Palaong mPomakau i mPue Yesu 8 - Sura Magali Nuntu Ngkatuwu

^1a Pai i Saulu mawongko woʼu rayanya ua pepepate setu.

I Saulu majeani dompu 8:1b-3

^1b Ri reme setu seʼe, natepuʼumo ntau maduduki dompu ri Yerusale painaka waʼa ntau meaya, sangadika waʼa ncuro tewuraga ri sambawo ntana Yudea pai Samaria.

² Waʼa ntau anu mampokaeka i Pue Ala inceʼemo anu mampotaumate wata ngkoro i Ncetepanu, tau seʼemo anu mantangisi siʼa ri kapari ndaya ntau seʼe.

³ Paikanya i Saulu mampari-mpari da maʼopisaka waʼa anggota dompu setu, nasuaki waʼa banua ntau meaya, nanoʼo ri sambalikunya waʼa ntau meaya setu nepa napari ntarunggu.

Nuntu ngKatuwu ungka i Pue Ala ndapobambarika ri Samaria 8:4-25

⁴ Waʼa ntau meaya anu tewuragamo ungka ri Yerusale mampetumbu Nuntu ngKatuwu ungka ri Pue Ala ri mbeʼi-mbeʼi kanjoʼunya.

⁵ I Pilipu njou ri kota Samaria, njairia siʼa mampobambarika ri waʼa ntau kono Mokole Tadungkadago anu ndajanji i mPue Ala.

⁶ Padonge ntau seʼe pompau i mPilipu pai nakita woʼu ntau seʼe waʼa tanda ngkuasa anu napowia, maria tau anu mampokono mampedongeka totoraka i mPilipu.

⁷ Maka waʼa inosa majaʼa anu mesuwu ungka ri waʼa ntau anu napesuaki, mekiu-kiu nepa napalaika waʼa ntau setu. Waʼa ntau anu pungku pai anu dingge maria anu napakaʼosa.

⁸ Maʼai kojo kawongko ndaya ntau ri kota Samaria.

⁹ Ri kota setu reʼe sambaʼa tuama i Simo toʼonya, masae-saemo kareʼenya njairia mampaka jingki raya ntau njairia pai paincaninya mowalia. Natoʼoka waʼa ntau, siʼa sambaʼa tau anu maria paincaninya.

¹⁰ Painaka pura-pura tau ri raya ngkota setu montepuʼu ungka ri ananggodi nakarataka ri waʼa ntau tuʼa mangaunde siʼa natoʼo, “Tau seʼi inceʼemo roso mPue Ala anu ndatoʼo ‘Kuasa anu Bangke’ setu.”

¹¹ Masaemo kojo siʼa mampakatontoa raya waʼa ntau njairia ua roso mbalianya, painaka maʼai katenoʼo raya ntau ri siʼa.

¹² Paikanya i Pilipu mampetumbuka tau seʼe Nuntu ngKatuwu, kono da ndapampatunda Poparenta i mPue Ala pai kono i Yesu Kerisitu Mokole Tadungkadago. Naayamo ntau seʼe Nuntu anu napetumbu i mPilipu – mekiriu tau seʼe waʼa ntuama pai waʼa mbeʼa.

¹³ I Simo ngkalionya woʼu meayamo. Karoonya ndariu siʼa, nalulu mpaliu i Pilipu. Waʼa ntanda ngkuasa anu napowia i mPilipu napojingki ndaya i Ncimo mangkita.

¹⁴ Nadonge waʼa ncuro ri Yerusale kono peayamo nto Samaria ri nuntu i mPue Ala. Inceʼe painaka napokau ntau seʼe i Peturu pai i Yohane njoʼu njairia.

¹⁵ Karata i mPeturu pai i Yohane njairia, napekakaika ntau seʼe to Samaria da naka marata Inosa mPue Ala.

¹⁶ Maka Inosa mPue Ala bareʼepa natarima ntau seʼe, ua tau seʼe nepa ndariu ri toʼo Yesu.

¹⁷ Nadonco i mPeturu pai i Yohane tanoana nto Samaria, nepa natarima ntau seʼe Inosa mPue Ala.

¹⁸ Nakita i Ncimo pewalinya ewanceʼe, ua popadonco waʼa ncuro ri wawo ntanoana ntau seʼe painaka tau seʼe marata Inosa mPue Ala. Painaka njoʼu siʼa madadu i Peturu pai i Yohane, nawaika tau seʼe doi,

¹⁹ natoʼo, “Ndiwaika yaku woʼu kuasa setu, da naka isema ntano anu kudonco tanoananya, tau setu da marata Inosa mPue Ala.”

²⁰ Paikanya mesono i Peturu, “Nakageromo siko sangkani pai doimu setu! Nusarumaka pombai i mPue Ala maya da nuolika doi?

