Palaong mPomakau i mPue Yesu 24 - Sura Magali Nuntu Ngkatuwu

I Paulu napogiluka nto Yahudi ri Peliki 24:1-9

¹ Pusa alima ndeme loʼumo i Anania Tadu mPanyomba Bangke pai waʼa ntau tuʼa ri Kesaria, nakeni ntau seʼe sambaʼa pabisara i Teritulu toʼonya. Madadu i Petoro Peliki mampogiluka i Paulu.

² Ndapeboomo i Teritulu ri suara. Mompaumo siʼa mampetisala i Paulu natoʼo, “Tua Petoro Anu Kutubunaka! Ua poparentami anu madago painaka uonomo daera mami seʼi. Pai ua kaloʼemi tongawa reʼemo kateoretaka ngkatuwu ri daera mami.

³ Ua kakominya moparenta madagomo kalenenya tana pai ue mami pura-pura setu kasabe ri wongko ndaya pai kaparata unde pai pontarima kase.

⁴ Da naka neʼe mantaji ngkabongo tempo, kuperapi da mabuya rayami mampedongeka pogilu mami seʼe.

⁵ Kami marata tau seʼi mampareʼe kakaliwongo anu majaʼa ri mbeʼi-mbeʼi kanjoʼunya da reʼe kaguaga ri oyo nto Yahudi, siʼa mewali tadulako gerombola nto Nasare.

⁶ Siʼa mampebutuka da mampaka karika Banua i mPue, kadagonya ronga kasoko siʼa. [Kamonconya tinako ndaya mami da ndabotusi siʼa malulu songka agama mami.

⁷ Paikanya i tadulako ncurodado Lisia marampa siʼa ungka ri pale mami.

⁸ Nepa napokau waʼa ntau anu mampogiluka siʼa da mancuara komi.] Ane ndiparesamo tau seʼi nepa da ndidonge ngkaliomi waʼa ngkamonconya nunjaa anu katulurika siʼa.”

⁹ Waʼa nto Yahudi anu njau njairia woʼu mantuluri i Paulu pai mampomonco pura-pura anu natoʼo i nTeritulu.

I Paulu mompau ri suara i mPeliki 24:10-23

¹⁰ Napokaumo i mpetoro i Paulu da naka mompau siʼa. Mompaumo i Paulu natoʼo, “Kuincani komi Tua petoro anu mewalimo topobotusi motaʼu-taʼumo kasaenya. Inceʼe painaka mawongko rayaku da mompau ri suarami.

¹¹ Madago ndiparesa ngkaliomi, kayakunya seʼi bareʼepa meruu ri sampuyu pai radua ndeme anu liu maʼi ri Yerusale da manyomba.

¹² Pai bereʼe naparata nto Yahudi yaku mopaiso pai tau bara mampareʼe kaguaga ri Banua i mPue bara ri waʼa banua mpekakai ri mbeʼi-mbeʼi ri raya ngkota.

¹³ Bareʼe nakoto ntau seʼe mantuju tanda ngkamonco waʼa mpetuluri ntau seʼe ri yaku anu naparata ri komi.

¹⁴ Lawi kupangakuka ri suarami, yaku manyomba ri Pue Ala ntau piamo mami malulu ewa anu napaguru i Yesu anu napetisala ntau seʼe. Paikanya ntongo kuaya pura-pura anu ndaʼuki ri sura i Musa pai Sura waʼa nabi.

¹⁵ Siwia pai tau seʼe yaku woʼu mampomata-mata i Pue Ala da mampatuwu muni tau anu mate – madago tau anu madago bara tau majaʼa!

¹⁶ Inceʼe puʼunya painaka kupari-pari kojo da naka magali rayaku ri Pue Ala pai ri tolino.

¹⁷ Reʼe bara tesangkuja ntaʼu yaku bareʼe reʼe ri Yerusale, nepa kumewalili woʼu mangkeni doi mpetulungi ri bancaku pai mampanyombaka panyombaku ri Pue Ala.

¹⁸ Ri sindara yaku ntongo mawianaka inceʼe, narata ntau seʼe yaku ri Banua i mPue, ri karoonya yaku mampakagali koro. Bereʼe tau sondo anu sangkani-ngkani pai yaku, pai bereʼe kakaliwongonya ri tempo setu.

¹⁹ Podo reʼe bara tesangkuja to Yahudi anu ungka ri poropenci Asia. Tau seʼe anu kamonconya da rata ireʼi mampetumbu ri komi ane reʼe kabaratanya kono yaku.

²⁰ Paikanya mbolimo waʼa ntau seʼe ngkalionya da mantoʼo nunjaa-njaa anu narata ntau seʼe ri yaku, ri sindara yaku ndapapombesuara pai Majalisi Agama.

²¹ Podo sangaya pauku anu da narata ntau seʼe anu kupasowa ri suara ntau seʼe, inceʼemo pauku anu mantoʼo: Yaku da ndibotusi sandeme seʼi ua kumancuru paayaku tau mate da ndapatuwu muni.”

²² I Peliki anu lawi mariamo paincaninya kono pompaguru i Yesu, mampapusa gombo mpobotusi setu natoʼo, “Kara-kara seʼi da kubotusi ane jelamo i tadulako ncurodado Lisia.”

²³ Napokau tadulako ncurodado anu majaga i Paulu da naka najagai mpaliu i Paulu, paikanya da nawai sakodi kangaʼanya pai neʼe napetangani waʼa yununya anu da mawaika siʼa nunjaa-njaa anu da napake.

I Paulu ri suara i mPeliki pai Durusila 24:24-27

²⁴ Pusa bara tesangkuja ndeme ratamo i Peliki sangkani-ngkani pai tau sambaʼa i Durusila toʼonya, siʼa sambaʼa to Yahudi. Napokau i mPeliki tau da mantima i Paulu. Da napampedongeka i mPeliki pompau i mPaulu kono peaya ndayanya ri Yesu Kerisitu.

²⁵ Paikanya butu natotoraka i mPaulu kono kayoa ndaya pai pantaʼamaka sawoyo ndaya pai kono popahuku anu da ndarata ri eo kiama, meratamo eka ndaya i mPeliki pai napantoʼoka i Paulu, “Palaimo riunya, ane reʼe woʼu kasoaku nepa kupeboo woʼu siko.”

²⁶ Kamonconya i Peliki mantangara ndaya da napawai i mPaulu doi ri siʼa. Inceʼe puʼunya painaka papongkani-ngkani tau napokau da mantima i Paulu da mompau pai siʼa.

²⁷ Ganamo radua ntaʼu jelamo i Perikiu Pesitu mancawani i Peliki mewali petoro. Ua da raya i mPeliki da mampakawongko raya nto Yahudi, inceʼe painaka napapaliukamo i Paulu ri raya ntarunggu.