Palaong mPomakau i mPue Yesu 20 - Sura Magali Nuntu Ngkatuwu

I Paulu njoʼu ri Makedonia pai Garika 20:1-6

¹ Jabutu lene muni poraya ngkota Epesu, napasambaka i mPaulu anggota dompu na totoraka pai napakaroso peaya ndaya ntau seʼe. Mompalakana tau seʼe nepa napaliu i mPaulu pelinjanya njoʼu ri Makedonia.

² Naliliwungi waʼa dompu ri Makedonia, maria njaya patada natotorakaka waʼa ntau meaya ri Yesu pai napakaroso raya ntau seʼe. Nepa malai siʼa njoʼu ri Garika.

³ Tatogo mbuya karoo-roonya njairia. Ungka lairia mompapatokamo siʼa da mosumomba njoʼu ri Siria, reʼe bambari nadonge mantoʼo, waʼa nto Garika mogombo da mampepate siʼa. Inceʼe painaka nawaresaka siʼa da mewalili paikanya da mojaya ri Makedonia.

⁴ I Sopateri ana i mPiru to Berea njoʼu sangkani-ngkani pai siʼa, ewanceʼe seʼe woʼu i Aritariku pai i Sekundu to Tesalonika pai i Gayu to Deribe. Ewanceʼe seʼe i Timotiu, i Tikiku pai i Teropimu waʼa ntau anu ungka ri poropenci Asia.

⁵ Tau seʼe mesindiu nepa napopea kami ri Teroa.

⁶ Pusamo eo mposusa Pasa pangkoni Roti Anu Bareʼe Ndaragi malaimo kami mosumomba ungka ri Pilipi; pusa alima ndeme nepa momberata muni kami pai tau seʼe ri Teroa. Njairia kami maroo-roo saminggu kasaenya.

Kanjoʼu i mPaulu anu kapusanya ri Teroa 20:7-12

⁷ Ri wengi bangke reme eo minggu kami tepasambaka, molimbu mangkoni sangkani-ngkani ewa tau sangkompo. Mompasimbaju i Paulu pai waʼa ntau setu maka bangke reme siʼa da malaimo. Rantani ntongo wengi motuntu mpaliu siʼa.

⁸ Kami mompasambaka ri lincu anu ri wawonya pai gana-gana silo.

⁹ Reʼe sambaʼa pemuda i Eutiku toʼonya siʼa motunda ri palele ntuke. Nakeni ngkasae mpotuntu i mPaulu yurumo kojo matanya painaka tekayore siʼa ri palele ntuke setu, manawu siʼa ungka ri palele ntuke anu katatogo ntapinya, kaloʼu ntau maʼokotaka siʼa puramo inosanya.

¹⁰ Menaʼu i Paulu napokepesi pemuda setu nasokowaka. Natoʼo i mPaulu, “Neʼe ipu rayami siʼa tuwupa!”

¹¹ Mepone muni i Paulu ri lincu anu ri wawonya, napotilaka roti nepa mangkoni sangkani-ngkani. Roo setu mompau woʼu i Paulu pai waʼa ntau setu, rantani mowuro nepa malai i Paulu.

¹² Napoyunumo waʼa ntau pemuda anu tuwu muni setu ri banuanya. Mawongko raya ntau seʼe maka lindomo rayanya.

Ungka ri Teroa njoʼu ri Milete 20:13-16

¹³ Malaimo kami njoʼu ri kapala apu nepa mosumomba njoʼu riunya ri Asosi mantima i Paulu njairia. Lawi ewanceʼe ndapampapodede pelinya mami, siʼa mesindiu melinja ntana njoʼu njairia.

¹⁴ Kajela mami ri Asosi meponemo i Paulu, nepa kamosumomba mpaliu njoʼu ri Metilene.

¹⁵ Ungka njairia mosumomba woʼu kami, bangke reme jelamo kami mancuara togongi Kiosi. Sambali ngkaremenya woʼu nepa jela kami ri Samosi, sandeme woʼu nepa jela kami ri Milete.

¹⁶ Lawi napakanotomo i mPaulu kami bareʼe da mebia ri Epesu naka neʼe pura ngkabongo tempo ri tana Asia. Pampokono i mPaulu sakodi ngkadago ane ronga jela ri Yerusale ri sindara mposusa Pentakosita.

I Paulu mamparata pau mpompalakana ri Epesu 20:17-38

¹⁷ Ungka ri Milete napakatumo i mPaulu bambari jela ri Epesu, mantoʼoka tau seʼe, da naka waʼa ntopombawanaka dompu ri Epesu da njoʼu mampomberataka siʼa.

¹⁸ Kajela ntau seʼe mompaumo i Paulu natoʼo, “Ee waʼa ngkasangkompo ndiincanimo ewambeʼi katuwuku ri oyomi ntongo yaku sangkani-ngkani pai komi montepuʼu ungka ri eo kaʼisa karataku ri tana Asia.

