AYUBI 42 - Sura Magali Nuntu Ngkatuwu

Ayubi 42:1-6

^1-2 Mesono i Ayubi ri Pue, natoʼo, “Kuincanimo, boo Pue, kakominya Makuasa; ndikoto mawianaka nunjaa ntano.

³ Ndipeoasi, wenu painaka kupoʼipu kaloʼemi, ntanoka yaku ngkalioku bareʼe kuincani. Yaku mompau kono anu bareʼe kurata ndaya, kono anu maʼai kupampojingki.

⁴ Komi mampokau yaku da mampedongeka sindara pompaumi, pai da mancono ane ndipeoasi.

⁵ I owi, pangaincaniku kono komi podo kudonge-donge ri tau, paikanya seʼi-seʼi kuincani Komi ri pombesusuara.

⁶ Inceʼe painaka maea mataku mangaendo waʼa mpauku ua poncosoi ndayaku, kumotunda ri tana pai ri awu.”

Kapusanya 42:7-17

⁷ Roo mompau pai Ayubi, mompau i Pue ri Elipa, ndatoʼo, “Majaʼa rayaku ri siko pai ri yunumu anu radua, maka komi bareʼe mantoʼo anu makonconya kono yaku. Paikanya anamayunuku i Ayubi banya ewanceʼe.

⁸ Mewali, seʼi-seʼi timamo papitu japi laki pai papitu bimba laki, ndikanjoʼumo ri Ayubi. Roo setu ndipanyombaka pura-pura setu mewali panyomba anu ndaʼombasi da tilami. I Ayubi da mampekakaika komi pai pekakainya da Kutarima. Komi bareʼe Kupakaea, ane kamonconya sintinaja da marata popahuku. Komi bareʼe mompau anu kamonconya kono Yaku, paikanya i Ayubi mantoʼo anu kamonconya.”

⁹ Njoʼumo kojo i Elipa, i Bilida pai Sopari mawianaka nunjaa anu ndapepokauka i mPue, pai ndatarima i mPue pekakai i Ayubi.

¹⁰ Ungka lairia, butu roomo mekakai i Ayubi, mampekakaika yununya tatogo, ndapapewali i mPue i Ayubi koreʼe muni pai ndawaika siʼa rua ngkani kasondonya pai waʼa anu napotumpumo owi.

¹¹ Pura-pura tukaka i Ayubi pai kasangkomponya anu weʼa sangkani pai waʼa yununya owi, ratamo madadu siʼa nepa mosusa sangkani-ngkani pai siʼa ri banuanya. Tau seʼe mamparata bangani ndayanya mamposipomasusa ua kapari anu ndapapakoyokamo i mPue siʼa, pai mampalindo rayanya. Waʼa ntau seʼe setu mawai doi pai sambaʼa sinci wuyawa ri Ayubi.

¹² I Ayubi ndadonco i mPue meruu woʼu kasondonya ri yabi eo ngkatuwunya, painaka ri katuwunya ri kabareʼepanya narata kapari. I Ayubi mampotumpu 14.000 mbula pai bimba, 6.000 onta, 2.000 japi pai 1.000 kalide.

¹³ Siʼa marata papitu ana anu tuama pai tatogo ana anu weʼa.

¹⁴ Ananya weʼa anu kaʼisa napapotoʼoka i Yemima anu karadua i Kesia pai anu kasupua napapotoʼoka i Kerenihapu.

¹⁵ Ri samalele ntana setu bereʼe anaweʼa anu ewa kadolidi ana i Ayubi anu tatogo setu. Tau seʼe marata tila panta ungka ri papanya siwia pai tila ngkasangkomponya anu tuama.

¹⁶ Roo setu i Ayubi ntongo tuwupa 140 ntaʼu kasaenya, painaka naleʼo mangkita waʼa makumpunya pai waʼa ana ntau seʼe.

¹⁷ Nepa mate i Ayubi ri tinuwu anu marate kojo.