AYUBI 12 - Sura Magali Nuntu Ngkatuwu

I Ayubi 12:1–14:22

^1-2 Mesono i Ayubi, natoʼo, “Lawi tongawa kojo komi seʼi mamposarungkoroka tolino. Ane mate komi, kaloʼemi woʼu da mate.

³ Yaku seʼi woʼu tolino anu lau loʼe ndaya; pura-pura anu nditoʼo setu paka kurata ndaya. Pai isema anu bareʼe maincani pura-pura? Mewali neʼe ndisarumaka komi meruumo ungka ri yaku!

⁴ Waʼa yunuku pai baleku mampogeleka yaku, ntanoka yaku seʼi mayoa pai bereʼe posarikanya. I owi Pue Ala masono pekakaiku, ane kumeboo mekipelae.

⁵ Komi mampetikodi tau marugi, sindara madago katuwumi; tau anu da manawumo ndiwombo.

⁶ Paikanya katuwu ntopojampa bereʼe anu maekasi; tau anu maewa i Pue Ala madago katuwunya. Ntanoka lamoa anu nasarumaka ntau seʼe, podo roso ntau seʼe ngkalionya.

⁷ Peoasimo ri tonci pai pinatuwu ntaninya nepa inceʼe da mampaguru komi.

⁸ Perapimo totoraka ungka ri waʼa anu ri lino pai ri tasi nepa da ndirata pontotoraka.

⁹ Isema ungka ri oyomi anu bareʼe maendo ndaya, anu mampareʼe tau seʼe inceʼe i Pue Ala ngkalioa?

¹⁰ Pura-pura anu moʼinosa Sira anu mampatuwu; Sira anu makuasa ri inosa ntolino pura-pura.

¹¹ Ewa kasawoyo njilaku da mampenyami pangkoni anu monyami, ewanceʼe talingaku da rayanya mampedongeka pau.

^12-13 Pantoʼo bambari, kaloʼe reʼe ri tau anu masaemo katuwunya, paikanya kaloʼe pai kuasa podo reʼe ri Pue Ala. Monco parata ndaya reʼe ri tau anu matinuwumo paikanya parata ndaya pai kuasa podo ri Pue Ala kareʼenya!

¹⁴ Nunjaa anu ndarongkasi bareʼemo ndakoto mawali wangu muni isema anu ndatawani bareʼemo nakoto da lapa.

¹⁵ Sira anu mawusu ue, painaka mangau, bareʼemo da tuwu pinamuya. Ane ndayali wusu, ue da moili, pai da nasambori ue mowo.

¹⁶ I Pue Ala setu maroso, makoje pai bareʼe mogencu! I Topombamba pai anu nambambasi reʼe ri ara ngkuasaa.

¹⁷ Ndayali kaloʼe waʼa anu makuasa ri poparenta pai ri waʼa ntadulako ndapapewali tau anu ndapasinggiri.

¹⁸ Ndapapenaʼu waʼa mokole ungka ri gadera mpoparentanya, nepa ndakeni mewali tawani.

¹⁹ Ndapetikodi waʼa ntadu mpanyomba pai waʼa ngkabosenya.

²⁰ Ndapaponjii waʼa ntau anu maria paunya, ndayali loʼe waʼa ntau tuʼa.

²¹ Ndapakaea waʼa ntau loʼe; ndayali kakuasa waʼa ntau anu makuasa.

²² Ndasiloni waʼa ngkareʼe anu mawengi-wengi; ndapakareme waʼa limbayo anu wani ngkiji.

²³ Sira anu mampakateranga-rangani imba waʼa banca pai gana-gana katuwunya, nepa ndaropu tau seʼe rantani masana.

²⁴ Ndapakalingu raya waʼa ntopombawanaka, painaka teyoro-yoro bareʼe mokaa ri mbeʼi da kanjoʼunya.

²⁵ Tau seʼe moama-ama ri tongo mbani, kakampondo-mpondo pelinjanya ewa tau mayangu.