¹⁹ Ri kalauka ndaya pai ri poperepe ue mata, motetala tila i mPue ri tongo-tongo ngkapari mpejeani anu kuepe ua kasina ndaya nto Yahudi.

²⁰ Kuepe-epe sangaya-ngaya ndiincani yaku bareʼe kulili-lilimi mantotoraka komi nunjaa anu moyowe ri komi. Yaku mampaguru komi ri potobuta sangkani-ngkani ri waʼa banuami.

²¹ Madago ri waʼa nto Yahudi, bara ri waʼa anu banya to Yahudi, bareʼe bali-bali kupatiendo tau seʼe da naka majea ungka ri waʼa ncalaanya, da meaya ri Pue Ala pai da meaya ri Yesu.

²² Seʼi-seʼi malulu songka Inosa mPue Ala yaku da njoʼu ri Yerusale. Pai bareʼe kuincani nunjaa anu da mewali ri woto ngkoroku njairia.

²³ Podo sangaya anu kuincani ri mbeʼi ntano kota kanjoʼuku, napapaincanimo Inosa mPue Ala ri yaku, kayakunya da ndatarunggu pai da ndajeani.

²⁴ Paikanya pura-pura setu bareʼe kupepurungi katuwuku, podoia kupari-pari mamparoo tetala anu ndapesarumakaka i Yesu ri yaku, pai yaku da todo rantani rata ri kapusa ngkatuwuku da mampobambarika Nuntu ngKatuwu kono puru ndaya i mPue Ala.

²⁵ Roomo kuliliwungi komi pura-pura pai roomo kutotorakaka komi kono i Pue Ala pai poparenta-A ewa Mokole. Seʼi-seʼi kuepe-epe inceʼimo tando da mpomberatata.

²⁶ Inceʼe puʼunya kupakayonto mantoʼoka komi ri sandeme seʼi ane reʼe ntano anu da magero ri oyomi inceʼe banyamo salaku.

²⁷ Bareʼe kojo sangkani yaku mampelilimika tetalaku mantotorakaka komi pura-pura pepokono i mPue Ala.

²⁸ Komi pura-pura da mainga-inga, ndijaga koromi pai da ndijagai waʼa dompu anu ndapesarumakaka Inosa mPue Ala ri komi da majagai, maka komi roo ndapatongko mewali topojaga ri dompu. Da ndijagai dompu mPue Ala da ewa topongkambi majagai bimbanya. Maka dompu setu i Pue Ala tumpunya, ua kapatemo Ana-A.

²⁹ Ri dapalaiku seʼi, manotomo da maʼi waʼa ncarigala anu masii ri oyomi. Pai waʼa ntau anu ndijagai setu da mewali sinoko waʼa ncarigala setu.

³⁰ Pai ungka ri oyomi ngkaliomi da mesuwu waʼa ntau anu da mampetumbu bambari anu bareʼe monco. Napowia ntau seʼe ewanceʼe da naka lingu raya waʼa ntau anu meayamo ri Yesu, da napalulu tau seʼe.

³¹ Inceʼe puʼunya painaka ndipojaga-jagamo! Neʼe ndikalingani tatogo ntaʼu kasaenya, ri poperepe ue mata ri wengi pai ri reme, bereʼe peʼontoku mampaguru komi pura-pura.

³² Seʼi-seʼi komi kupepombaika ri Pue Ala da naka Sira da mangkariani komi, painaka maroso pekekenimi ri nuntu towe i mPue Ala. I Pue Ala makuasa da mangkariani komi pai da mawaika komi waʼa mpopadonco-A anu lawi tokamo tila waʼa ntau-A.

³³ Bareʼepa reʼe kupampodaraya doi bara rengko ungka ri sema ntano.

³⁴ Ndiincanimo ngkaliomi, ewambeʼi potetalaku mampepali anu da kukatuwuka sangkani-ngkani pai waʼa ntau anu kupopoyunu.

³⁵ Ri mpengaya-ngaya roomo kutujuka komi pandiri, ua pompari-mparita motetala da takoto mantulungi waʼa ntau anu bareʼe nakoto. Neʼe takalingani nunjaa anu roo ndatoʼo i Yesu, ‘Meruu kalindo ndaya ntau anu mombai painaka tau anu mantarima!’ ”

³⁶ Roo mompau i Paulu ewanceʼe, mombukotu siʼa pai waʼa ntau seʼe pura-pura mekakai.

³⁷ Motumangi waʼa ntau seʼe pura-pura, nasokowaka ntau seʼe Paulu, pai mantoʼo madago-dago ri jaya.

³⁸ Maʼai kapari ndaya ntau seʼe madonge pau i mPaulu anu mantoʼo, bareʼemo da nakita ntau seʼe siʼa. Naata ntau seʼe i Paulu rata-rata ri kapala.