AYUBI 18 - Sura Magali Nuntu Ngkatuwu

I Bilida 18:1-21

^1-2 Mesono i Bilida, natoʼo, “Ee Ayubi, impia tempo da kapuramu? Ponjiimo, pai pedongekamo seʼi-seʼi kami da mompau.

³ Wenu painaka kami nureke bareʼe kaincani raoa, nepa nupasiwia kami pai japi?

⁴ Kasengke ndaya podo mamparini koromu. Ara podo ua siko da opi tau sambawo lino, pai waʼa buyu da melimba ungka ri kareʼenya?

⁵ Silo ntau majaʼa lawi da ndapikasi, bareʼemo da ndawali ntutuni.

⁶ Rara anu di raya ngkemanya da tekamporo; silo anu mampakareme bareʼemo merara.

⁷ Pelinjanya anu naposipa mewali kampondo-mpondo, tinako ndayanya ngkalionya anu napotosube.

⁸ Siʼa melinja ri oyo ntolia painaka tesoʼomo witinya.

⁹ Todunya tesoʼo ri tolia, painaka ndasokomo siʼa.

¹⁰ Ri tana tesambuni wayaa bingkaro; ri jaya njau patambo pai puyu.

¹¹ Tau anu majaʼa najingkiti anu ndapokaeka pai nalimbu ncape, eka ndaya anu malulu wia mbitinya.

¹² I owi maroso siʼa, seʼi-seʼi rugo-rugomo; rugi anu mayunuki ri mbeʼi kanjoʼunya.

¹³ Pelanya nakokoti njuʼa maʼai; pale pai witinya oso menana.

¹⁴ Siʼa ndanoʼo ungka ri raya ngkemanya, ri kareʼe anu madago, nepa ndanoʼo da mancuara kapate.

¹⁵ Seʼi-seʼi isema ntano maya meari ri raya ngkemanya, njairia da ndasawuka pakuli ncola, da mampakuli juʼanya.

¹⁶ Waʼa ngkalenya makara pai singkuru; waʼa raʼanya mangau pai matopu.

¹⁷ Siʼa nasayamo ntau ri raya pai ri sambaliku ngkota; bareʼemo reʼe tau anu maendo toʼonya.

¹⁸ Ungka ri karemenya siʼa ndairi njoʼu ri kawaninya; ndapapalai siʼa ungka ri lino ntau tuwu.

¹⁹ Bereʼe ana pai muli anu napotumpu, ri lipu pebete ntanoananya bareʼe mau sambaʼa tau anu ndadika.

²⁰ Madonge katuwunya, tau ri kasoyoa jingki rayanya, pai tau ri pebetea kandende-ndende maeka.

²¹ Ewaseʼi katedikanakanya tau anu baleparu, tau anu bareʼe mampedongeka i Pue Ala.”