AYUBI 4 - Sura Magali Nuntu Ngkatuwu

POMPASIMBAJU ANU KAʼISA 4:1–14:22 I Elipa 4:1–5:27

^1-2 Mompaumo i Elipa, natoʼo, “Ayubi, bara da malente rayamu ane kumompau? Maka bareʼemo kukoto da mantodosaka woʼu ponjii-njiiku.

³ Maka mariamo tau anu roo nupaguru, pai tau anu malente nupakaroso rayanya.

⁴ Waʼa mpaumu anu mampakaroso raya, mawangu tau anu tesungkuli, anu teluentesaka pai malenge.

⁵ Paikanya seʼi siko anu napere ncusa ndaya; jingki rayamu pai mapese rayamu.

⁶ Ara banya siko tau anu todo ri Pue Ala; ara banya katuwumu bereʼe posarinya? Ane ewanceʼe, kamonconya da maroso rayamu pai bareʼe da mapese rayamu.

⁷ Koisa pepewoloka ara reʼemo tau anu bareʼe masala da napere rugi pai kapari?

⁸ Inceʼe kuincani ua kupampatomaka tau anu mampajeko bonde ngkajaʼa pai mancawu inii ngkapari ewa wuku mpinamuya, inceʼe da mampota rugi pai susa ndaya.

⁹ Ewa balumba ndopo, ewanceʼemo karau ndaya i mPue Ala magero tau seʼe rantani opi!

¹⁰ Tau anu majaʼa mengara pai monggaori, ewa singa anu pontukepe ntau seʼe. Paikanya i Pue Ala mampaponjii tau seʼe pai mangarutesi ngisinya.

¹¹ Tau seʼe da mate ewa singa anu bareʼe gana pangkoninya, painaka waʼa ananya jianja bareʼe tumotoa.

¹² Reʼe sangaya pepatongawa rata ri yaku, ewa pojawa anu maʼalusu ri talingaku.

¹³ Bareʼe lintu kayoreku maka narendosi, ewa kumampangipika anu majaʼa ri raya mbani.

¹⁴ Jingki rayaku pai yoro-yoro koroku, meromodi wuyu ngkoroku pai kandende-ndende.

¹⁵ Lioku nawui ngoyu ngkaratana, mesuongko wuyu ngkoroku.

¹⁶ Reʼe bara nunjaa mekakore ri suaraku; kulotosi paikanya bareʼe kuincani, nepa kudonge oni nganga mompau sindara njii ri sambawo ntana,

¹⁷ natoʼo, ‘Ara da reʼe tolino anu bereʼe salanya ri suara i mPue Ala? Ara da monco sambaʼa tau bereʼe posarinya ri suara anu mampapewali siʼa?

¹⁸ Sakopa waʼa mbatua i mPue Ala ri suruga bereʼe anu ndasarumaka i mPue. Sako waʼa malaʼeka ndarata kasalanya pai posarikanya.

¹⁹ Pagonya ane jamo anu ndapowia ungka ri tana mapuyu, anu podo awu ndakoto maripusi ewa tagara!

²⁰ Inceʼe setu tuwu mowuro pai ngkinowia mate ngkabongo, pai rantani masae-sae sako wakanya bareʼemo kono ndaendo.

²¹ Mewali payamo pura-pura anu napotumpu, mate ngkabongo bereʼe bara nunjaa anu napoloʼe.’