Palaong mPomakau i mPue Yesu 25 - Sura Magali Nuntu Ngkatuwu

I Paulu ri suara i mPesitu 25:1-12

¹ Tatogo ndememo kajela i mPesitu ri daera setu, malai siʼa ungka ri Kaisaria ndeku ri Yerusale.

² Njairia jelamo woʼu waʼa ntadulako ntadu mpanyomba pai waʼa ntau tuʼa nto Yahudi mampetumbuka siʼa pogilu nto Yahudi kono i Paulu. Nakanarasi ntau seʼe i Pesitu,

³ da mantuju kabuya ndayanya ri tau da napampokau tau mangkeni i Paulu ndeku ri Yerusale; maka mabotumo gombo ntau seʼe da mampepate siʼa ntongo ri yae njaya.

⁴ Paikanya mesono i Pesitu, “I Paulu lau ndataʼamaka ri Kesaria, pai yaku bareʼe masae da mewalili muni njairia.

⁵ Mewali, mbolimo waʼa ntau anu ndatubunaka ri oyomi da loʼu sangkani-ngkani pai yaku nepa da ndabotusi lairia ane lawi reʼe salanya anu napowia.”

⁶ Bara uayu ndeme bara sampuyu ndeme karoo-roo i mPesitu ri Yerusale nepa mewalili siʼa ri Kesaria. Bangke reme napareʼe gombo mpobotusi. Napokau tau da mangkeni i Paulu ri suaranya.

⁷ Kajela i mPaulu, njaumo waʼa nto Yahudi anu ungka ri Yerusale, tau seʼe mekakore malimbu siʼa, natepuʼumo ntau seʼe mantuntu petuluri anu manee kono i Paulu. Paikanya bareʼe nakoto ntau seʼe mantuju kamonco mpetuluri seʼe.

⁸ Mompau i Paulu mancono pura-puranya setu natoʼo, “Yaku bereʼe anu sala kupowia ri waʼa ncongka mPue Ala anu naparata i Musa, pai Banua i mPue, ewanceʼe seʼe kono ri Datu ri Roma!”

⁹ Paikanya ua i Pesitu da rayanya mantima raya nto Yahudi, painaka meoasi siʼa ri Paulu natoʼo, “Bara nupokono siko da ndeku ri Yerusale da ndapabotusi ndatiria ri suaraku kono petuluri seʼi?”

¹⁰ Mesono i Paulu, “Seʼi-seʼi yaku ntongo mekakore ri suara majalisi i Datu ri Roma, pai njairiamo da ndapabotusi yaku, komi ngkaliomi ndiincanimo yaku bereʼe salaku ri to Yahudi.

¹¹ Ane rapanya yaku maewa songka pai mampowiamo sala anu sintinaja da ndahuku mate, inceʼe bareʼe da kusosoi. Paikanya ane pura-pura petuluri ntau seʼe bareʼe monco, bereʼe tau anu da mampepombaika ngkabongo yaku ri tau seʼe, mewali kuperapi yaku da ndabotusi ri pobotusi i Datu ri Roma.”

¹² Mogombo i Pesitu pai waʼa yununya, roo setu mompau siʼa natoʼo, “Siko merapi da ndabotusi i Datu, mewali siko da njoʼu mancuaraki i Datu.”

I Paulu ri suara i Ageripa pai Berenike 25:13-27

¹³ Bareʼe masae ungka njairia, jelamo ri Kesaria i Mokole Ageripa pai i Berenike mamparata petabea ri Pesitu.

¹⁴ Karoo-roo ntau seʼe bara tesangkuja ndeme njairia, napau i mPesitu ri Ageripa kono kara-kara i mPaulu. Natoʼo, “Ireʼi reʼe sambaʼa tau anu ndataʼamaka napalaika i mPeliki.

¹⁵ Sindara yaku ri Yerusale, naperapi waʼa ntadulako ntadu mpanyomba pai waʼa ntau tuʼa nto Yahudi da naka kubotusi da mahuku tau setu.

¹⁶ Paikanya kusonoka tau seʼe, kutoʼo to Roma bareʼe biasa da mampepombaika ewanceʼemo seʼe tau da ndahuku, ane tau anu ndatuluri setu bareʼepa mombesuara pai tau anu mantuluri pai da ndawai tempo ri tau setu da mancono petuluri setu.

¹⁷ Mewali ri kamaʼi ntau seʼe ireʼi bareʼemo kulantu masae. Bangke reme liu-liu kupowia gombo mpobotusi, kusongka tau mangkeni tau setu ri suaraku.

¹⁸ Pekakore ntau anu mantuluri siʼa mamparata petuluri ntau seʼe, bereʼe naparata ntau seʼe kono powia anu majaʼa. Anu kusarumaka bara inceʼe anu da natoʼo ntau seʼe.

¹⁹ Tau seʼe podo mosisala parata ndaya kono agama ntau seʼe ngkalionya kono tau sambaʼa i Yesu toʼonya. Tau setu matemo, paikanya i Paulu mantoʼo tau setu tuwu.

²⁰ Ua lingu rayaku manawa-nawa ewambeʼi da kupantotoraka kono inceʼe, kupeoasi ri Paulu, bara napokono da ndeku ri Yerusale da ndapabotusi kara-karanya njairia.

²¹ Paikanya i Paulu merapi da mepone pobotusi i Datu ri Roma; naperapi naka maroo-roomo ri pantaʼamaka rantani ndabotusi i Datu kara-karanya. Painaka kusongka da naka siʼa ndataʼamaka mpaliu rantani reʼe kasoanya ri yaku da mampakatu siʼa ri Datu.”

²² Natoʼo i Ageripa ri Pesitu, yaku seʼe da rayaku madonge pompau ntau setu. Mesono i Pesitu natoʼo, “I raneo reʼe tempo ri komi da mampedongeka siʼa.”

²³ Bangke reme jelamo i Ageripa pai Berenike mampake rengko dinci anu madolidi. Mesua tau seʼe ri kareʼe mpobotusi naaweri waʼa ntadulako ncurodado pai waʼa ntau anu ndatubunaka ri kota setu. Nepa nasongka i mPesitu da naka ndakeni mpesua i Paulu.

²⁴ Mompaumo i Pesitu natoʼo, “Anu kutubunaka i Ageripa pai komi pura-pura to Yahudi anu reʼe ireʼi anu siwia kupantubunaka. Tau seʼi roomo napogiluka nto Yahudi pura-pura ri yaku, madago anu ri Yerusale pai anu reʼe ireʼi. Tau seʼe mamperapi pai napeboo-booka natoʼo ntau seʼe neʼemo ndapatuwu tau seʼi.

²⁵ Paikanya ri pomparesaku bereʼe salanya kurata anu sintinaja da ndahukuka siʼa da mate ndapepate. Pai merapimo siʼa da naka kara-karanya da ndabotusi ri pobotusi i Datu, roomo kupakanoto da mampakatu siʼa ri Datu.

²⁶ Paikanya bereʼe kurata totoraka kono kasalanya anu da kuʼuki pai da ndapampakatu siʼa ri Datu. Inceʼe puʼunya painaka kupapombesuara siʼa pai komi pura-pura, tetulabasi ri Sira Mokole Ageripa anu Kutubunaka! Tinako ndayaku ane roomo pomparesata seʼi, da reʼemo totoraka ngkasalanya anu da kuʼuki.

²⁷ Maka malulu paepe ndayaku, bareʼe madago kita mampakatu sambaʼa tau ndataʼamaka ane bareʼe ndatotoraka nunjaa salanya anu ndagiluka siʼa.”