Palaong mPomakau i mPue Yesu 9 - Sura Magali Nuntu Ngkatuwu

Kajea i Ncaulu 9:1-19a

¹ Sindara setu i Saulu ntongo mampari-mpari maduduki pai majeani pai da mampepate waʼa anaguru i Yesu. Njoʼumo siʼa ri tadu mpanyomba bangke,

² mamperapi sura parenta da naka njoʼu siʼa mampomberataka waʼa ntadulako banua mpekakai nto Yahudi anu njau ri Damasi, da naka ane reʼe narata waʼa ntau anu meaya ri Yesu, da nasoko nepa nakeni ri Yerusale.

³ Ri raya mpelinjanya njoʼu ri kota Damasi, mosumo siʼa da jela njairia, tingkarasaka nasindi ngkilaya ungka ri yangi i Saulu.

⁴ Manawu ri tana siʼa, nepa nadonge oni nganga anu mantoʼoka siʼa, “Saulu, Saulu! Makuja painaka nujeani Yaku?”

⁵ Meoasi i Saulu natoʼo, “Isema Komi, Pue?” Mesono oni nganga setu natoʼo, “Yakumo I Yesu anu nujeani!

⁶ Paikanya seʼi-seʼi pembangumo, pesuamo ri kota. Njairia nepa da kutoʼoka siko nunjaa anu da nuwianaka.”

⁷ Waʼa ntau anu njoʼu sangkani-ngkani pai i Saulu, nakeni ngkajingki ndayanya bareʼe naincani mompau; maka nadonge ntau seʼe oni nganga setu paikanya bereʼe tau nakita.

⁸ Membangu i Saulu napapenaa matanya paikanya bareʼemo nakita bara nunjaa-njaa, maka butamo matanya. Mewali naninimo ntau seʼe siʼa mesua ri kota Damasi.

⁹ Tatogo ndeme kasaenya bareʼe nakita bara nunjaa-njaa, pai ri raya anu tatogo ndeme setu bareʼe liu-liu mangkoni bara manginu siʼa.

¹⁰ Ri Damasi reʼe sambaʼa anaguru i Yesu i Anania toʼonya. Ri pekitandayanya mompau i Pue ri siʼa ndatoʼoka, “Anania!” Mesono siʼa, “Seʼi yaku Pue!”

¹¹ Mompau i Pue ndatoʼo, “Kanjoʼumo seʼi-seʼi ri banua i Yudasi ri jaya anu ndapapotoʼo ‘Jaya Mayoa’. Peoasi njairia tau anu mampotoʼo i Saulu tau setu ungka ri kota Tarusu. Tau setu ntongo mpekakai.

¹² Pai ri pekita ndayanya, nakita sambaʼa tau i Anania toʼonya, rata mangadonco siʼa da naka yosa muni matanya.”

¹³ Mesono i Anania natoʼo, “Pue, mariamo kudonge napau ntau kono tau setu, ewambeʼi napaduduki pai napajeani waʼa ntau anu meaya ri Yerusale.

¹⁴ Pai seʼi-seʼi ratamo siʼa mangkeni sura kuasa ungka ri waʼa ntadulako ntadu mpanyomba da mancoko pura-pura tau anu meaya ri Komi.”

¹⁵ Paikanya ndatoʼo i mPue ri Siʼa, “Palaimo njoʼu! Maka siʼa roomo kupilisi da mamporiokoi Yaku, da naka siʼa mampobambarika Yaku ri waʼa ntopolamoa pai ri waʼa mokole pai ri waʼa nto Isaraeli woʼu.

¹⁶ Pai Yaku ngkalioku da mampapakitaka siʼa waʼa ngkapari anu da naepe ua mamponcuruka Yaku.”

¹⁷ Njoʼumo kojo i Anania ri banua setu jela njairia nadonco i Saulu natoʼo, “Kasangkompoku Saulu! I Yesu anu nukita ri jaya setu sindara mpelinjamu maʼi ireʼi, Siramo woʼu anu mampokau yaku maʼi ri siko da naka yosa muni matamu pai da nakuasai Inosa mPue Ala siko.”

¹⁸ Liu-liu manawu salaputi anu maompo ogu matanya, yosamo muni peolenya. Membangu siʼa liu-liu ndariu.

^19a Roo mangkoni siʼa naepe maroso muni koronya.

I Saulu mompaguru ri Damasi 9:19b-25

^19b Reʼe bara sangkuja ndeme kasaenya i Saulu maroo-roo sangkani-ngkani pai waʼa anaguru i Yesu anu ri Damasi.

²⁰ Njoʼumo siʼa ri waʼa banua mpekakai, natepuʼumo mampobambarika kono I Yesu inceʼemo Ana mPue Ala.

²¹ Jingki raya ntau madonge potuntu i Ncaulu, natoʼo ntau seʼe, “Ara banya siʼamo seʼi anu roo mampepate pura-pura waʼa ntau anu meaya ri Yesu ri Yerusale? Kajelanya ireʼi seʼi da maʼi mancoko waʼa ntau meaya pai da nakeni ri tadulako waʼa ntadu mpanyomba!”

²² Paikanya kako tenoʼo raya ntau ri Saulu. Maka waʼa ntotorakanya kono i Yesu paka mesua ri nawa-nawa ntau seʼe anu mantoʼo i Yesu inceʼemo Mokole Tadungkadago. Painaka waʼa nto Yahudi ri Damasi bareʼemo nakoto mancapu.

