AYUBI 15 - Sura Magali Nuntu Ngkatuwu

POMPASIMBAJU ANU KARADUA 15:1–21:34 I Elipa 15:1-35

^1-3 Ungka lairia mesono i Elipa, natoʼo, “Podo mbambamu Ayubi, waʼa mpaumu manoto bereʼe posokinya! Bereʼe tau anu loʼe da mesono ewa siko seʼi, siʼa bareʼe da mantuntu yoanya, pai waʼa mpau anu bereʼe yowenya.

⁴ Ewa rapanya waʼa mpaumu setu da ndalulu, bemo reʼe tau da mampokaeka bara da mekakai ri Pue Ala.

⁵ Ri oni mpaumu inceʼe anu mampakanoto siko masala, paikanya kajaʼamu nukaʼuwika kasondo mpaumu.

⁶ Mau bareʼe kutuluri pai kupetisala siko, maka waʼa mpaumu ngkaliomu anu mampogiluka siko.

⁷ Ara nusarumaka sikomo tolino anu uyu-uyu pampoana? Ara reʼemo siko ri tempo pampapewali buyu?

⁸ Ara nudonge sindara pampowia imPue Ala tunggai ndayaa? Ara podo siko anu mampotumpu loʼe ntolino?

⁹ Pura-pura anu nuincani, kami seʼe kaincani, pura-pura anu nurata ndaya, tongawa woʼu ri kami.

¹⁰ Loʼe seʼi karata ri waʼa ntau keuwa; tau seʼe reʼemo ri kabareʼepanya ndapoana papamu!

¹¹ Wenu painaka pompalindo i mPue Ala nutempulaka? Pau mami mayombu pai maʼalusu mancabi toʼoa.

¹² Paikanya siko sengke pai mawaa matamu;

¹³ majaʼa rayamu ri Pue Ala pai mampombesonoka Sira.

¹⁴ Ara da reʼe tolino anu bareʼe masala? Da nakoto mampakamonco koronya ri suara mPue Ala?

¹⁵ Sako malaʼeka bareʼe ndasarumaka imPue Ala; tau seʼe bareʼe magali ri pangkitaa.

¹⁶ Pagonya ane jamo tolino anu majaʼa pai keʼonu, anu maomo jaʼa podo ewa mainu ue.

¹⁷ Pedongeka Ayubi, reʼe sangaya anu da kutotorakaka siko,

¹⁸ au napaguruka ntau loʼe ri yaku, pompaguru setu natarima ungka ri ngkainya, nepa napalimba ri katimamanya ri waʼa mulinya.

¹⁹ Sindara setu bereʼe tau mencua ri tana ntau seʼe; bereʼe anu malinguni tau seʼe ungka ri Pue Ala.

²⁰ Tau anu majaʼa majeani kasiyununya, da naepe ipu-ipu rayanya sangkarate ngkatuwunya.

²¹ Waʼa oni anu marimbo da mampakaʼuii talinganya; ri tempo ngkaʼuononya napesuwuki ntopojampa.

²² Bereʼe jaya ri siʼa da mamperenggoka kawaninya, maka penai ntopopepate maduduki bereʼe karapanya.

²³ Waʼa ntonci kuayangi mampetaʼa tempo ngkapatenya, tau seʼe anu da maomo watangkoronya. Mewali narata ndayamo, mawengimo jaya ngkatuwunya anu nepa da rata.

²⁴ Kapari da ewa mokole anu makoje tikalimo da mantarangkaku siʼa.

²⁵ Ewanceʼemo katuwu ntau anu maewa i Pue Ala; pai anu makoje maewa Anu Makuasa.

^26-27 Ri pobangke-bangkenya siʼa maewa i Pue Ala; natanderaka kantanya, bareʼe mogencu siʼa.

²⁸ Siʼa meari ri waʼa ngkota anu jianjamo, ri raya waʼa banua soa. Waʼa ngkota setu roomo ndapakanoto da mewali awu mpaliu.

²⁹ Kakoreʼe ntau setu da paya bereʼe sako wakanya; aga-aganya da pura mayasi.

³⁰ Siʼa bareʼe da lapa ungka kawani ngkiji, apu anu mangagero waʼa wayonya. Siʼa da posa podo ndatawuisi i mPue Ala.

³¹ Ane naaya anu bareʼe moyowe, da yaʼumo siʼa; silinya anu da narata, anu bereʼe yowenya woʼu.

³² Bareʼepa rata temponya, da matemo siʼa, ewa raʼa anu malele bareʼemo da wali ngkatuwu.

³³ Siʼa daʼewa puʼu anggoro anu marudu wuanya; ewa puʼu ncaitu anu marudu sesenya.

³⁴ Tau anu majaʼa bareʼe da reʼe mulinya; da pura tenunju banuanya anu nawangu ungka ri rasi mpotengko batunya.

³⁵ Inceʼemo tau anu mampoima-ima jaʼa seʼi nawianaka; waʼa mpetengosi buke ri rayanya.”