Palaong mPomakau i mPue Yesu 21 - Sura Magali Nuntu Ngkatuwu

I Paulu ndeku ri Yerusale 21:1-16

¹ Roo mompalakana kami pai waʼa ntopombawanaka dompu ri Epesu tepalaimo kami. Mosumomba kami ndatotoka togongi Kosi; bangke reme rata kami ri togongi Rodu. Ungka njairia mosumomba woʼu kami rata ri sompoa Patara.

² Ri Patara momberata kami pai kapala anu da mosumomba njoʼu ri Penikia. Melimba kami ri kapala setu nepa mosumomba mpaliu.

³ Posumomba mami mantango-ntangomo togongi Kiperu ri tondo mokaii; Paikanya posumomba mami ndatotoka Siria. Ri Tiru kami menaʼu ri karatana, maka njairia kapala anu kapepone setu mampapenaʼu ulayanya.

⁴ Tempo setu kapake maliliwungi waʼa ntau anu meaya ri Yesu maroo-roo kami njairia saminggu kasaenya. Tau seʼe napapaincanika nu Inosa mPue Ala da mantoʼoka i Paulu da naka neʼe njoʼu siʼa ri Yerusale.

⁵ Paikanya butu pura tempo mami njairia malai woʼu kami mampaliu pelinja mami. Pura-pura tau seʼe sangkani pai waʼa ananggodi maata kami rata ri sambali ngkota. Ri wiwi ntasi, njairia kami mombukotu mekakai.

⁶ Roo setu mombetabea kami nepa mepone kami ri kapala, mewalilimo waʼa ntau seʼe ri banuanya.

⁷ Mosumomba mpaliu kami ungka ri Tiru njoʼu ri Petolomai. Njairia seʼe kami maliliwungi waʼa ngkasangkompo anu meaya, mamparata tabea ri tau seʼe, sandeme kami sangkani-ngkani pai tau seʼe.

⁸ Bangke reme malai woʼu kami rata ri Kesaria. Njairia kami madadu i Pilipu guru injili setu, maroo-roo kami ri banuanya. Siʼa sambaʼa ri tau papitu anu ndapilisi mamporiokoi dompu ri Yerusale.

⁹ Aopo ananya anu anaweʼamo, ua naponinika i mPue Ala nakotomo mampetumbu nuntu i mPue Ala.

¹⁰ Bara tesangkuja ndeme kami njairia, jelamo ungka ri Yudea sambaʼa nabi i Agabu toʼonya.

¹¹ Siʼa rata madadu kami, natima soʼo ntongo i mPaulu. Soʼo ntongo setu napunguka witi pai palenya ngkalionya, nepa natoʼo, “Ewaseʼi pantoʼo Inosa mPue Ala: tumpu soʼo ntongo seʼi da ndapungu nto Yahudi ewanceʼi ri Yerusale pai da napepombaika ri tau ntaninya anu banya to Yahudi.”

¹² Padonge mami anu ewanceʼe, kami pura-pura pai waʼa ngkasangkompo anu njau ri Kesaria, mamperapi ri Paulu da naka neʼe njoʼu siʼa ri Yerusale.

¹³ Paikanya mesono siʼa natoʼo, “Nunjaa yowenya komi motumangi ewanceʼi podo marangani kapari ndayaku! Da ndipaincani yaku lawi tokamo banya podo da ndasoko ndatiria, paikanya da mate mamponcuruka i Yesu.”

¹⁴ Bareʼe napokono i mPaulu mampedongeka pau mami, painaka kaowemo mampetangani siʼa, katoʼo, “Mbolimo pepokono i mPue anu da mewali.”

¹⁵ Bara sangkuja ndeme kami njairia, kamompatikali rengko mami nepa malai ndeku ri Yerusale.

¹⁶ Bara tesangkuja tau ungka ri Kesaria njoʼu mawawa kami ri banua i Manaso, maka ri banuanya kareʼe mami. (I Manaso sambaʼa to Kiperu anu masaemo pewalinya anaguru i Yesu.)

I Paulu madadu i Yakobu 21:17-26

¹⁷ Mawongko raya waʼa ngkasangkompo ri Yerusale mancabe karata mami.

¹⁸ Bangke reme kami pai i Paulu njoʼu sangkani-ngkani momberata pai i Yakobu; njau woʼu pura-pura waʼa ntopombawanaka dompu njairia.

¹⁹ Roo metabea ri tau seʼe, natepuʼumo i mPaulu mampasimbaju ri tau seʼe pura-pura anu ndapowia i mPue Ala mampoliu siʼa ri oyo waʼa ntau anu banya to Yahudi.

²⁰ Pura nadonge ntau seʼe popatuntu i mPaulu, pura-pura tau seʼe maunde i Pue Ala. Nepa natoʼo ntau seʼe ri Paulu, “Paulu! Da nupaincani moncowu-ncowumo to Yahudi anu meayamo ri Yesu. Waʼa ntau seʼe maʼai pepoʼinayanya ri waʼa mpadika mPue Ala anu naparata i Musa.

²¹ Pai nadongemo ntau seʼe, kasikonya mampaguruka waʼa nto Yahudi anu maroo-roo ri lemba ntaninya, da naka neʼemo nalulu ntau seʼe padika mPue Ala anu naparata i Musa. Siko anu mantotoraka tau seʼe da naka neʼemo ndasuna waʼa ananya malulu ada nto Yahudi.

²² Manoto nadongemo waʼa nto Yahudi anu meayamo setu kasikonya ratamo ireʼi. Mewali ewambeʼimo seʼi?

