Palaong mPomakau i mPue Yesu 27 - Sura Magali Nuntu Ngkatuwu

Posumomba i mPaulu njoʼu ri Roma 27:1-12

¹ Kamabotunyamo kami da mosumomba njoʼu ri Italia, ndapepombaikamo i Paulu pai bara tesangkuja tau anu ndatarunggu ntaninya ri Yuliu tadulako ncurodado to Roma anu ndapapotoʼo “Resime i Datu”.

² Kami meʼulaya ri kapala ungka ri Aderamitiu, nepa mosumomba pai kapala setu anu lawi tikalimo da masumomba ri waʼa labua ri poropenci Asia. I Aritariku to Makedonia anu ungka ri Tesalonika mosumomba woʼu sangkani-ngkani kami.

³ Bangke reme rata kami ri Sidoni. I Paulu madago kojo na pangkoho i ntadulako Yuliu. Nawai tempo njoʼu momberata pai waʼa yununya da napawaika ntau seʼe bara nunjaa-njaa anu da napake.

⁴ Ungka njairia mosumomba mpaliu kami. Ua pewui ngoyu marimbo ungka ri dulungi, mosumombamo kami malulu wiwi ntasi togongi Kiperu, mampetatondoka ngoyu.

⁵ Nepa kalempo tasi mancuaramo Kilikia pai Pampilia, rantani towote kami ri Mira anu ri tana Likia.

⁶ Njairia narata i ntadulako setu sambaʼa kapala anu ungka ri Alesanderia anu da mosumomba ri Italia. Napapelimba kami ri kapala setu.

⁷ Reʼe bara tesangkuja ndeme kasaenya malengi mpodago posumomba mami, bareʼemo ndakoto mosumomba mantagodi labua ngkota Kenidu. Ungka lairia ntongo bareʼepa madago pewui ngoyu, bareʼe kakoto mosumomba mantotoka labua anu roomo ndapakanoto. Painaka mosumomba kami ri tondo Selata togongi Kareta maliu tando Ncalumona, mampetatondoka ngoyu.

⁸ Mapari kojo posumomba mami malulu wiwi ntasi togongi setu nepa towote kami ri sambaʼa labua anu ndapapotoʼo, ‘Sompoa Meawa’. Bareʼe ntani lawa ungka ri kota Lasea.

⁹ Ri tempo setu liumo Eo mPosusa ngKasimadago nto Yahudi. Mariamo tempo mami anu tetaji ngkabongo, maka banyamo turonya da kadago mposumomba. Inceʼe puʼunya painaka natotoraka i mPaulu tau seʼe natoʼo,

¹⁰ “Ee waʼa ngkasangkompo malulu parata ndayaku, da maria kapari anu da tapomberataka ane mosumomba mpaliu kita. Maria rugi bangke anu da tapomberataka, banya podo ulaya ngkapala seʼi paikanya inosata seʼe da tetaji.”

¹¹ Paikanya i tadulako ncurodado jama mpedongeka pau i ntopogulingi pai i Kapite, ngkapala painaka da mampedongeka pau i mPaulu.

¹² Lawi ri turo ngkaranindinya, labua setu bareʼe madago da pesonda ngkapala njairia. Inceʼe painaka kasondonya waʼa ntopotetala ri kapala setu mantangara ndaya da mosumomba mpaliu mampalaika labua setu pai da mampari-mpari naka jela ri Peniki, da maroo-roo njairia sangkasae turo ngkaranindinya. Peniki inceʼemo labua ri Kareta, anu mancuaraki kasoyo ndeme.

Balumba ntasi 27:13-38

¹³ Ri tempo setu pewui ngoyu ncelata bareʼe marimbo. Painaka nasarumaka ntau ri kapala da ndakotomo mosumomba mpaliu. Mewali naoremo ntau seʼe randa ngkapala nepa mosumomba mampamiwi wingke ntasi togongi Kareta.

¹⁴ Paikanya bareʼe masae mewuimo ngoyu marimbo – anu ndapapotoʼo Ngoyu Mosompo – mewakuu ungka ri karatana,

¹⁵ narumpa kapala mami, bareʼemo liu-liu madago da mosumomba mpaliu mantomu ngoyu, painaka bareʼemo reʼe jaya ntaninya, jamo ndapapaliu kaandu ngkapala nakeni ngoyu.

¹⁶ Ri kapaliu naka togongi Keluda, tondo selata sambaʼa togongi anu kodi-kodi tompero yau sakodi. Njairia kapoli yau mau mapari-pari seʼe mangkuasai kapala mampapepone sikoci ri kapala.

¹⁷ Roo ndasawinaka sikoci setu ri raya ngkapala, nepa kasalabengika koloro kapala setu boi tebowo. Ipu raya mami boi rampe kapala mami ri Sirite, katurubaka somba pai ndapapaliukamo nakaandu ri mbeʼi napawui ngoyu.

¹⁸ Ua marimbo gaga pewui ngoyu, ri kabangke ndemenya ndatepuʼumo mantajika ri tasi waʼa ulaya ngkapala.

¹⁹ Ri eo tondanya natajika woʼu ntopotetala ri kapala waʼa mparewa ngkapala ri tasi.

²⁰ Maria ndeme bareʼemo kakita ogu eo pai betuʼe, seʼi ngoyu kako maʼai-ai karimbo mpewuinya. Bemoreʼe nawa-nawa mami mantoʼo da tuwu.

