Palaong mPomakau i mPue Yesu 28 - Sura Magali Nuntu Ngkatuwu

Ri Malita 28:1-10

¹ Jelamo kami ri karatana, nepa kaincani togongi setu Malita toʼonya.

² Waʼa ntau ri togongi setu pande mporaya ri kami. Madago napangkoho kami pura-pura, natawuika kami apu kapaneru, maka maranindi raoa pai tudumo woʼu uja.

³ Njoʼu i Paulu mampasambaka rangka-rangka ngkaju ndatambuka apu. Sindara mpawianakanya inceʼe mesuwumo sambaʼa ule jalimoʼo ua maepe karameda apu setu natungku pale i mPaulu.

⁴ Pangkita ntau njairia ule setu moloe-loe ri pale i mPaulu, natoʼoka kasiyununya, “Manoto tau setu topopepate, maka mau lapamo siʼa ungka ri rugi ri tasi, bareʼe napapaliuka i Lamoa ngKayoa siʼa da tuwu mpaliu.”

⁵ Paikanya nawebusaka i mPaulu ule setu ri apu pai bareʼe naepe majuʼa sako sakodi.

⁶ Nasarumaka ntau seʼe sakodipa tempo da mewoke pale i mPaulu pai da madungka ncoroba siʼa liu-liu mate. Paikanya jamasaemo popea-pea ntau seʼe bereʼe anu ndapojingki mewali ri Paulu. Tebalisaka nawa-nawa ntau seʼe natoʼo manoto i Paulu setu sambaʼa lamoa.

⁷ Bareʼe lawa ungka njairia reʼe salimpu tana anu napotumpu i mPubeliu, siʼamo tadulako ntau ri togongi setu, mabuya rayanya mampolinggona kami tatogo ndeme.

⁸ Sindara setu papanya ntongo ngkajuʼa nawembe seʼi majuʼa komponya. Ndeku i Paulu mampeole papanya anu majuʼa setu, napekakaika nepa nadonco, osamo juʼanya.

⁹ Ua pewalinya ewanceʼe painaka pura-pura tau anu majuʼa ri togongi setu maʼi madadu i Paulu, napakaʼosa i mPaulu tau setu pura-pura.

¹⁰ Maria pombai ntau seʼe nawawaka kami, pai ri tempo da mposumomba mami ungka njairia, nakeni ntau seʼe ri kapala gana-gana anu da kapake ri posumomba mami.

Ungka ri Malita njoʼu ri Roma 28:11-15

¹¹ Pusamo tatogo mbuya kasaenya nepa mosumomba kami ungka ri togongi setu, kami meʼulaya ri sambaʼa kapala anu ungka ri Alesanderia anu mesonda njairia ri tempo ngkaranindinya. Kapala setu mampake bandera “Lamoa Morapi i Kasitori pai i Polukisi”.

¹² Mesonda kami ri Sirakusa, metaʼa-taʼa njairia tatogo ndeme.

¹³ Ungka njairia mosumomba woʼu kami mosanca-sanca ri wiwi ntasi togongi setu rantani rata kami ri kota Regiu. Bangke reme mewuimo ngoyu Ncelata, painaka radua ndemeja ratamo kami ri kota Putioli.

¹⁴ Njairia simpadopa kami pai bara tesangkuja tau anu meayamo ri Yesu, pai ua napeboo ntau seʼe, maroo-roo kami njairia saminggu kasaenya pai tau seʼe. Nepa malai kami ndeku ri Roma.

¹⁵ Waʼa ngkasangkompo ri Roma anu meayamo ri Yesu, nadongemo bambari kono kami, painaka maʼi tau seʼe mantomu kami rata-rata ri Pasari Apiu pai Pasanggaraha Tatogo. Pomberata i mPaulu pai tau seʼe naunde kapuru ndaya mPue Ala pai marosomo raya ntau seʼe.

Ri Roma 28:16-31

¹⁶ Kajela i mPaulu ri kota Roma, siʼa ndadika maroo-roo ngkalionya pai sambaʼa surodado majagai.

¹⁷ Pusa tatogo ndeme, napeboo i mPaulu waʼa ntadulako nto Yahudi mompasambaka, mompau i Paulu ri tau seʼe natoʼo, “Ee waʼa ngkasangkompoku bereʼe sala kupowia ri bancata, bareʼe kuewa waʼa ada ngkatuwuta anu tarata ungka ri tau piamota. Paikanya mau ewanceʼe nasoko ntau seʼe yaku ri Yerusale nepa napepombaika yaku ri waʼa nto Roma.

