Palaong mPomakau i mPue Yesu 23 - Sura Magali Nuntu Ngkatuwu

¹ Nakomatasi i mPaulu waʼa Majalisi Agama nepa mompau siʼa natoʼo, “Waʼa ngkasangkompoku sandeme seʼi malulu paepe ndayaku bereʼe salaku ri Pue Ala ri raya ngkatuwuku.”

² Pompaunya ewanceʼe, i Anania tadumpanyomba bangke mampokau tau anu mekakore mosu ri Paulu, da napantoposaka nguju i mPaulu.

³ Natoʼo i mPaulu ri tadu mpanyomba bangke setu, “I Pue Ala sangaya-ngaya da mantoposaka siko, tau toponggoli-nggoli, mokira-kira ewa tau magali! Siko motunda iretu da mabotusi yaku malulu waʼa ncongka mPue Ala anu naparata i Musa, ntano siko ngkaliomu maewa waʼa ncongka mPue Ala maka nupokau tau mantoposaka yaku!”

⁴ Natoʼo waʼa ntau anu ri sori i mPaulu, “Siko mampetikodi tadu mpanyomba bangke mPue Ala!”

⁵ Mesono i Paulu natoʼo, “Oo bareʼe kuincani waʼa ngkasangkompo kasiʼanya tadu mpanyomba bangke. Lawi lau ndaʼuki ri Sura Magali, ‘Neʼe nupetikodi waʼa nto pombawanaka bancamu!’ ”

⁶ Pangkita i mPaulu santila ri waʼa anggota majalisi agama setu to Saduki pai santila woʼu to Parisi. Pai napantoʼo i mPaulu ri majalisi setu, “Ee waʼa ngkasangkompo! Yaku seʼi to Parisi, muli nto Parisi. Yaku ndiparesa ireʼi mancuru kupaaya da katuwu muni waʼa ntau mate.”

⁷ Pompau i mPaulu ewanceʼe montepuʼumo mopaiso waʼa nto Parisi pai to Saduki, painaka tetila raduamo waʼa ntau mogombo setu. (

⁸ Maka malulu to Saduki tau anu mate bareʼe da wali ngkatuwu muni, pai bereʼe malaʼeka pai bereʼe waʼa inosa, paikanya to Parisi maaya kareʼenya pura-pura setu.)

⁹ Teranganimo kaguaga ntau mogombo setu. Bara tesangkuja to Parisi anu mewali guru agama mekakore, pai mompau ri kasengke ndayanya! Natoʼo ntau seʼe, “Malulu paepe ndaya mami, tau seʼi bereʼe salanya sako sakodi! Bara reʼe malaʼeka bara inosa anu mompau pai siʼa!”

¹⁰ Kako mempone-mpone popaiso setu painaka ipu raya i ntadulako ncurodado boi napogapasi ntau seʼe i Paulu. Napokau surodado njoʼu mantima i Paulu ungka ri oyo waʼa ntau setu nakeni muni i Paulu ri asirama ntau seʼe.

¹¹ Ri wengi anu tondanya mekakore i Yesu ri sori i mPaulu mantoʼoka siʼa, “Pakaroso rayamu! Siko mewalimo sabi-Ku ri Yerusale. Ewanceʼe seʼe siko woʼu sangaya-ngaya da mewali sabi-Ku ri Roma.”

Pogombo nto Yahudi da mampepate i Paulu 23:12-22

¹² Bangke reme mowuro-wuro mpodago mogombomo to Yahudi mampareʼe pompasanjuyu nepa motandokoro tau seʼe natoʼo bareʼe da mangkoni bara manginu tau seʼe ane bareʼepa napepate i Paulu.

¹³ Yabi opompuyu tau seʼe anu montando koro setu.

¹⁴ Njoʼu tau seʼe ri waʼa ntadulako ntadu mpanyomba pai waʼa ntau tuʼa nto Yahudi natoʼo, “Kami sintuwu roo montandokoro, bareʼe da mangkoni bara da manginu bara nunjaa ntano ane bareʼepa kapepate i Paulu.

¹⁵ Mewali seʼi-seʼi waʼa ngkasangkompo pai waʼa anggota Majalisi Agama, da ndipakatu sura rata ri tadulako ncurodado nto Roma mamperapi da naka napoyunu i Paulu da mombesuara pai komi, nepa mokira-kira komi ewa da mamparesa woʼu kara-karanya ri katimamanya. Pai ntanoka kami tikalimo da mampepate siʼa ri kabareʼepa rata ireʼi.”