²¹ Bareʼe sintempo siko da malulu tetala mami, maka bareʼe mayoa rayamu ri Pue Ala.

²² Inceʼe painaka kajeamo ungka ri kajaʼamu setu pai pekakaimo ri Pue Ala da naka tuarapa bareʼemo ndakitanaka salaamu pai nawa-nawamu anu jaʼa setu.

²³ Maka kuincani rayamu buke pai sina ndaya pai siko napowatuamo i majaʼa.”

²⁴ Natoʼo i Ncimo ri Peturu pai i Yohane, “Nditulungi ndipekakaika yaku ri Pue Ala da naka neʼe mewali ri yaku pindongo waʼa anu nditoʼo roo.”

²⁵ Roo mawai posabi pai mampetumbu nuntu i mPue, mewalili muni i Peturu pai i Yohane ri Yerusale. Pai ri pelinja ntau seʼe napobambarika Nuntu ngKatuwu ri waʼa lipu nto Samaria anu kono napoliu.

I Pilipu pai tau bangke lantinya ungka ri Etiopia 8:26-40

²⁶ Mompau sambaʼa malaʼeka i mPue ri Pilipu natoʼo, “Palaimo pakaliga! Tondo Selata kanjoʼumu, lulumo jaya ri oyo Yerusale pai Gasa.” Ri jaya setu bereʼe tau.

^27-28 Malaimo kojo i Pilipu. Tempo setu reʼe sambaʼa pegawai ri langkanae Etiopia ntongo mpelinja da mewalili ri tananya. Tau setu sambaʼa tau bangke anu ndasarumaka majagai aga-aga i Kandake, datu weʼa ri Etiopia. Tau setu mewalilimo ungka ri Yerusale ndeku manyomba ri Pue Ala, pewalilinya seʼe siʼa meʼulaya ri karetanya. Ri raya ngkareta setu siʼa ntongo mabasa Sura i Nabi Yesaya.

²⁹ Natoʼo Inosa mPue Ala ri Pilipu, “Akomo njoʼu timosuki kareta setu.”

³⁰ Njoʼumo kojo i Pilipu, nadonge i mPilipu tau setu ntongo bahasa Sura i Yesaya. Napeoasi i mPilipu ri siʼa, “Bara ndirata ndaya anu ndibasa setu?”

³¹ Mesono tau setu, “Ewambeʼi da kuparata ndaya ane bereʼe tau anu mantotoraka yaku?” Nepa nasale i Pilipu mepone ri karetanya motunda sangkani-ngkani pai siʼa.

³² Nuntu anu nabasa seʼe ewaseʼi katetoʼonya, “Sira ndakeni ewa bimba anu da ndasambale, ewa ana bimba anu bareʼe membee ane ndagunci wuyunya ewanceʼemo Sira bareʼe da mompau sako sapiu.

³³ Sira ndapetikodi pai ri Sira ndapapakoyoka pobotusi anu bareʼe mayoa. Inosa-A ndayali ungka ri lino, painaka bareʼe reʼe mau sambaʼa tau anu mangkoto da mampau kono muli-Nya.”

³⁴ Natoʼo tau bangke ungka ri Etiopia setu ri Pilipu, “Koisa toʼoka yaku isema anu natinako ndaya nabi seʼi? Koronya ngkalionya bara kono tau ntaninya?”

³⁵ Natepuʼumo i mPilipu mantotoraka; siʼa mantotoraka waʼa anu nabasa ntau setu mewali jaya pantepuʼunya mampobambarika Nuntu ngKatuwu kono i Yesu ri tau bangke setu.

³⁶ Bareʼe masae pelinja ngkareta setu jelamo tau seʼe ri kareʼe ue, natoʼo mpegawai setu ri Pilipu, “Ireʼi reʼe ue bara madago ndiriumo yaku?” [

³⁷ Mesono i Pilipu, “Ane ndiayamo kojo ungka ri rayami, mayamo komi ndariu.” Mesono pegawai setu, “Kuaya kojo i Yesu Kerisitu Ana i mPue Ala.”]

³⁸ Napokau ndapapeʼonto karetanya nepa menaʼu tau seʼe radua, i Pilipu pai pegawai setu, menaʼu ri ue; pai i Pilipu mariu siʼa.

³⁹ Pesore ntau seʼe ungka ri ue, i Pilipu nakenimo Inosa mPue Ala ungka njairia. Bareʼemo nakita mpegawai ungka ri Etiopia setu siʼa. Napaliumo mpegawai ungka ri Etiopia setu pelinja maʼai kawongko ndayanya.

⁴⁰ Bareʼe ndapasoro-soro ndakitasaka i Pilipu njaumo ri lipu Asido. Melinja woʼu siʼa mampetumbu Nuntu ngKatuwu kono i Yesu Kerisitu ri pura-pura kota rantani rata siʼa ri Kaisaria.