²³ Moruana lulumo totoraka mami, reʼe ri oyo mami aopo tau anu montanga ri Pue.

²⁴ Siko da njoʼu mampakagali koromu sangkani-ngkani pai tau seʼe da nuwai ongkoso da naka napekikou wuyua ntau seʼe. Ane ewanceʼe da tongawa ri waʼa ntau pura-pura kakononya bambari anu nadonge ntau seʼe bareʼe monco, maka siko ngkaliomu mawianaka songka mPue Ala anu naparata i Musa.

²⁵ Paikanya ane waʼa ntau ntaninya anu banya to Yahudi pai meayamo ri Yesu, roomo kapakatuka tau seʼe sura ewambeʼi anu roomo kabotusi kono pangkoni anu bareʼe maya nakoni ntau seʼe, inceʼemo pangkoni anu roo ndapanyombaka ri lamoa, bareʼe maya mangkoni daa bara pinatuwu anu mate bareʼe mesuwu daanya; pai bareʼe maya mosalara.”

²⁶ Bangke reme njoʼumo i Paulu sangkani-ngkani pai tau aopo setu mampowia pampakagali koro ntau seʼe. Nepa mesua tau seʼe ri Banua i mPue mampetumbu bara sangkuja ndemepa nepa da pusa eo pompakagali setu pai panyomba ntau seʼe anu da ndapanyombaka ntau seʼe sambaʼa pai sambaʼa.

I Paulu ndasoko ri Banua i mPue 21:27-36

²⁷ Mosuno da pusa tempo anu papitu ndeme, bara tesangkuja to Yahudi ungka ri Asia mangkita i Paulu ri raya Banua i mPue. Natundeki ntau seʼe waʼa ntau sondo painaka nakekeni ntau seʼe i Paulu.

²⁸ Seʼi meboo-boo waʼa ntau seʼe natoʼo, “Ee waʼa nto Isaraeli ndipelae! Seʼimo taunya anu malai ri mbeʼi-mbeʼi mampaguruka tau pura-pura pompaguru anu maewa to Isaraeli, maewa songka mPue Ala anu naparata i Musa, maewa Banua i mPue, seʼi-seʼi napoyunu waʼa ntau anu banya to Yahudi mesua ri Banua i mPue, mampakakarika banua magali seʼi!” (

²⁹ Pai napantoʼo ntau seʼe ewanceʼe maka nakita ntau seʼe i Paulu moyunu-yunu pai i Teropimu to Epesu setu ri raya ngkota; nasarumaka ntau seʼe siʼa napoyunu i mPaulu ri Banua i mPue.)

³⁰ Guagamo sandaya ngkota, molonco tau mompasambaka. Nasoko ntau seʼe i Paulu nanoʼo ri sambaliku Banua i mPue. Liu-liu nadampo ntau seʼe wombo Banua i mPue.

³¹ Sindara mpompari-mpari ntau seʼe da mampepate i Paulu, njoʼumo tau mampetumbuka i tadulako ncurodado nto Roma kaguagamo ntau ri raya ngkota Yerusale.

³² Meoko tadulako ncurodado setu napoyunu bara tesangkuja tadulako pai waʼa ncurodadonya, maliga-liga nadadu kareʼe ngkaguaga ntau setu. Pangkita ntau sondo kajela ntadulako ncurodado sangkani pai waʼa ncurodadonya, napeʼontoka ntau seʼe mabobaki i Paulu.

³³ Nadadu i ntadulako ncurodado i Paulu, nasoko nepa napokau ndarante i Paulu. Napeoasi i ntadulako ncurodado isema i Paulu setu pai nunjaa puʼunya pai nunjaa-njaa anu napowia.

³⁴ Mesono waʼa ntau sondo paikanya bareʼe mokaa pesononya; saʼe mantoʼo ewanceʼi, saʼe mantoʼo ewancetu. Nakeni ngkaʼase ntau seʼe, bareʼe naincani i ntadulako ncurodado ewambeʼi anu kamonconya, anu mewali setu. Inceʼe puʼunya painaka nasongka tau mangkeni i Paulu ri asirama ncurodado.

³⁵ Pangkeni ntau seʼe i Paulu rata ri eja, maʼaimo kaguaga waʼa ntau anu mampakaʼase, painaka naokotaka waʼa ncurodado i Paulu ri napoaju ntau – seʼe.

³⁶ Maʼi waʼa ntau anu mampakaʼase setu maluluwaka tau seʼe, seʼi meboo-boo natoʼo, “Pepate tau setu!”

Posabi i mPaulu 21:37–22:5

³⁷ Da pesua ntau seʼe ri asirama ncurodado, mompau i Paulu ri Tadulako ncurodado merapi, “Bara maya siʼa da mompau sarai pai komi?” Meoasi i tadulako ncurodado natoʼo, “Loʼe ntano siko mobasa Garika?

³⁸ Ane ewanceʼe siko banya to Masiri anu mampoyunu tau meewa owi, anu mangkeni mpolonco tau majaʼa aopo ncowu tau ri pada bone tikali pai parewa mpoʼiwali.”

³⁹ Mesono i Paulu, “Yaku to Yahudi; yaku to Tarusu sambaʼa kota anu tetoʼo ri Kilikia. Bara madago ndiwai tempo ri yaku da mompau pai waʼa ntau setu.”

⁴⁰ Butu ndawai tempo ri Paulu da mompau, mekakore siʼa ri eja. Naokotaka palenya mampaponjii tau; monjii tau nepa mompau i Paulu ri basa Ibarani natoʼo,