¹⁸ Butu ndaparesa kara-karaku seʼe, kamonconya da nalapa muni ntau seʼe yaku, maka tongawa bereʼe salaku anu da ndahukuka yaku, da ndahuku mate.

¹⁹ Paikanya ua naewa waʼa nto Yahudi pura-pura setu, bareʼemo reʼe jaya ntaninya, kuperapi da naka kara-karaku seʼi da ndabotusi i Datu ri Roma. Powiaku ewanceʼe banya bara reʼe anu da kupogiluka ri Datu kono bancaku ngkalioku.

²⁰ Inceʼe puʼunya painaka kuperapi da momberata pai komi pura-pura, da mompasimbaju pai komi; maka yaku ndapungu ua kumamponcuruka Tadungkadago anu napomata-mata nto Isaraeli.”

²¹ Natoʼo ntau seʼe ri siʼa, “Bareʼepa reʼe sura anu karata ungka ri Yudea mangkono siko. Pai bareʼepa reʼe tau anu rata ungka njairia mampetumbu bambari kono siko, bara mampau anu majaʼa kono siko.

²² Paikanya da raya mami woʼu madonge kono peaya ndayamu, maka kadonge waʼa ntau mamposari pompaguru anu nukekeni setu.”

²³ Napakanotomo ntau seʼe pai Paulu eo da mpomberata pai tau seʼe. Ri eo setu maria tau anu rata ri kareʼe i mPaulu. Montepuʼu ungka ri mowuro nakarataka ngkinowia popatuntu i mPaulu mantotoraka pai mampobambarika ri tau seʼe ewambeʼi Pue Ala da moparenta ewa Mokole. Merontada ri bangani uki Ncura i Musa pai Sura waʼa Nabi, napari-pari kojo i mPaulu da naka meaya tau seʼe kono i Yesu.

²⁴ Reʼe tau anu maaya anu natoʼo i mPaulu, pai reʼe woʼu tau anu bareʼe maaya.

²⁵ Ri kabareʼenya siwia ponawa-nawa ntau setu, napalaika ntau seʼe i Paulu, ri karoonya natoʼo i mPaulu ri tau seʼe pau anu ewaseʼi katetoʼonya, “Lawi moncomo kojo nunjaa anu natoʼo Inosa mPue Ala mampoliu i Nabi Yesaya ri waʼa ntau piamomi!

²⁶ Ndatoʼo mPue Ala, ‘Kanjoʼumo toʼoka banca seʼi: Komi da medonge mpaliu, paikanya bareʼe ndirata ndaya; komi da mampatomata mpaliu paikanya bareʼe ndiincani nunjaa anu tepewali.

²⁷ Maka nawa-nawa banca seʼi makuyumo, talinga ntau seʼe bongomo pai mata ntau seʼe roo napobutaka. Inceʼi tepewali da naka mata ntau seʼe neʼe mangkita, talinga ntau seʼe neʼe medonge, nawa-nawa ntau seʼe neʼe marata ndaya, pai neʼe mewalili ri Yaku, nepa Yaku da mampakaʼosa tau seʼe.’ ”

²⁸ Kapusanya natoʼo i mPaulu, “Ee waʼa ngkasangkompoku sangaya-ngaya da ndiincani bambari kono katesorepaka ungka ri Pue Ala, seʼi-seʼi da ndapobambarikamo ri waʼa banca ntaninya anu banya to Yahudi. Tau seʼe da napedongeka!” [

²⁹ Pompau i mPaulu ewanceʼe malaimo waʼa nto Yahudi setu ungka ri kareʼe i mPaulu, seʼi mopaisomo tau seʼe pai yununya.]

³⁰ Rua ntaʼu kasaenya karoo-roo i mPaulu ri Roma ri banua anu nasaro ngkalionya. Mawongko rayanya mancabe tau anu maʼi madadu siʼa.

³¹ Pai makoje rayanya mampobambarika ri tau seʼe kono ewambeʼi i Pue Ala da moparenta ewa Mokole pai kono i Yesu Kerisitu. Potetala i mPaulu ewanceʼe bareʼe reʼe anu masalempori.