Palaong mPomakau i mPue Yesu 18 - Sura Magali Nuntu Ngkatuwu

Ri Korinti 18:1-17

¹ Ungka ri Atena malaimo i Paulu njoʼu ri kota Korinti.

² Njairia momberata siʼa pai to Yahudi sambaʼa i Akila toʼonya, siʼa tau ungka ri Pontu. I Akila nepa mewalili ungka ri Italia pai rongonya i Perisikila. Tau seʼe rata ri Korinti, maka reʼe songka i Datu Kalaudiu anu mampokau malai pura-pura to Yahudi ungka ri kota Roma. Nadadu i mPaulu tau radua setu.

³ Maroo-roo i Paulu sangkani-ngkani pai tau seʼe, maka siwia pompepali ntau seʼe, inceʼemo mampowia kema.

⁴ Paikanya ane ri eo Umapo, i Paulu njoʼu mompasimbaju ri banua mpekakai, painaka waʼa nto Yahudi pai waʼa nto Garika meayamo ri Yesu.

⁵ Butu jelamo i Silasi pai Timotiu ungka ri Makedonia, reʼemo kasoa i mPaulu mampetumbu nuntu ungka ri Pue Ala ri waʼa nto Yahudi kono i Yesu Mokole Tadungkadago anu ndajanji mPue Ala.

⁶ Paikanya ua bareʼe naowe-owe ntau setu maewa pai maposari, painaka natanongkosi i mPaulu awu ungka ri rengkonya mewali sambaʼa petondoni ri tau seʼe kono kasalanya. Natoʼo i mPaulu, “Ane marugi komi, inceʼe salami ngkaliomi! Yaku bareʼe da kusuru! Pai montepuʼu seʼi-seʼi yaku da njoʼu ri waʼa ntau anu banya to Yahudi.”

⁷ Nepa malai i Paulu napalaika tau seʼe njoʼu maroo-roo ri banua anu mosori pai banua mpekakai setu. Banua setu banya to Yahudi tumpunya, paikanya siʼa sambaʼa tau anu manyomba ri Pue Ala. Toʼo ntau setu i Titiu Yusitu.

⁸ Paikanya i Kerisipu tadulako banua mpekakai sangkani pai waʼa bangani ncomborinya meayamo ri Yesu. Pai maria woʼu waʼa nto Korinti anu ntaninya anu madonge nuntu napetumbu i mPaulu, tau seʼe meayamo ri Yesu nepa ndariu.

⁹ Ri anu sambengi mampoliu pekita ndaya i Pue mantoʼoka i Paulu, “Neʼe maeka! Potuntu mpaliu neʼe boi monjii siko.

¹⁰ Maka Yaku maaweri siko. Bareʼe da reʼe tau anu da mampakarugi siko, maka sondo tau-Ku anu reʼe ri raya ngkota seʼi.”

¹¹ Inceʼe puʼunya painaka maroo-roo i Paulu ri Korinti santaʼu pai santongo kasaenya, mampaguruka tau seʼe Nuntu i mPue Ala.

¹² Sindara i Galio mewali Petoro Akaya, mompasanjuyumo to Yahudi maewa i Paulu, nakeni ntau seʼe siʼa ri suara ntopobotusi.

¹³ Napogiluka ntau seʼe i Paulu natoʼo, “Tau seʼi mawawanaka tau da naka manyomba ri Pue Ala malulu jaya anu bareʼe singkono pai waʼa ncongka anu naparata i Musa!”

¹⁴ Da mesonomo i Paulu, paikanya mompaumo i Galio ri waʼa nto Yahudi natoʼo, “Ee waʼa nto Yahudi! Ane komi seʼi mampetumbu pelewa bara powia ntau anu majaʼa sangaya-ngaya da kupedongeka pogilumi seʼi.

¹⁵ Paikanya anu ndiposisalai seʼi, inceʼe kono waʼa mpau pai waʼa ntoʼo anu lau ri waʼa mpadikami ngkaliomi! Mewali inceʼe da ndiparoo ngkaliomi, yaku bareʼe da kubotusi anu ewanceʼe taʼanya!”

¹⁶ Nepa nairi i Galio pura-pura tau setu mesuwu.

¹⁷ Nasoko ntau seʼe i Sositene tadulako banua mpekakai setu, nawombo ntau seʼe siʼa ri suara meja mpobotusi. Paikanya bareʼe liu-liu nalinga i Galio pura-pura anu mewali setu.

I Paulu mewalili ri Antiokia 18:18-23

¹⁸ Karoonya mewali ewanceʼe ntongo masaepa karoo-roo i mPaulu ri Korinti; nepa mompalakana siʼa pai waʼa ntau meaya njairia. Mosumombamo siʼa sangkani-ngkani pai i Akila pai i Perisikila njoʼu ri Siria. Ri Kengkeria i Paulu mampekikou wuyuanya anu lawi napapaliukamo nakarate, maka ewanceʼe janjinya ri Pue.

¹⁹ Kajelanya ri Epesu, napalaika i Perisikila pai Akila, mesua siʼa ri banua mpekakai mompasimbaju pai waʼa nto Yahudi njairia.

²⁰ Naperapi ntau seʼe da naka masae sakodi peʼonto i mPaulu njairia, paikanya bareʼe napokono i mPaulu.

²¹ Paikanya mau ewanceʼe, ri tempo da mpogaʼa-gaʼa ntau seʼe, mompau i Paulu natoʼo, “Ane ndawai i mPue Ala tempo, yaku da mewalili woʼu ireʼi.” Roo mompau ewanceʼe mosumombamo siʼa ungka ri Epesu.

²² Penaʼu ntau seʼe ri Kesaria ndekumo siʼa ri Yerusale metabea ri waʼa dompu i mPue ndatiria, nepa liu siʼa ri Antiokia.

²³ Maroo-roo siʼa bara tesangkuja ndeme njairia, nepa malai woʼu siʼa njoʼu ri daera Galatia pai Perigia mampakaroso peaya ndaya waʼa ntau meaya.

I Apolo ri Epesu pai Korinti 18:24-28

²⁴ Ungka lairia ratamo ri Epesu sambaʼa to Yahudi anu ndapoana ri Alesanderia i Apolo toʼonya. Siʼa loʼe mompau pai maincani bangani Ncura Magali,

²⁵ pai naincanimo pompaguru i Yesu. Madoyo kojo siʼa mompaguru ri katimamanya kono i Yesu, mau nepa pompariu i Yohane anu naincani.

²⁶ Makoje rayanya mompau ri banua mpekakai, pai ri padonge i mPerisikila pai Akila pontotorakanya, napoyunu ntau seʼe siʼa ri banuanya. Njairia natotorakaka ntau seʼe ri gori ngkamonconya kono pepokono i mPue Ala mancorepaka tolino ua i Yesu.

²⁷ Ungka lairia da raya i Apolo da njoʼu ri Akaya. Inceʼe painaka waʼa ntau meaya ri Yesu anu ri Epesu mampakatu sura rata ri waʼa ngkasangkompo anu njau ri Akaya da naka natarima mpodago ntau seʼe ri wongko ndayanya i Apolo. Karata i Apolo njairia tongawa bangke poyowenya, maka siʼa mantulungi waʼa ntau anu meaya ua puru ndaya i mPue Ala. Meayamo tau seʼe ri Yesu.

²⁸ Maka i Apolo makoje pai reʼe kuasa ri siʼa manangi waʼa nto Yahudi anu napombebalika ri suara ntau sondo. Natuju waʼa bangani Ncura Magali anu mampakanoto i Yesu, Siramo Mokole Tadungkadago anu ndajanji setu.