AYUBI 16 - Sura Magali Nuntu Ngkatuwu

I Ayubi 16:1–17:16

^1-2 Paikanya mesono i Ayubi, natoʼo, “Maria ngkanimo kudonge parata ndaya anu ewancetu; pompalindomu podo pejeani.

³ Impia nepa da ndipeʼontoka mbambami setu? Nunjaa anu maʼiowaka komi da mesono?

⁴ Ane rapanya tamotolo, komi setu yaku pai yaku seʼi komi, yaku woʼu da mompau ewancetu. Da kuriuka pau komi pai kumontala-ntalambibi.

⁵ Da kupakaroso rayami pai mpengaya-ngaya anu da kutoʼo; waʼa mpau anu mawai palindo ndaya.

⁶ Ane kumompau bereʼe kamongkunya kapariku; ane kumonjii-njii, nunjaamo yowenya?

⁷ I Pue Ala anu mampakalente yaku; pura-pura bangani ncomboriku roo ndaʼopisaka.

⁸ Sira maewa pai mancoko yaku, seʼi-seʼi dusu mpengkomo yaku, inceʼe petondoni ri waʼa ntau sondo kayakunya tau masalaa.

⁹ Ri kapane ndaya i Pue Ala mancia-nciati koroku; ri karika ndayaa ndapeole yaku.

¹⁰ Waʼa ntau anu mampanggeoni yaku, mampogeleka mobabahaha yaku ndatompe pai pidiku ndatoposaka.

¹¹ I Pue Ala mampepombaika yaku ri pale ntau mobangke-bangke; yaku ndadika ri pale ntau baleparu.

¹² I owi katuwuku madago pai lindo, paikanya i Pue Ala mampesuwuki ncoroba yaku. Ndatarangkaku tangkudeku pai ndapetasoka yaku. Yaku ndapapewali totowa mpopebutuka.

¹³ Bareʼe mapuru rayaa ndapana mpaliu yaku. Rantani jianja wayaa ngkompoku.

¹⁴ Sira merumpa ewa sambaʼa pomakoje, ndawelai yaku papongkani-ngkani.

¹⁵ Yaku mamporengko karu tanda ngkasusa ndaya, motunda ri awu tanda ntau panangi.

¹⁶ Mawaa lioku ua motumangi, mawoke pai mayawuyu tutu mataku.

¹⁷ Paikanya bareʼe kuwianaka anu makasara, tongawa mayoa pekakaiku ri Pue.

¹⁸ Ee lino, kajaʼa pampowia yaku neʼe nusambunika; neʼe nuponjiika pebooku merapi kayoa.

¹⁹ Kuincani anu mampopasambalika yaku ndate ri suruga; Sira da mangancabi kayakunya bemasalaa.

²⁰ Yaku ndapasinggiri pai napopogeleka waʼa yunuku; yaku mancuaraki Pue Ala seʼi tumangi merapi pompelaea.

²¹ Odee, mbolimo i Pue Ala da mampopasambalika yaku ri suaraa ewa sambaʼa tau anu mabuya rayanya mampelae balenya.

²² Yabi ntaʼu ngkatuwu bareʼemo maria; sakodipa tempo yaku malai pai bareʼemo da mewalili.