Palaong mPomakau i mPue Yesu 26 - Sura Magali Nuntu Ngkatuwu

I Paulu mantuntu kamonconya ri suara i Ageripa 26:1-11

¹ Mompau i Ageripa natoʼoka i Paulu, “Seʼi ndawai tempo ri siko da mampau kamonconya.” Nalaenaka i mPaulu palenya nepa natuntu kamonconya natoʼo ewaseʼi,

² “Anu kutubunaka Sira Mokole Ageripa! Kuepe bangke kojo porasiku maka ndawai tempo ri yaku da mompau ri kamonconya ri suarami, kono petuluri waʼa nto Yahudi ri yaku;

³ pagonya komi ndiincani mpodago ada nto Yahudi pai anu maria ngkani naposisalai nto Yahudi. Inceʼe puʼunya da mabuya rayami mampedongeka pauku seʼi ri kasabara ndayami.

⁴ Pura-pura to Yahudi maincani ewambeʼi dede ngkatuwuku montepuʼu ungka ri kangalitauku yaku tuwumo ri oyo ntau seʼe ri Yerusale.

⁵ Masaemo napaincani ntau seʼe isema yaku. Pai lawi ane napokono ntau seʼe, nakoto mawai posabi ungka ri tepuʼunya katuwuku ewa sambaʼa to Parisi anu mepoʼinaya malulu waʼa ncongka anu maroso kojo ri agama mami.

⁶ Pai seʼi yaku mekakore ireʼi da ndabotusi ua kupangaaya pojanji anu ndapareʼe mPue Ala pai tau piamo mami.

⁷ Janji setumo anu napomata-mata ntau sampuyu pai radua lemba nto Isaraeli, painaka manyomba tau seʼe ri Pue Ala ri reme pai ri wengi. Ua kupangaaya janji setu Sira Mokole Ageripa anu kutubunaka, yaku napetisala waʼa nto Yahudi.

⁸ I wenu painaka komi waʼa ngkasangkompoku to Yahudi bareʼe ndiaya i Pue Ala anu da mampatuwu muni tau mate?

⁹ I owi yaku seʼi sambaʼa tau anu mampowia mpengaya-ngaya da maewa i Yesu to Nasare setu.

¹⁰ Pai inceʼe roomo kuwianaka ri Yerusale, mampokanta sura kuasa ungka ri waʼa ntadulako ntadu mpanyomba, maria waʼa ntau anu mepoʼinaya ri Pue Ala roo kupari ntarunggu. Kuposintuwui da naka waʼa ntau setu ndapepate.

¹¹ Maria ngkani yaku majeani waʼa ntau seʼe ri waʼa banua mpekakai, tau seʼe kuriso da naka mampesapuka peaya ndayanya. Makodi kojo rayaku ri waʼa ntau seʼe, painaka malai yaku maduduki tau seʼe ri kota ntaninya.”

Napau i mPaulu kanjoʼunya ri Damasi 26:12-18

¹² “Mampokanta sura ungka ri waʼa ntadulako ntadu mpanyomba yaku njoʼu ri Damasi.

¹³ Sindara yaku ri yae njaya, tempo-temponya ntongo ndeme, Sira Mokole anu kutubunaka, yaku mangkita sindi ngkilaya anu maʼai kojo, panangi sindi ndeme. Sindi ngkilaya mantolilimi yaku sangkani-ngkani pai tau anu moyunu pai yaku.

¹⁴ Kami pura-pura tedungka ri tana, nepa kudonge oni nganga anu mantoʼoka yaku ri basa Ibarani, ‘Saulu, Saulu, makuja nujeani mpaliu Yaku? Da nuepe ngkaliomu juʼamu, ane da nupowia mpaliu peewa ri Sira anu mewali Puemu!’

¹⁵ Mompau yaku kutoʼo, ‘I sema komi Pue?’ Mesono i Pue, ‘Yakumo i Yesu anu nujeani!

¹⁶ Pembangu, pekakore! Da Kupatongawa koro-Ku ri siko, siko da Kupapewali to porioko-Ku. Sangaya-ngaya da nupobambarika ri waʼa ntau nunjaa anu nukita sandeme seʼi kakononya Yaku pai pura-pura anu nepa da Kutujuka siko ri reme-reme anu nepa da rata.