¹⁶ Paikanya pogombo waʼa ntau setu nadonge mpinoana i mPaulu ana ngkasangkomponya anu weʼa. Painaka njoʼu siʼa ri asirama ncurodado mantoʼoka i Paulu.

¹⁷ Napeboo i mPaulu sambaʼa tadulako ncurodado, natoʼo i mPaulu ri siʼa, “Tulungi poyunu pemuda seʼi njoʼu momberata pai tadulakomi, reʼe anu da napetumbuka sira.”

¹⁸ Napoyunu ncurodado anu mompau pai i Paulu pemuda setu ri tadulakonya napetumbumo pompau i mPaulu, natoʼo, “I Paulu, tau anu ndataʼamaka setu mampeboo yaku pai naperapi ri yaku da mampoyunu pemuda seʼi ri komi, reʼe anu da napau ri komi.”

¹⁹ Nakekeni i ntadulako ncurodado pale mpemuda setu, napoyunu tepatani ri sudipinya nepa napeoasi, “Nunjaa anu da nupetumbuka yaku?”

²⁰ Mesono pemuda setu natoʼo, “Waʼa nto Yahudi roo mogombo da mamperapi ri komi da mangkeni i Paulu ri suara Majalisi Agama iraneo, ntanoka podo mokira-kira ewa da mamparesa woʼu kara-karanya ri katimamanya.

²¹ Paikanya neʼe boi ndiʼioka perapi ntau seʼe, maka reʼe yabi aopo mpuyu tau mesambuni da mantundani siʼa ri jaya. Tau seʼe pura-pura roo montandokoro bareʼe da mangkoni bara da manginu ane bareʼepa napepate i Paulu. Seʼi-seʼi tau seʼe tikalimo jamo mampopea da pesonomi.”

²² Natoʼo i ntadulako ncurodado, “Neʼe boi nutoʼo-toʼoka tau karoonya nupetumbuka yaku.” Nepa napokau pemuda setu mewalili.

I Paulu ndawawa ri Kesaria 23:23-35

²³ Ungka lairia napeboo tadulako ncurodado radua tadulako ncurodado natoʼoka tau seʼe, “Patoka radua atu surodado sangkani-ngkani pai pitumpuyu surodado anu monyara pai radua atu surodado anu motawala da njoʼu ri Kesaria sambengi seʼi seʼe tinti sasio.

²⁴ Patoka woʼu nyara anu da napelamba i mPaulu pai poyunu mpodago siʼa da rata madago-dago ri suara i Petoro Peliki.”

²⁵ Nepa naʼuki i ntadulako ncurodado sura anu ewaseʼi katetoʼonya,

²⁶ “Tabea mpetubunaka ungka ri Kalaudiu Lisia, da rata ri anu kutubunaka Petoro Peliki.

²⁷ Tau seʼi roomo nasoko nto Yahudi sakodi napepate ntau seʼe, ane bareʼe ndeku yaku mampoyunu surodado mantulungi siʼa; maka kudonge siʼa sambaʼa to Roma.

²⁸ Ua da rayaku maincani nunjaa kojo anu napomajaʼa ndaya ntau seʼe ri siʼa, kukeni siʼa ri suara Majalisi Agama ntau seʼe.

²⁹ Tongawa bereʼe anu napowia anu da naponcuruka ndahuku mate bara da ndatarunggu. Petuluri ntau seʼe podo anu mokenta pai padika agama ntau seʼe ngkalionya.

³⁰ Ungka lairia reʼe tau mampetumbuka yaku, reʼe gombo jaʼa nto Yahudi da mampepate siʼa, mewali kupokau ndakeni siʼa ri komi petoro anu kutubunaka. Pai roo kupokau waʼa ntau anu mantuluri siʼa da pangkeni petulurinya ri komi.”

³¹ Napelinjaka waʼa ncurodado setu songka ri tau seʼe. Ri wengi setu seʼe nakeni ntau seʼe i Paulu ri Antipateri.

³² Bangke reme napapaliumo ntau seʼe surodado anu monyara mangkeni mpaliu i Paulu. Surodado anu melinja mewalili muni ri asirama.

³³ Kajela ncurodado anu monyara ri Kesaria, naparatamo ntau seʼe sura ri petoro, roo setu nepa napepombaika ntau seʼe i Paulu ri siʼa.

³⁴ Roo nabasa i petoro sura setu, meoasi i petoro ri Paulu natoʼo, “Ungka ri mbeʼi siko? Butu naincani kaʼi Paulunya ungka ri Kilikia,”

³⁵ natoʼo, “Io! Nepa da kuparesa kara-karamu, ane jelamo waʼa ntau anu mampogiluka siko.” Nepa nasongka da naka i Paulu ndajagai ri banua i Herode.