Palaong mPomakau i mPue Yesu 19 - Sura Magali Nuntu Ngkatuwu

I Paulu ri Epesu 19:1-10

¹ Sindara ngkanjau i Apolo ri Korinti, i Paulu ntongo maliliwungi une ntana rantani rata siʼa ri Epesu. Njairia momberata siʼa pai bara tesangkuja tau meaya ri Yesu.

² Napeoasi ri tau seʼe natoʼo, “Bara nditarimamo Inosa mPue Ala, ri pangaayami i Yesu?” Mesono tau seʼe, “Bareʼepa. Pai kami bareʼepa reʼe kapadonge anu ndatoʼo Inosa mPue Ala.”

³ Napeoasi i mPaulu, “Ane ewanceʼe komi ndariu ri popariu incema?” Mesono tau seʼe, “Kami ndariu ri popariu i Yohane.”

⁴ Natoʼo i mPaulu, “I Yohane mariu tau mampatongawa tau setu majeamo ungka ri waʼa ncalaanya. Paikanya sindara setu woʼu bareʼe naowe-owe i Yohane mantoʼoka to Isaraeli, da napaaya ntau seʼe tau anu nepa da rata mantonda siʼa, inceʼemo i Yesu.”

⁵ Padonge ntau seʼe totoraka seʼe, mekiriumo tau seʼe ri toʼo i Yesu.

⁶ Pai sindara mpadonco i mPaulu, tau seʼe nakuasaimo Inosa mPue Ala; natepuʼumo ntau seʼe mompau ri basa ntaninya mampetumbu nuntu i mPue Ala.

⁷ Imba ntau seʼe pura-pura reʼe bara sampuyu pai radua tau.

⁸ Tatogo mbuya kasaenya bareʼe bali-bali i Paulu mompau ri banua mpekakai mombebali-bali pai waʼa ntau, mampakanoto ri raya ntau seʼe kono i Pue Ala pai poparenta ewa Mokole.

⁹ Paikanya reʼe bara tesangkuja ri oyo ntau seʼe anu mapeni rayanya bareʼe liu-liu naaya. Ri suara ntau sondo anu tepasambaka naposari kono pompaguru anu mantoʼo pepokono mPue Ala da mancorepaka tolino mampojaya i Yesu. Inceʼe puʼunya pai napampalaika i mPaulu tau seʼe sangkani-ngkani pai waʼa anaguru Yesu melimba ri banua mposikola i nTiranu, njairia pompasimbajunya pai waʼa ntau seʼe sandeme-sandeme.

¹⁰ Ewanceʼemo pewalinya sandeme-sandeme ri raya anu santaʼu kasaenya, rantani pura-pura tau ri tana Asia, madago to Yahudi bara banca ntaninya ntano pura-pura madongemo nuntu i mPue.

Poʼengko waʼa ana i Ncekewa 19:11-20

¹¹ Maria kojo tanda ngkuasa i mPue anu ndapojingki anu napowia i mPaulu.

¹² Mauja podo lenco bara soʼo ntongo anu reʼemo napampake i mPaulu anu ndakeni ri waʼa tau majuʼa da ʼosa juʼanya, bara tau anu napesuaki inosa majaʼa sangaya-ngaya da mesuwu inosa majaʼa setu ungka ri waʼa ntau anu napesuaki.

¹³ Reʼe bara tesangkuja topopakuli nto Yahudi anu malai wainjoʼu waimaʼi mangairi inosa majaʼa ungka ri tau. Napepebutuka ntau seʼe toʼo i Yesu da mangairi inosa majaʼa setu. Natoʼoka waʼa inosa nceta setu, “Ri toʼo i Yesu anu napobambarika i mPaulu, kupapesuwu komi!”

¹⁴ Reʼe tau sangkompo papitu tuama ana i ntadulako ntadu mpanyomba i Sekewa toʼonya anu mampowia ewanceʼe.

¹⁵ Paikanya natoʼo waʼa nceta setu ri tau seʼe, “I Yesu kuincani pai i Paulu woʼu kuincani, paikanya waʼa ngkomi seʼi isema?”

¹⁶ Mesombulaka tau anu napesuaki nceta setu natarangkaku waʼa ntau seʼe nasempati painaka molonco waʼa ntau setu, papowela-wela koronya, seʼi melambe-lambe maka rengkonya pura nasempati ntau anu napesuaki nceta.

¹⁷ Pura-pura to Yahudi pai waʼa ntau ntaninya anu maroo-roo ri Epesu madonge anu mewali setu, painaka maeka raya ntau seʼe. Painaka maʼaimo napabangkei ntau seʼe toʼo i Yesu.

¹⁸ Maria tau anu meayamo ri Yesu rata mangaku ri suara ntau sondo kono waʼa mpowianya anu ndaliunakamo.

¹⁹ Pai waʼa ntau anu biasa mamporewu doʼa-doʼa mampasambaka waʼa ncura doʼa-doʼa nepa natunju ntau seʼe ri suara ntau sondo. Waʼa ncura setu ane ndapasambaka olinya reʼe tempo-temponya teʼalima mpuyu ncowu doi salaka kasondonya.

²⁰ Ewanceʼemo katongawa ngkuasa nuntu i mPue maligamo katebambarinya pai maʼaimo pekoninya ri raya ntau.