¹⁷ Siko Kupilisi ungka ri waʼa lemba nto Isaraeli pai ungka ri lemba ntaninya anu banya to Yahudi. Siko da Kupokau njoʼu ri oyo ntau seʼe,

¹⁸ da mampapenaa mata ntau seʼe, da naka mesuwu tau seʼe ungka ri kuasa mbani pai da mesua ri kuasa ndeme, da naka tau seʼe telapa ungka ri kuasa i Majaʼa mesua ri Kuasa mPue Ala. Maka ane meaya tau seʼe ri Yaku waʼa ncalaanya bareʼemo da ndakitanaka, pai tau seʼe da mewali tau i mPue Ala anu ndapilisi.’ ”

I Paulu mantotoraka tetalanya 26:19-32

¹⁹ “Inceʼe painaka, Sira Mokole Ageripa anu kutubunaka, ewanceʼmo kupari-pari kojo mepoʼinaya ri pekita ndaya anu kuratamo ungka ri Pue Ala setu.

²⁰ Yonto-yonto kojo kupantoʼoka tau da naka tau seʼe da majea ungka ri waʼa ncalaanya pai da meaya ri Pue Ala pai da natuju kojo ri raya ngkatuwunya kamonco-monconya tau seʼe majeamo ungka ri waʼa ncalaanya. Inceʼe kupobambarika uyu-uyunya ri Damasi nepa ri Yerusale pai ri samalele ntana Yudea pai ri oyo waʼa ntau anu banya to Yahudi.

²¹ Inceʼe puʼunya painaka yaku nasoko waʼa nto Yahudi ri Banua i mPue, pai napari-pari ntau seʼe da mampepate yaku.

²² Paikanya nakarataka sandeme seʼi yaku ndakariani i mPue Ala, painaka kukoto mekakore ireʼi mamparata posabiku ri pura-pura – waʼa ntau anu bangke bara waʼa ntau anu kodi katuwunya. Nunjaa anu kupau seʼi bareʼe ntaninya ewa anu nawati waʼa nabi pai i Musa;

²³ inceʼemo i Mokole Tadungkadago anu ndajanji mPue Ala sangaya-ngaya da naepe kapari pai da mewali tau kaʼisa tuwu muni ungka ri kapate; da naka pewalinya ewanceʼe da nakoto mampobambarika reme – inceʼemo katesorepaka – tila nto Yahudi pai waʼa ntau anu banya to Yahudi.”

²⁴ Sindara ntongo mompaupa i Paulu mantuntu kamonconya setu, meboo i Pesitu natoʼo, “Wandomo siko Paulu! Paincanimu anu sondo setu mampakawando siko!”

²⁵ Paikanya mesono i Paulu natoʼo, “Yaku bareʼe wando Sira Anu Kutubunaka, ri waʼa mpau anu kupasowa setu monco moiwo ungka ri nawa-nawaku anu manoto.

²⁶ Mokole Ageripa anu kutubunaka, Sira ndaincani kojo anu kutoʼo roo. Inceʼe puʼunya painaka kutaha mompau ri kayonto-yontonya, kuaya kojo bereʼe mau sangaya anu bareʼe ndaincani Sira, maka pura-pura setu tongawa, bareʼe reʼe anu tesambuni.

²⁷ Sira Mokole Ageripa anu kutubunaka, bara ndiaya nunjaa njaa anu natoʼo waʼa nabi? Kuepe-epe Sira ndaaya!”

²⁸ Paikanya mesono i Ageripa natoʼoka i Paulu, “Nusarumaka saru-saru da mampapewali yaku to Kerisitu, ri tempo anu sarai seʼi?”

²⁹ Mesono i Paulu natoʼo, “Kupekakaika ri Pue Ala da naka komi Mokole pai komi pura-pura anu madongemo pauku sandeme seʼi da mewali ewa yaku – maliga bara masae, kusangadika rante pungu mpaleku seʼi!”

³⁰ Kapusanya meokomo i mokole i petoro, pai i Berenike pai pura-pura tau njairia meokomo.

³¹ Rata ri sambalikunya, mombembetoʼo tau seʼe natoʼo, “Tau seʼi bereʼe powianya anu da ndahukuka siʼa, da ndahuku mate bara da ndatarunggu.”

³² Natoʼo i Ageripa ri Pesitu, “Tau seʼi mau ndalapamo, ane rapanya bareʼe natunggai kara-karanya da ndapau ri pobotusi i Datu.”