Palaong mPomakau i mPue Yesu 6 - Sura Magali Nuntu Ngkatuwu

Pampilisi papitu toporioko 6:1-7

¹ Kakoteranga-rangani imba ntau anu malulu i Yesu. Sindara setu waʼa nto Yahudi anu melulu ri Yesu anu mobasa Garika, malente raya ntau seʼe ri waʼa nto Yahudi mpuʼu. Maka natoʼo ntau seʼe anu mobasa Garika, “Waʼa mbeʼa anu bemba ri oyo mami bareʼe wungka ri ndapantila-ntila petulungi anu da nakatuwuka sandeme-sandeme ewa anu roomo ndatilaka waʼa ntau.”

² Inceʼe puʼunya painaka napasambaka ncuro anu sampuyu pai radua setu waʼa ntau pura-pura anu melulumo setu nepa natoʼoka tau seʼe, “Bareʼe madago ane da teʼonto pampobambarika mami nuntu i mPue Ala ua tepasalero ri pampasilolongani pangkoni.

³ Mewali, moruana waʼa ngkasangkompo da ndipilisi ri oyomi papitu tau anu tetubunaka pai anu napeari Inosa mPue Ala pai anu loʼe. Tau seʼe da ndipapakoyoka tetala mampasilolongani pangkoni.

⁴ Maka kami seʼi podo mampari-mpari mekakai mampobambarika nuntu i mPue Ala.”

⁵ Pura-pura tau seʼe sintuwu ri totoraka waʼa ncuro setu. Nepa napilisi ntau seʼe i Setepanu, siʼa sambaʼa tau anu meaya kojo ri Yesu anu buke pai Inosa mPue Ala. Ewanceʼe napilisi ntau seʼe i Pilipu, i Porokoru, i Nikano, i Timoni, i Paramena, i Nikolau ungka ri Antiokia, siʼa banya to Yahudi paikanya mesuamo agama Yahudi.

⁶ Tau papitu setu napepombaika ntau seʼe ri waʼa ncuro. Nepa mekakai waʼa ncuro setu ri Pue mamperapi popadonco tila waʼa ntau papitu setu.

⁷ Ewanceʼemo kakotebambarimo nuntu i mPue Ala pai kakoteranga-ranganimo woʼu imba ntau anu meaya ri Yesu ri Yerusale. Maria woʼu tadu mpanyomba anu meayamo ri Yesu.

I Setepanu ndasoko 6:8-15

⁸ Tongawa kojo padonco i mPue Ala i Setepanu, maria tanda ngkuasa pai powia anu ndapojingki napowia ri oyo ntau sondo.

⁹ Paikanya reʼe waʼa ntau anu maewa siʼa, inceʼemo waʼa ntau anggota ri banua panyomba anu ndatoʼo Banua mPekakai waʼa ntau Maradeka. Waʼa anggota ri banua mpekakai setu inceʼemo waʼa nto Yahudi anu ungka ri Kirene pai Alesanderia, tau seʼe sangkani pai waʼa nto Yahudi anu ungka ri Kilikia pai Asia mombebali-bali pai Setepanu.

¹⁰ Paikanya bareʼe nakoto ntau seʼe mancapu nunjaa anu natoʼo i Ncetepanu maka Inosa mPue Ala anu mawai loʼe ndaya ri siʼa da mompau.

¹¹ Inceʼe puʼunya painaka nasaro ntau seʼe bara tesangkuja tau da mantoʼo, “Kami madonge tau setu mampetikodi i Musa pai i Pue Ala.”

¹² Ewanceʼemo napantundeki ntau seʼe waʼa ntau sondo pai waʼa ntadulako nto Yahudi sangkani pai guru agama. Njoʼumo tau seʼe mancoko i Setepanu, nepa nakeni ri suara Majalisi Agama.

¹³ Nakeni ntau seʼe waʼa ncabi anu kambamba-mbamba da mawai posabi mbamba kono i Setepanu. Natoʼo waʼa ncabi setu, “Tau seʼi bareʼe bali-bali mampetikodi Banua i mPue anu magali, pai mampetikodi songka mPue Ala anu naparata i Musa.

¹⁴ Kami madonge pantoʼonya, kono i Yesu to Nasare da magero Banua i mPue pai da mabalisaka ada anu napatunda i Musa ri kita!”

¹⁵ Pura-pura tau anu njau ri pogombo Majalisi Agama setu meole ri Setepanu. Pai lio i Ncetepanu ri tempo setu ndakita ewa potaʼa lio malaʼeka.