Kaguaga ri Epesu 19:21-41

²¹ Karoonya mewali pura-pura setu, nawaresaka i mPaulu tinako ndayanya da njoʼu ri Makedonia pai Akaya nepa da liu ri Yerusale, maka natoʼo, “Ane puramo kuliliwungi tau seʼe, sangaya-ngaya da ndeku woʼu yaku ri kota Roma.”

²² Napokau tau radua anu mantulu-ntulungi siʼa inceʼemo i Timotiu pai i Erasitu da njoʼu ri Makedonia, ri sindara siʼa njoʼu ri Poropenci Asia bara tesangkuja ndeme njairia.

²³ Bara ri tempo setumo pewalinya kaguaga anu bangke ri Epesu ua pompaguru kono i Yesu.

²⁴ Maka ri kota setu reʼe sambaʼa pande salaka i Demeteriu toʼonya, siʼa biasa mampowia banua lamoa ungka ri salaka gala i lamoa weʼa Aritemi. Ua pampowia i nceʼe maria doi narata nawaika ntopotetalanya.

²⁵ Mewali sangkani napasambaka waʼa ntopotetalanya sangkani-ngkani pai waʼa mpande salaka anu ntaninya, natoʼo, “Ee waʼa ngkasangkompo! Ndiincanimo ewambeʼi taparata katuwuta ua tetala seʼi.

²⁶ Seʼi-seʼi yosamo ndikita mata nunjaa anu napowia i mPaulu setu. Natoʼo waʼa lamoa anu napowia mpale ntolino inceʼe banya lamoa. Pai waʼa ntau sondo malulumo pompagurunya, banya podo ri Epesu seʼi, paikanya mosu juku-juku sambawo ntana Asia woʼu.

²⁷ Ndipeole tetalata bareʼemo da reʼe yowenya, pai banya podo inceʼe anu da mewali, paikanya banua mpanyomba ri lamoa Aritemi bareʼemo da natubunaka pai da naporutamo ntau; ntanoka siʼamo lamoa anu napanyomba nto Asia seʼi pai ri sambawo lino!”

²⁸ Padonge ntau seʼe totoraka setu marameda rayanya, painaka meboo-boo waʼa ntau seʼe natoʼo, “Tuwu i Aritemi, lamoa nto Epesu!”

²⁹ Melaomo kakaliwongonya ri sandaya ngkota. Nepa nasoko ntau seʼe i Gayu pai i Aritariku to Makedonia anu mampoyunuki i Paulu ri raya mpelinjanya, nanoʼo ntau seʼe tau radua setu ri tanalapa ngkota.

³⁰ Da mesua i Paulu da maluluwaka tau seʼe paikanya nataʼamaka waʼa ntau meaya ri Yesu anu njau njairia.

³¹ Reʼe woʼu bara tesangkuja tau bangke ri poropenci Asia anu mobale-bale pai i Paulu, mampokau tau mantoʼoka siʼa da naka neʼe mepapamara siʼa ri tongo ngkota.

³² Sindara setu guagamo waʼa ntau anu mompasambaka ri tongo ngkota setu, bareʼe tumoro pompau ntau seʼe, saʼe mantoʼo ewanceʼi saʼe mantoʼo ewancetu, maka waʼa ntau setu bareʼe naincani nunjaa puʼunya painaka mompasambaka setu.

³³ Santila tau mancarumaka bara i Alesande puʼunya, maka nakita ntau seʼe siʼa anu najujulaka nto Yahudi ndeku ri suara. Naokotaka i Alesande palenya siʼa merapi tempo da mompau mantuntu yoanya ri tau sondo.

³⁴ Paikanya butu nakita ntau seʼe kasiʼanya to Yahudi, meboo-boo tau seʼe pura-pura natoʼo, “Tuwu i Aritemi, lamoa nto Epesu!”

³⁵ Masae nepa nakoto i jurutulisi ngkota mampaponjii tau sondo, mompau siʼa natoʼo, “Ee komi to Epesu! Pura-pura tau maincani kakominya anu mamporewu banua lamoa Aritemi pai watu magali anu manawu ungka ri yangi.

³⁶ Inceʼe bereʼe tau anu da mancapu, inceʼe puʼunya painaka ndikarodo neʼe maria ngaya anu ndipowia.

³⁷ Waʼa ntau anu ndikeni seʼi ara roomo mangangka ri banua lamoa bara napetikodi ntau seʼe lamoata anu weʼa.

³⁸ Ane reʼe kabarata i Demeteriu sangkani pai waʼa ntopotetalanya ri sambaʼa tau, petumbu ri waʼa ntopobotusi. Topobotusi pai to poparenta toka mampopea komi.

³⁹ Paikanya ane ntongo reʼepa anu ndipodaraya, inceʼe sangaya-ngaya da ndaparoo ri pogombo ntau sondo malulu ada anu monco.

⁴⁰ Maka nunjaa anu mewali sandeme seʼi inceʼe da mampakarugi kita. Kita da ndatuluri mampowia sangaya peewa, maka bareʼe kojo da napomonco ntopoparenta tau anu mampowia kaguaga.”

⁴¹ Roo mompau ewanceʼe napokaumo i jurutulisi ngkota waʼa ntau setu pura-pura mewalili.