AYUBI 13 - Sura Magali Nuntu Ngkatuwu

¹ Pura-pura setu reʼemo kupangkita pai kupadonge ngkalioku pai kurata ndaya kojo.

² Nunjaa anu ndiincani yaku seʼe kuincani; neʼe ndisarumaka yaku da ndinangi.

³ Paikanya yaku da mompau pai Anu Makuasa; da rayaku mantuntu yoaku ri suara i mPue Ala.

⁴ Maka komi mangkaʼuwi katengomi pai pombamba ewa poʼengko ntopopagere.

⁵ Ane rapanya komi bareʼe mompau, bara da ndareke komi tau loʼe.

⁶ Ndipedongekamo pebaliku; ndiparindaya pompauku.

⁷ Bara maya mamposabi toʼo i mPue Ala, komi da mombamba? Bara maya komi da mombamba ua da ndapoyoweka?

⁸ Bara maya komi mancambiranaka i Pue Ala? ua da mampelae Sira ewa pabisara?

⁹ Ane ndaparesa i mPue Ala komi, da madago ndarata? Da ndileʼo mambambasi Sira ewa ndimbambasi tolino?

¹⁰ Ane komi mompasambali mau podo ndiponjii-njiika, maʼa da ndahuku i mPue Ala komi.

¹¹ Ara peawa ngkuasa i mPue Ala bareʼe mampakajingki tanoanamu? Ara kabangke ngkuasaa bareʼe mampakatepaa apojumu?

¹² Pura-pura patujumi podo ewa awu anu bereʼe yowenya; pompaumi mantuntu yoa podo ewa tana mawowo anu saru-saru tepujaa.

¹³ Inceʼe painaka ndiponjiimo, ndipapaliuka yaku da mompau! Bareʼe kuasai ewambeʼi ntano da pewalinya!

¹⁴ Yaku lawi bareʼemo kupepurungu inosaku!

¹⁵ Inceʼe lawi kutunggai maka mapesemo rayaku! Ane da ndapepate i mPue Ala yaku, lawi kutanusakamo, paikanya da kupau kamonco mpowiaku ri suaraa.

¹⁶ Tuarapa ua kakojeku setu yaku da tesorepaka, maka tau anu majaʼa bareʼe da nataha, mancuaraki i Pue Ala!

¹⁷ Seʼi-seʼi ndipedongeka mpodago waʼa mpauku; ndiparindaya totorakaku.

¹⁸ Kara-karaku tikalimo da kuparata, manoto ri rayaku bareʼe maya ndapetisala yaku!

¹⁹ Pue, ane rata Komi mantuluri yaku, yaku da kumonjii, jamo mopea janjiku.

²⁰ Paikanya, ndipoʼiokamo perapiku anu radua ngaya seʼi, da naka kutahapa mancuaraki komi:

²¹ ndipeʼontokamo majeani yaku, pai neʼemo Ndipapakoyoka yaku kaʼai ngkarau ndayami!

²² Ndipompaumo nepa da kusono; bara ndiwaimo yaku da mompau, nepa da ndisono!

²³ Sangkuja ngkasondo sala pai salaa anu kuwianaka? Pura-pura peewaku ndiimbakaku!

²⁴ Wenu painaka mewawence pai malai komi ungka ri yaku? Wenu painaka yaku ndireke ewa iwalimi?

²⁵ Yaku seʼi podo ewa ira ngkaju anu marudu nawui ngoyu, wenu painaka ndiekasi yaku! Yaku seʼi podo ewa deami mangau pai malele, wenu painaka ndiduduki yaku?

²⁶ Ndipakanoto katuwu anu mapari tilaku; ndipepalisi kasalaku ri tempo ngkanguraku.

²⁷ Witiku ndokowaka rante labu, pura-pura polengkoku ndilulu mata. Sako payaʼaku bareʼe lapa ungka ri pampatomatami.

²⁸ Inceʼe painaka yaku maru ewa wata oso; ewa ayapa nakoni ntotokumu painaka matopumo yaku.