria anu telonco.

⁴ Mata mpana ungka ri Anu Makuasa mangayosuki koroku; rasunya melele ri sancuma ngkoroku. Kabangke ngkuasa i mPue Ala mampakaeka raya, mampombetotoka yaku ewa surodado iwali.

⁵ Kalide anu madonde rayanya ane ndawaika ewo mangura. Ewanceʼe seʼe japi ane ndawaika pangkoninya.

⁶ Paikanya pangkoni anu bareʼe monyami isema anu mampokono? Ara buya ntoyu manu reʼe nyaminya?

⁷ Bareʼe kupokono da mangainu; wusu luaku ane kukoni.

⁸ Wenu painaka bareʼe ndapokono i mPue Ala mampedongeka pekakaiku? Wenu painaka bareʼe ndapedongeka pebooku?

⁹ Tuarapa ndapokono i mPue Ala maregesi yaku! Tuarapa Sira da mampepate yaku!

¹⁰ Inceʼe kuepe sambaʼa pompalindo ri yaku, da moende yaku ri tongo ngkapariku. Pura-pura songka i mPue Ala Anu Magali, pura kululu pai kuparindaya mpaliu.

¹¹ Ara nunjaa kuasaku painaka ntongo seʼipa yaku? Nunjaa woʼu anu da kupomata-mata painaka da rayaku naka masaepa katuwuku?

¹² Ara ewa karoso ndoka koroku seʼi? Bara ungka ri tambaga koro seʼi?

¹³ Puramo rosoku da mampepali petulungi; bareʼemo reʼe petulungi anu rata ri yaku.

¹⁴ Ri tongo ngkapari anu ewaseʼi, kupomata-mata kojo baleku anu maramu. Bara ntongo todopa yaku bara bareʼemo kulinga Sira Anu Makuasa.

¹⁵ Paikanya komi, ee waʼa yunuku bareʼe ndasarumaka pai bareʼe ndapomaaka. Komi podo ewa koro ue anu otimo uenya ri tempo mporeme.

¹⁶ Komi podo ewa koro ue anu lindu-lindu bareʼe moili, maka nakaʼuwi ue anu toro mewali watu.

¹⁷ Paikanya ane tingkarasaka rata poreme, ue anu mewali watu setu oti, bareʼemo reʼe sako wakanya. Oru ngkoronya mangau-ngau, bareʼemo reʼe ue makaramo.

¹⁸ Waʼa ntau melinja ri pada bone lingu pai mampepalimo ue; tau seʼe teyoro-yoro rantani mate ri pada bone.

¹⁹ Waʼa anu melinja ri pada bone ungka ri Seba pai ungka ri Tema mampepali ue setu ua pampomata-matanya.

²⁰ Paikanya pampomata-matanya setu podo ngkabongo ri wingke ngkoronya anu bereʼe uenya.

²¹ Ewa koro ue setumo komi, ee waʼa yunuku; komi metilawangi maka maeka rayamu mangkita kapariku.

²² Ara wenu? Ara reʼe bara nunjaa-njaa kuperapi ungka ri komi? Bara kupokau komi da masaro tau ua da porasiku?

²³ Ara merapi yaku da ndisorepaka bara da ndiosu ungka ri pale iwali anu bereʼe puru ndayanya?

²⁴ Mewali, ndipagurumo yaku, pai nditujumo kasalaku! Yaku da monjii da mampedongeka paumi.

²⁵ Waʼa mpau anu mayoa da mampakaranindi raya, paikanya paumi soa bereʼe yowenya!

²⁶ Pura-pura pauku ndireke podo ewa ngoyu; bereʼe yowenya ndisono yaku anu mapese rayaku seʼi.

²⁷ Sako ananggodi anu ilu roo nditonaa da katuwunya ripurinya, balemi maramu ndiʼakalasi da naka koreʼe komi.

²⁸ Koisa ndilele ndaya mpodago kono yaku; da loʼu rayaku mombamba ri komi?

²⁹ Da ndirata ndayamo, neʼe manee ncambali komi! Neʼe ndiposari yaku maka monco kojo yaku bareʼe masala.

³⁰ Boija bata-bata rayami, ndisarumaka mombamba yaku, bareʼe kuincani mampaposisala anu madago pai anu ndaposari?