²³ Butu masae-saemo sakodi, naposintuwuimo waʼa nto Yahudi da mampepate i Saulu.

²⁴ Paikanya tinako ndaya ntau seʼe naincani i Ncaulu. Ri eo ri wengi natundani ntau seʼe i Saulu ri boboka bente da napampepate.

²⁵ Paikanya ri anu sambengi natima waʼa anagurunya i Saulu, nepa nauyu ntau seʼe siʼa ri karanji tudu ri sambaliku bente.

I Saulu ri Yerusale 9:26-31

²⁶ Kanjoʼunya ri Yerusale, njairia siʼa mampari-mpari da napaleʼo mompasangkani-ngkani pai waʼa anaguru i Yesu. Paikanya napokaeka ntau seʼe siʼa, maka bareʼepa naaya ntau seʼe kamonconya siʼa mewalimo anaguru i Yesu.

²⁷ Paikanya maʼimo i Baranaba madadu siʼa nepa nawawanaka momberata pai waʼa ncuro. Napatuntumo i Baranaba ewambeʼi pangkita i Ncaulu i Yesu ri tongo njaya, pai ewambeʼi pompau i Yesu ri siʼa. Napau woʼu i Baranaba kono ewambeʼi kakoje i Ncaulu mompaguru ri Damasi ri toʼo Yesu.

²⁸ Ungka lairia maroo-roomo siʼa sangkani-ngkani pai waʼa ncuro setu, makoje rayanya motuntu ri samalele Yerusale mampobambarika toʼo i mPue.

²⁹ Mompau-mpau pai mombebali-bali siʼa pai waʼa nto Yahudi anu mobasa Garika, paikanya napepali ntau seʼe jayanya da mampepate siʼa.

³⁰ Jabutu naincani waʼa ntau meaya kareʼenya tinako ndaya ntau anu majaʼa setu, napoyunumo ntau seʼe i Saulu rata ri Kaisaria nepa napokau ntau seʼe siʼa njoʼu ri Tarusu.

³¹ Mewali rodomo raya waʼa anggota dompu i mPue ri samalele ntana Yudea, Galilea pai Samaria; ua popanini Inosa mPue Ala mewonggamo katuwu dompu, kakoteranga-rangani imba ntau seʼe, maka tau seʼe tuwu ri pampokaeka i Pue.

I Peturu ri lipu Lida pai Yope 9:32-43

³² I Peturu maliliwungi dompu i mPUE ri mbeʼi-mbeʼi kareʼenya. Ri anu sandeme ratamo siʼa mampeole dompu i mPue anu reʼe ri lipu Lida.

³³ Njairia siʼa momberata pai tuama sambaʼa i Enea toʼonya. Uayu ntaʼumo kapungkunya jamo moturu-turu ri langka ngkayore bareʼemo nakoto membangu.

³⁴ Natoʼo i mPeturu ri Enea, “I Yesu Kerisitu mampakaʼosa siko. Pembangu pakoroka parewa ngkayoremu.” Liu-liu membangu i Enea.

³⁵ Pangkita waʼa ntau ri Lida pai Saroni kaʼosamo i Enea, meayamo tau seʼe pura-pura ri Pue.

³⁶ Ri lipu Yope lau sambaʼa weʼa i Tabita toʼonya, siʼa sambaʼa tau meaya ri Yesu. (Toʼonya ane ri basa Garika i Dorokasi anu posokinya lagiwa.) Maria powianya anu madago mantulungi waʼa ntau kaasi-asi.

³⁷ Tempo setu siʼa majuʼa pai napowailiu mate. Roo ndariu wata ngkoronya nepa nadika ntau seʼe ri lincu anu ri wawonya.

³⁸ Lipu Yope mombemosu pai lipu Lida, napokau ntau seʼe tau radua ndeku mantoʼoka i Peturu patuu anu ewaseʼi katetoʼonya, “Ndipakaliga madadu kami!”

³⁹ Meoko i Peturu nalulu tau anu maʼi mampeboo siʼa, kajelanya njairia ndapoyunu siʼa ri lincu anu ri wawonya. Nalimbumo waʼa mbeʼa bemba i Peturu. Tau seʼe motumangi, natujumo ntau seʼe waʼa baju pai waʼa juba anu ndajauka tau seʼe ntongo tuwupa i Dorokasi.

⁴⁰ Napokau i mPeturu tau seʼe pura-pura mesuwu, nepa mombukotu siʼa mekakai. Roo mekakai nepa nasuaraki wata ngkoro i Dorokasi natoʼo, “Tabita pembangu!” Menaa mata i Dorokasi, butu nakita i Peturu, membangu motunda siʼa.

⁴¹ Nakekeni i mPeturu palenya, napapekakore siʼa. Nepa napeboo i mPeturu waʼa ntau meaya njairia sangkani pai waʼa mbeʼa bemba, nepa napepombaika ri tau seʼe i Dorokasi anu tuwu muni.

⁴² Tebambarimo anu mewali setu ri sandaya lipu Yope, painaka maria tau meaya ri Yesu ka-Siranya Mokole Tadungkadago ntau seʼe.

⁴³ Bara tesangkuja ndeme woʼu karoo-roo i mPeturu njairia, siʼa melinggona ri banua to poronu pela i Simo toʼonya.