Palaong mPomakau i mPue Yesu 22 - Sura Magali Nuntu Ngkatuwu

¹ “Waʼa mpapa pai waʼa ngkasangkompo pura-pura! Yaku da mantotoraka komi. Koisa ndipedongeka!”

² Padonge ntau seʼe i Paulu mobasa Ibarani rodo mpodago tau seʼe. Mompau mpaliu i Paulu,

³ natoʼo, “Yaku seʼi to Yahudi, yaku ndapoana ri Tarusu tana Kilikia, paikanya yaku bangke ri Yerusale. Yaku ndapaguru mpodago guru bangke i Gamalie toʼoa, Sira mampaguru waʼa mpadika anu naparata i Musa ri waʼa ntau piamota. Sawia pai komi seʼi ri sandeme seʼi, yaku seʼe madoyo ri tetala ntila i mPue Ala.

⁴ Yaku majeani rantani mate waʼa ntau anu malulu pompaguru anu dawoʼu setu. Waʼa ntau seʼe tuama pai weʼa kusoʼo nepa kupari ntarunggu.

⁵ I tadu mpanyomba bangke sangkani pai Majalisi Agama inceʼe anu da mewali sabiku boi nditoʼo mombamba yaku. Maka tau seʼemo anu mawaika yaku sura kuasa da rata ri to Yahudi ri kota Damasi. Sura setu mawai kuasa ri yaku da mangasoʼo waʼa ntau njairia anu malulu pompaguru dawoʼu setu. Da kukeni ri Yerusale da ndapahuku!”

I Paulu mampau kajeanya 22:6-16

⁶ “Ntongo mpelinja yaku mosumo kota Damasi, tempo-temponya ntongo eomo, tingkarasaka nasindi ngkilaya anu ungka ri yangi yaku.

⁷ Madungka ri tana yaku, nepa kudonge oni nganga mantoʼoka yaku, ‘Saulu, Saulu! Makuja painaka nujeani yaku?’

⁸ Meoasi yaku kutoʼo, ‘Isema komi Pue?’ Mesono oni nganga setu, ‘Yakumo i Yesu to Nasare anu nujeani!’

⁹ Waʼa ntau anu njoʼu sangkani-ngkani pai yaku mangkita sindi ngkilaya setu paikanya bareʼe nadonge oni nganga anu mompau pai yaku.

¹⁰ Meoasi woʼu yaku kutoʼo, ‘Mewali nunjaa anu da kupowia Pue?’ Mesono i Yesu ndatoʼo, ‘Pembangu pesua ri Damasi njairia nepa da Kuroʼoka siko nunjaa pepokono mPue Ala anu da nuwianaka.’

¹¹ Ua pasindi ngkilaya seʼe mewali butamo mataku painaka jamo nanini waʼa yunuku yaku mesua ri Damasi.

¹² Njairia njau tau sambaʼa i Anania toʼonya. Siʼa sambaʼa tau meaya pai mepoʼinaya mawianaka waʼa ncongka i mPue Ala anu naparata i Musa ri kita. Siʼa natubunaka nto Yahudi pura-pura anu njau ri Damasi.

¹³ Siʼa maʼi madadu yaku, mekakore siʼa ri soriku nepa natoʼo, ‘Kasangkompoku Saulu, da yosa muni matamu!’ Liu-liu kuwangutaka woʼo, yosamo kukita siʼa.

¹⁴ Mompau woʼu siʼa natoʼo, ‘I Pue Ala Pue ntau piamota mampilisimo siko da nupaincani pepokono-A, pai da nupangkita i Yesu, Ana i mPue Ala anu mawianaka pepokono mPue Ala.’

¹⁵ Siko da mewali sabi mampobambarika ri pura-pura tau nunjaa anu nukita pai anu nudonge.

¹⁶ Seʼi-seʼi neʼemo nulantu masae. Pembangu pompatoka siko da ndariu. Perapimo ri Pue da naka neʼemo ndakitanaka waʼa ncalaamu.”

I Pue Ala mampokau i Paulu da motuntu ri waʼa ntau anu banya to Yahudi 22:17-29

¹⁷ “Mewalili yaku ri Yerusale, pai ri sindara setu yaku ntongo mekakai ri Banua i mPue, ua kuasa Inosa mPue Ala.

¹⁸ Kukita i Pue anu mompau pai yaku ndatoʼo, ‘Maliga-liga palaika Yerusale, maka waʼa ntau ireʼi bareʼe da napedongeka posabimu kono Yaku.’

¹⁹ Mompau yaku kutoʼo, ‘Pue, naincanimo ntau seʼe kayakunya roomo mampesuaki waʼa banua mpekakai, mancoko pai mabobaki waʼa ntau meaya ri Komi.

²⁰ Ewanceʼe seʼe sindara pampepate sabi-Mi i Setepanu, yaku ngkalioku njoʼu njairia pai maʼiowaka waʼa ntau anu mampepate. Yakumo anu majaga waʼa rengko ntau anu mampepate siʼa.’

²¹ Paikanya mompau woʼu i Pue ndatoʼoka yaku, ‘Palaimo, maka Yaku da mampokau siko ri tana ntau lawa ri waʼa ntau anu banya to Yahudi.’ ”

²² Ntongo napedongeka waʼa ntau pompau i mPaulu, paikanya ri padonge ntau seʼe paunya anu kapusanya setu, meboo waʼa ntau setu marimbo oni nganganya natoʼo, “Ndipepatemo tau anu ewancetu taʼanya, neʼemo ndapatuwu siʼa!”

²³ Seʼi meboo, seʼi napowemboka ntau seʼe jubanya painaka moyoko awu ndeki raoa.

²⁴ Napokau i ntadulako ncurodado naka ndakeni i Paulu ri asirama da ndapamparesa njairia, da ndariso da ndapaincani nunjaa puʼunya painaka napeboo-booka nto Yahudi siʼa ewancetu.

²⁵ Paikanya butu ndarambi siʼa da ndatabasi, mompau i Paulu ri tadulako ncurodado anu njau mekakore njairia, “Ara maya sambaʼa to Roma da ndatabasi ri kabareʼepa ndabotusi?”

²⁶ Padonge ntadulako setu ewanceʼe, njoʼu napetumbuka anu naporiwawo, “Nunjaa anu dandapowia seʼi tadulako? Tau seʼi to Roma!”

²⁷ Njoʼu tadulako setu ri Paulu napeoasi, “Koisa toʼo bara monco kojo siko to Roma?” Mesono i Paulu, “Yaku to Roma ungka ri pampoana.”

²⁸ Natoʼo woʼu ntadulako ncurodado setu, “Yaku pewaliku to Roma, masuli kojo kupabayari!” Mesono i Paulu, “Yaku lawi to Roma ungka ri pampoana.”

²⁹ Liu-liu meuranaka waʼa ncurodado anu da mamparesa i Paulu. Maekamo raya i ntadulako maka siʼa marantemo i Paulu, ntanoka i Paulu seʼi to Roma.

I Paulu ri suara Majalisi Agama 22:30–23:11

³⁰ Da raya kojo i tadulako ncurodado nto Roma setu da maincani nunjaa puʼunya painaka napetisala nto Yahudi i Paulu. Inceʼe puʼunya painaka bangkereme napeboo waʼa ntadulako ntadu mpanyomba pai waʼa Majalisi Agama da mompasambaka. Nepa ndalapa i Paulu ungka ri pungunya, napoyunu mombesuara pai tau seʼe pura-pura.