AYUBI 5 - Sura Magali Nuntu Ngkatuwu

¹ Peboomo, ee Ayubi, bara da reʼe sononya? Malaʼeka mbeʼi anu nuperapi da mampelae?

² Podo tau anu tengo anu anu mate ua kakodi ndayanya.

³ Reʼe kupangkita tau anu tengo, ndakita maroso katuwunya, paikanya tingkarasaka kutadeasi kareʼe mpearinya.

⁴ Inceʼe painaka waʼa ananya bareʼe da reʼe kareʼe mpemounya; bereʼe tau anu mampompasambalika tau seʼe ri suara nto pobotusi.

⁵ Nunjaa anu napota ntau seʼe ungka ri bondenya, pura nakeni ntau anu da yogamo. Sako gandu anu ri oyo ewo pura nakeni ntau anu maoro. Waʼa aga-aga pai kakoreʼe ntau seʼe mewali anu naposawoyo ntau anu bereʼe aga-aganya.

⁶ Pebetenya banya ungka ri lino ngkajaʼa; banya woʼu ungka ri lino ngkasusa pemetinya.

⁷ Banya! Paikanya inceʼe mebete ungka ri tolino ngkalionya anu mampareʼe rugi ri woto ngkoronya ngkalionya, ewa penesi-nesi waa apu anu mesuwu ungka ri reka apu.

⁸ Ane da yaku ewa katedikanakamu seʼi, da kumeboo ri Pue Ala, ri Sira pampetumbuku, pai pampesaraʼuka kara-karaku.

⁹ Waʼa mpowia i mPue Ala bereʼe kasiwianya pai bareʼe takoto marata ndaya. Waʼa ntanda ngkuasa anu ndawianaka bareʼe takoto maimba pai bereʼe kapuranya.

¹⁰ Sira anu mampatudu uja ri wawo lino, painaka bonde pai pada yoʼo natudusi uja.

¹¹ Siramo Pue Ala anu mantanderaka tau anu kodi pai mapalindo raya ntau anu masusa.

^12-13 Ndaompo tinako ndaya ntau anu toponggoli-nggoli, ndapatambo pai ndasoko tau anu loʼe, painaka pura-pura tetalanya bareʼe mewali; tau seʼe nambambasi nawa-nawanya ngkalionya.

¹⁴ Ri tongo ndeme tau seʼe nasumba mbani, moama-ama ewa ri ntongo mbengi.

¹⁵ Paikanya i Pue Ala mancorepaka tau anu kaasi-asi ungka ri kapate, tau anu kodi ungka ri pejeani.

¹⁶ Seʼi-seʼi reʼe woʼu pampomata-mata, tila waʼa ntau anu bereʼe anunya. Pai tau anu majaʼa monjii mpaliu maka roomo ndapigati mPue Ala ngujunya.

¹⁷ Morasimo siko ane ndaseko i mPue Ala! Neʼe makodi rayamu ane ndaposari siko.

¹⁸ Maka i Pue Ala anu mampakajuʼa, Sira seʼe anu mampakuli. Pai palea anu maboembi inceʼe seʼe anu mampakaʼosa.

¹⁹ Ane reʼe pari merampe, bareʼe bali-bali ndapasorepaka siko.

²⁰ Ane reʼe oro bangke merampe, siko bareʼe da mate yoga. Ane ri poʼiwali pai ri pombetoto siko ndakariani bareʼe da mate.

²¹ Siko ndawawence ungka ri penuntuki pai petundeki; bareʼe maeka mancuaraki waʼa mpepa.

²² Ane pejeani pai kaoro merampe, siko da todo pai podo nupogeleka. Bareʼe da maeka bara malente siko mancuaraki pinatuwu anu masii.

²³ Bonde anu nupajeko bareʼe da kewatu, bareʼe da najaʼati mpinatuwu anu maila siko.

²⁴ Lindo rayamu maroo-roo ri kemamu; ane nuparesa waʼa bimbamu, pura-pura madago-dago bereʼe anu makura.

²⁵ Waʼa ana pai makumpumu bareʼe ndaincani imbanya, ewa kasondo ewo ri pada.

²⁶ Ewa gandu anu matasa ratamo tempo pampota, siko da tuwu madonde-donde rantani narata ngkatuʼa.

²⁷ Ee Ayubi, pura-pura setu roomo kuparesa, pau setu monco, mewali jamo da nutarima.”