AYUBI 11 - Sura Magali Nuntu Ngkatuwu

I Sopari 11:1-20

^1-2 Ungka lairia mompau i Sopari, natoʼo, “Ara bareʼe da ndasono waʼa mbamba setu? Ara da ndapomonco tau anu sondo pau?

³ Ayubi! Nusarumaka kami seʼi bareʼe kakoto masono paumu? Nusarumaka kami monjii mampedongeka pasinggirimu?

⁴ Malulu paepe ndayamu waʼa mpaumu setu bereʼe sala! Malulu parata ndayamu siko magali ri suara mPue Ala?

⁵ Paikanya mbolimo i Pue Ala ngkalioa anu da mompau!

⁶ Pai mbolimo Sira da mangaseko siko, kaloʼe ndaya setu maria nculapa, pai bareʼe narata ndaya ntolino. Da naka noto ndayamu kono kaparimu setu bareʼepa sangkuja ane ndapasintolio pai popahuku anu sintinaja da nukoyo.

⁷ Ewambeʼi da nupangkoto manawa-nawa katedikanaka i mPue Ala? Ewambeʼi da nupangkoto marata ndaya kuasaa?

⁸ Kuasaa meruu kandatekanya pai yangi; bareʼe rata nuganggayo bara nutima. Kuasaa meruu ngkayombunya pai kareʼe ntau mate, bareʼe liu-liu da nukoto marata ndaya.

⁹ Kuasa i mPue Ala meruu kabangkenya painaka kabangke lino, pai meruu kabininya painaka kabini ntasi.

¹⁰ Ane ndasongka siko pai ndakeni ri poparentaa, isema anu mangkoto da mayawataka Sira?

¹¹ I Pue Ala anu maincani tau anu kambamba-mbamba, powia ntau seʼe anu majaʼa bareʼe tesambuni ungka ri pangkita mataa.

¹² Ane indo ngkalide maila mampoana kalide manaya, nepa da monco ane tau tengo mewali loʼe.

¹³ Ayubi! Pesoyoki rayamu pai poncosoimo! Pekakaimo ri Pue Ala!

¹⁴ Tajika waʼa ncalaa ungka ri rayamu, tawanakamo jaʼa ungka ri banuamu!

¹⁵ Maka podo ewanceʼe da nupangkoto mancuara katuwumu ri karodo ndaya pai ri kakoje, da maroso pekakoremu pai neʼe teloo rayamu.

¹⁶ Kaparimu bareʼemo da kono nuendo; ewa kateloo ue mowo bareʼemo reʼe tau maendo.

¹⁷ Katuwumu da merara meruu ungka ri perara ndeme, pai waʼa ngkawongi ri raya ngkatuwumu mesindimo ewa reka ndeme ri mpowuro.

¹⁸ Siko da maroso pai gana pampomata-mata; I Pue Ala da mangkariani da naka uono katuwumu.

¹⁹ Bareʼemo nupokaeka iwali; maria tau anu merapi tulungi ri siko.

²⁰ Paikanya tau majaʼa da loto-loto matanya mampeole, maka bereʼe petulungi tila ntau seʼe. Podo sangaya anu napomata-mata ntau seʼe, inceʼemo, naka ronga rata janji.”