AYUBI 2 - Sura Magali Nuntu Ngkatuwu

I Topekelo mampebutuka woʼu i Ayubi 2:1-10

¹ Ndatemo woʼu waʼa anu ri suruga, mancuara i Pue, pai njau woʼu i Topekelo ri oyo ntau seʼe.

² Meoasi i Pue ri Topekelo, ndatoʼo, “Ungka ri mbeʼi siko?” Mesono i Topekelo natoʼo, “Ungka ri polayo-layoku maleleangi wawo lino.”

³ Meoasi i Pue ndatoʼo, “Bara nupatomatamo watuaku i Ayubi? Ri sambawo lino bereʼe tau anu ewa siʼa katodonya. Siʼa manyomba ri Yaku pai bereʼe powianya anu majaʼa. Siʼa ntongo todopa ri Yaku mau roomo nukanarasi Yaku mampakarugi siʼa seʼi bereʼe puʼunya.”

⁴ Paikanya mesono i Topekelo, natoʼo, “Inosa pai kadonde ngkoro anu bangke olinya pai aga-aga. Tolino napokono mampepombaika pura-pura aga-aganya podoia siʼa da tuwu.

⁵ Ane rapanya koronya ndapakajuʼa manoto da napampepepara Komi!”

⁶ Ndatoʼo i mPue ri Topekelo, “Madago powiamo pepokonomu ri siʼa podoia neʼe nupepate siʼa.”

⁷ Malaimo i Topekelo ungka ri suara i mPue, napapeumbamo bisu ri juku-juku suma ngkoro i Ayubi, ungka ri payaʼanya rata ri woʼonya.

⁸ Inceʼe painaka motundamo i Ayubi mosu ri kareʼe mpabuyunaka nyoo, nepa natima ripu butolo nakangka-kangkaka koronya.

⁹ Mompau rongonya ri siʼa natoʼo, “Nunjaamo yowenya siko ntongo da todo mepoʼinaya ri Pue Ala? Iomo, pepeparamo Sira, roo setu kamatemo!”

¹⁰ Mesono i Ayubi natoʼo, “Siko mompau ewa pompau ntau tengo! Arakita seʼi podo da mantarima anu madago ungka ri Pue Ala, pai anu majaʼa inceʼe bareʼe da tatarima?” Mewali mau ewanceʼe kaparinya naepe i Ayubi mantodosaka kajuʼanya setu paikanya bareʼe napasowa waʼa mpau anu maewa i Pue Ala.

Karata waʼa yunu i Ayubi 2:11-13

¹¹ Kapari anu mampere katuwu i Ayubi setu tedongemo ri waʼa yununya anu tatogo inceʼemo: i Elipa, ungka ri kota Temani, i Bilida to Suaha pai i Sopari to Naama. Mogombo tau seʼe da njoʼu mampeole pai da mampalindo raya i Ayubi.

¹² Paikanya ri karata ntau seʼe njairia ntongo lawa-lawapa sakodi nasalamo ntau seʼe taʼa i Ayubi. Motumangi tau seʼe marimbo oni nganganya, nasiati ntau seʼe rengkonya napesawuka ntau seʼe awu ri raoa pai ri wawo mboʼo ntau seʼe.

¹³ Pitu mbengi pitu ndeme tau seʼe motunda-tunda ri tana ri sori i Ayubi, paikanya bareʼe mompau tau seʼe mau sanjumi, ua mangkita ewambeʼi kaparinya naepe.