AYUBI 14 - Sura Magali Nuntu Ngkatuwu

¹ Ungka ri pampoana, tolino setu malente bereʼe rosonya; katuwunya pdo sarai buke pai pari ndaya.

² Siʼa molonde pai malele ewa sese; paya podo ewa limbayo, paya mpaliu;

³ Boo Pue Ala, wenu painaka ndipokono mampeole yaku, pai mangkeni yaku ri pobotusimi!

⁴ Ara da nakoto ntolino anu masala da mampareʼe anu bereʼe posarinya?

⁵ Imba ntinuwu ntolino roomo ndipakanoto; imba mbuyanya roo ndigori. Ndipakanoto woʼu ungka ngkatuwunya; bareʼe nakoto maliunaka.

⁶ Ndipapaliumo da napeosa, neʼemo ndisalempori siʼa; da napaleʼo maepe kadago ngkatuwunya rantani roo tetalanya.

⁷ Ntongo reʼepa pampomata-mata ane puʼu ngkaju ndatowo, maka ntongo da mowayopa pai da moraʼa.

⁸ Mau kalenya maru ri raya ntana, pai tuʼanya mate ua osomo,

⁹ paikanya ane kono ue da mawali ngkatuwu muni; da ewa pinamuya anu mangura, wayonya da wali mpesuwu muni.

¹⁰ Paikanya tolino ane mate puramo paukanya, siʼa mampalaika lino, bara mbeʼimo kanjoʼunya?

¹¹ Ewa ue anu mepasoa ungka ri rano, ewa koro ue anu teloo rantani oti uenya.

¹² Ewanceʼe seʼe tolino anu matemo; bareʼemo da nakoto wali mpembangu. Siʼa bareʼe da tekiwoi sangkasae reʼepa yangi, bareʼemo da membangu ungka ri kayorenya.

¹³ Ndisambunikamo yaku ri lino ntau mate; ndikarianimo yaku rantani mongku karau ndayami. Paikanya ndipakanoto tempo da ndipaendo yaku.

¹⁴ Maka, ane mate tolino, ara da nakoto wali ngkatuwu muni? Sandeme-sandeme kumopea rantani liu tempo ngkapariku.

¹⁵ Maka komi da mampeboo yaku, pai da mesono yaku; komi da mampokapuru muni yaku, tau anu ndipapewali.

¹⁶ Nepa da ndipetiro pura-pura wia mbitiku, paikanya bareʼemo ndipepalisi salaaku.

¹⁷ Salaaku bareʼemo ndikitanaka, ndienggonaka ungka ri yaku; salaaku ri tempo anu ndaliunakamo da ndisompo.

¹⁸ Ripurinya waʼa buyu da maanyu pai da teposebuka, pai buyu ndoka anu maroso da tewaenggo ungka ri kareʼenya.

¹⁹ Waʼa mbatu anu nangangesi mpoili ue anu majoli, tana da napoanduka uja anu marombo, ewanceʼemo da ndipalesaki pampomata-mata ntolino.

²⁰ Da ndinangi siʼa rantani masae-sae; ndipokau napalai pai ndiwalisaka lionya.

²¹ Waʼa ananya mewali tau ndabangkei, paikanya bareʼe naincani. Pai ane tau seʼe mewali tau anu kapuru raya, bereʼe anu mantoʼoka siʼa.

²² Podo mpemotosi ngkajuʼa ngkoronya anu naepe; podo kapari ndaya anu totaʼa.”