²¹ Bara tesangkuja ndememo waʼa ntau setu bareʼemo mangkoni. Mekakore i Paulu ri oyo ntau seʼe natoʼo, “Ee waʼa ngkasangkompo! Ane ndipedongeka pauku mantoʼo neʼe mosumomba ungka ri Kareta bareʼe da tapomberataka waʼa mpari pai rugi seʼi.

²² Paikanya mau ewanceʼe, seʼi-seʼi kuperapi da naka ndipakaroso rayami. Kita seʼi bareʼe da reʼe anu da malatu; podo kapala seʼi anu da paya.

²³ Maka sambengi ngena i Pue Ala anu kupanyomba mampokau malaʼeka rata ri yaku, i Pue Ala anu mampotumpu yaku.

²⁴ Natoʼo malaʼeka setu ri yaku, ‘Neʼe maeka Paulu! Maka siko sangaya-ngaya da mombesuara pai Datu. Pai ua kapuru ndaya i mPue Ala ri siko, painaka pura-pura tau anu mosumomba pai siko da tesorepaka ua siko.’

²⁵ Mewali waʼa ngkasangkompo da ndipakaroso rayami! Maka kuaya i Pue Ala, pai pura-pura anu ndaparata ri yaku inceʼe anu da mewali.

²⁶ Paikanya kita da terampesaka ri sambaʼa togongi.”

²⁷ Ri wengi kasampuyu pai aoponya kapala mami teandu-andusaka ri tasi Aderia. Tempo-temponya ntongo mbengi nasarumaka waʼa ntopotetala ri kapala mosumo karatana.

²⁸ Mewali nauyu ntau seʼe koloro ndasoʼoka watu da mantubu kayombu ntasi, narata ntau seʼe mosu aopo mpuyu meteri kayombunya, bareʼe masae nauyu koloro mpontubu setu, narata ntongo sampuyu pai alima meteri kayombunya.

²⁹ Maeka raya ntau seʼe boi rampe ri roka mbatu kapala setu, napapenaʼu ntau seʼe aopo randa ri periboko ngkapala da mantaʼamaka, napomata-mata tuarapa da naka ronga mareme.

³⁰ Ntanoka waʼa ntopotetala ri kapala setu da mampalaika ngkaroo kapala setu. Tau seʼe mokira-kira ewa mauyu randa ri dulungi ngkapala ntanoka mauyu sikoci.

³¹ Paikanya mompau i Paulu ri tadulako ncurodado pai waʼa ncurodado anu lau ri kapala setu natoʼo, “Waʼa ntopotetala ri kapala ane bareʼe maroo-roo komi ri kapala seʼi komi bareʼe da tesorepaka.”

³² Painaka natompo waʼa ncurodado wayaa ncikoci setu, painaka maandu sikoci setu.

³³ Bareʼepa mowinangkasi reme, naiowaka i mPaulu tau seʼe pura-pura da mangkoni, natoʼo i mPaulu, “Sampuyu pai aopo ndememo kasaenya komi pura-pura podo mopea-pea ri kaʼipu ndaya nunjaa anu da mewali, bareʼe ndipokono mangkoni bara nunjaa-njaa seʼi maoro kompomi.

³⁴ Kuʼiowaka komi ndipangkonika sakodi. Inceʼe madago waʼa ngkasangkompo da naka reʼe muni rosomi. Maka komi pura-pura sangaya-ngaya da tesorepaka bareʼe da malatu.”

³⁵ Roo mompau ewanceʼe natima i mPaulu roti nepa naunde i Pue Ala, mekakai siʼa ri suara ntau setu pura-pura. Roo mekakai nepa natila-tila roti setu mangkonimo tau seʼe.

³⁶ Maroso muni raya ntau setu pura-pura pai mangkonimo woʼu.

³⁷ Imba ntau seʼe anu lau ri kapala setu rua atu pitumpuyu pai aono tau.

³⁸ Roomo mangkoni pura-pura, nanawusi ntau seʼe waʼa gandu ulaya ngkapala setu ri tasi, da naka mangaʼa kapala.

Kasore ngkapala 27:39-44

³⁹ Butu marememo, nakitamo ntau ri kapala karatana paikanya bareʼepa naincani ntau seʼe toʼo ngkaratana setu. Nakita ntau seʼe suonya anu madago porangiʼinya. Natinako ndaya ntau seʼe ane nakoto da mampapesonda kapala njairia.

⁴⁰ Natomposi ntau seʼe waʼa mbayaa randa ngkapala, ndapapaliukamo waʼa randa setu nakalatu ri tasi. Ewanceʼe seʼe naledesi ntau seʼe waʼa mbayaa anu ndasoʼoka waʼa mpogulingi. Roo setu nepa naore ntau seʼe somba ri dulungi ngkapala, da naka ane mewui ngoyu da nakeni kapala setu njoʼu ri wingke.

⁴¹ Paikanya dulungi ngkapala setu sore ri rangiʼi, painaka bareʼemo molengko kapala setu, nakeni ngkarimbo pampogancika ndopo kapala setu marute peribokonya.

⁴² Natangara ndaya waʼa ncurodado setu da mampepate pura-pura tau ndahuku anu napoyunu ntau seʼe, maka ipu raya ntau seʼe boi monangu njoʼu ri karatana nepa molonco.

⁴³ Paikanya tinako ndaya waʼa ntau setu napetangani i ntadulako ncurodado maka ua da mancorepaka i Paulu. Nasongka pura-pura tau anu loʼe monangu da mosompo riunya ri tasi nepa monangu njoʼu ri wingke;

⁴⁴ anu ntaninya nepa metondaraka mekekeni ri dopi bara ri weso-weso ngkapala setu. Ewanceʼemo jayanya painaka kami pura-pura tesorepaka rata ri karatana.