AYUBI 10 - Sura Magali Nuntu Ngkatuwu

¹ Osamo rayaku pai wusumo luaku kono katuwuku, inceʼe painaka kubuleremo kapari ndayaku.

² Boo Pue Ala neʼemo ndipetisala yaku; nditotorakamo wenu painaka ndipoʼiwalika yaku!

³ Nunjaamo yowenya Komi majeani yaku ewanceʼi, mantaji powia mpalemi ngkaliomi? Nunjaa yowenya Komi masintuwunaka ponawa-nawa pai tinako ndaya ntau majaʼa?

⁴ Parata ndayami bareʼe siwia pai ponawa-nawa ntolino

⁵ tinuwumi banya ewa kaʼede ntinuwunya.

⁶ Ane ewanceʼe wenu painaka ndipepalisi waʼa ncalaaku? wenu painaka ndipeliʼosi waʼa ncalaku?

⁷ Kamonconya lawi ndiincani pai ndirata ndaya, yaku bareʼe masala, yaku monco. Ndiincani bereʼe mau sambaʼa tau anu mangkoto da malapasaka yaku ungka ri palemi.

⁸ Yaku ndalemo mpalemi, nunjaa tundainya ndigero yaku?

⁹ Neʼe ndikalingani yaku seʼi ndilemo ungka ri tana mapuyu! Wenu yaku ndipapewali awu?

¹⁰ Ndipapakotoka papaku mampapewali yaku, ndipapewongga yaku ri raya ngkompo ineku.

¹¹ Komi malemo koroku lau wuku pai ua; wukuku ndipatakaka sanga pai natonge mpela.

¹² Ndiwai katuwu ri yaku; ndipotowe yaku, inosaku ndijagai pai ndiporewu.

¹³ Paikanya seʼi-seʼi kuincanimo sangkasae seʼi ntano, ndiponjii-njiika reʼe tinako ndayami da mampakarugi yaku.

¹⁴ Nditundani yaku boi da reʼa salaa kupowia, da naka reʼe jaya ndipampetisala yaku.

¹⁵ Ane yaku mowia salaa da mapari kojo katuwuku! Paikanya ane powiaku bereʼe posarinya, ntongo ndireke yaku mowia salaa! Bareʼe kutaha mengoa, maka masusa pai kodi katuwuku.

¹⁶ Ane reʼe rasiku mau podo sakodi, ewa singa ndipaʼilawu yaku. Pai nditujuka muni yaku kuasami, podo ua da maekasi yaku.

¹⁷ Bareʼe bali-bali ndipokau nabi da maewa yaku; pai kakoteranga-rangani karau ndayami ri yaku. Ndipatikali waʼa ncurodado anu dawoʼu, da mampombetotoka pai mampoʼiwalika yaku.

¹⁸ Wenu painaka ndipapaliuka yaku ndapoana ri lino seʼi? Moruana kumatemo ri kabareʼepanya nakita ntau!

¹⁹ Da naka tongawa ewa bareʼepa reʼe ndapampoana yaku, maka ungka ri kompo ineku liu-liu ndapari dayo.

²⁰ Mewali, bareʼemo masae yaku da matemo, ndipapaliumo yaku ngkalioku, da naka kuleʼo yau mampoyoweka tempo anu reʼepa yau seʼi.

²¹ Bareʼemo masae yaku da malai pai bareʼemo da mewalili mantotoka tana anu wani pai bareʼe madago,

²² tana anu mawengi, napeari limbayo anu bareʼe tumotoa, njairia mareme siwia pai wani.”