Palaong mPomakau i mPue Yesu 16 - Sura Magali Nuntu Ngkatuwu

I Timotiu melulu ri Paulu pai i Silasi 16:1-5

¹ Napaliu i mPaulu pelinjanya rata ri Deribe nepa njoʼu ri Lisitera, njairia njau sambaʼa anaguru i Yesu i Timotiu toʼonya. Inenya to Yahudi anu meayamo ri Yesu; paikanya papanya to Garika.

² Ri oyo ntau meaya ri Lisitera pai Ikoniu naincani ntau seʼe i Timotiu sambaʼa tau anu madago raya.

³ Da raya i mPaulu da naka i Timotiu melulu ri siʼa, inceʼe painaka nasuna i mPaulu siʼa. Nawianaka i mPaulu ewanceʼe maka pura-pura to Yahudi ri daera setu paka maincani i Timotiu setu sambaʼa to Garika.

⁴ Ri mbeʼi-mbeʼi kota kanjoʼu ntau seʼe, napetumbuka ntau seʼe, ewambeʼi botusi waʼa ncuro pai waʼa ntadulako ri Yerusale. Natotoraka ntau seʼe da napalulu waʼa ntau meaya waʼa ncongka setu.

⁵ Inceʼe painaka kako maroso-roso peaya ndaya dompu ri Yesu, painaka sandeme-sandeme teranga-rangani imba ntau seʼe.

I Paulu marata pekita ndaya ri Teroa 16:6-10

⁶ Napetangani Inosa mPue Ala i Paulu pai i Silasi da mampobambarika nuntu i mPue Ala ri poropenci Asia. Mewali napaliu ntau seʼe pelinjanya njoʼu ri daera Perigia pai Galatia.

⁷ Kajela ntau seʼe ri tida ntana Misia, napebutuka ntau seʼe da masuaki daera Bitinia, paikanya napetangani Inosa Yesu tau seʼe da njoʼu njairia.

⁸ Mewali naliu ntau seʼe Misia jela tau seʼe ri Teroa.

⁹ I Paulu marata sambaʼa pekita ndaya. Ri pekita ndaya setu nakita sambaʼa to Makedonia mekakore ri suaranya mamperapi kojo danaka mabuya rayanya da njoʼu ri Makedonia mampelae tau seʼe.

¹⁰ Parata i mPaulu pekita ndaya seʼe, liu-liu mompakoroka kami da njoʼu ri Makedonia. Maka manoto kojo ri raya mami i Pue Ala anu mampokau kami da mapetumbu Nuntu ngKatuwu ri waʼa ntau njairia.

I Lidia to Pilipi meayamo ri Yesu 16:11-15

¹¹ Kapalaika Teroa mosumombamo kami njoʼu ri Samoterake, bangke reme nepa jela kami ri Neapoli.

¹² Ungka njairia malai woʼu kami njoʼu ri Pilipi, sambaʼa kota anu kaʼisa ri tana Makedonia. Kota Pilipi tesua kota anu naparenta nto Roma. Maroo-roo kami njairia bara tesangkuja ndeme.

¹³ Ri eo Umapo njoʼumo kami ri wingke ngkoronya ri sambaliku boboka bente, maka kaincani njairia kareʼe mpekakai nto Yahudi. Motunda-tunda kami njairia mompasimbaju pai waʼa mbeʼa anu njaumo tepasambaka.

¹⁴ Ri oyo waʼa mbeʼa setu, reʼe sambaʼa weʼa topobalu-balu anu biasa mampobalu ayapa makodara i Lidia toʼonya, siʼa to Tiatira. Siʼa mampotowe i Pue Ala, i Pue malengkosi rayanya da mantarima anu napaguru i mPaulu ri siʼa.

¹⁵ Ndariumo i Lidia sangkani pai waʼa bangani ncomborinya. Karoonya ndariu tau seʼe, napeboo kami natoʼo, “Ane malulu paepe ndayami yaku seʼi monco-moncomo meayamo ri Yesu, kuepe-epe madago ane komi da maroo-roo ri banuaku.” Napari-pari kojo da naka kabangani perapinya.

I Paulu ndatarunggu ri Pilipi 16:16-40

¹⁶ Mewali ri anu sandeme sindara kami njoʼu ri kareʼe mpekakai, momberata kami pai sambaʼa weʼa; siʼa setu anamayunu. Weʼa setu nakuasai nceta anu mangkoto mampakanoto waʼa nunjaa anu da mewali ripurinya. Nakoto mampeole were ngkatuwu ntau sambaʼa pai sambaʼa. Ua potetalanya anu ewanceʼe mampaporasimo waʼa puenya.

¹⁷ Nalulu mpaliu mbeʼa setu kami pai Paulu, seʼi meboo-boo natoʼo, “Waʼa ntau seʼi inceʼemo pomokau i mPue Ala Anu Makuasa! Tau seʼe rata mampetumbuka komi ewambeʼi jayanya da naka waʼa ngkasangkompo marata katesorepaka!”

¹⁸ Bara sangkuja ndememo peboo-boo mbeʼa setu ewanceʼe. Painaka malentemo raya i mPaulu, meeli siʼa, nepa natoʼoka inosa setu, “Ri toʼo i Yesu Kerisitu, kusongka siko pesuwu ungka ri weʼa seʼi!” Liu-liu mesuwu inosa majaʼa setu napalaika weʼa setu.

¹⁹ Butu naincani waʼa mpuenya tetajimo jaya mparata ntau seʼe doi, nasoko ntau seʼe i Paulu pai i Silasi, nanoʼo ntau seʼe tau radua setu njoʼu ri tanalapa ri suara ntopoparenta.

²⁰ I Paulu pai Silasi nakeni ntau seʼe ri waʼa ntoponcongka nto Roma, natoʼo ntau seʼe, “Waʼa ntau seʼi to Yahudi, rata mampakaliwongo raya ngkotata seʼi.

²¹ Tau seʼe mampokau tau mampowia anu bareʼe singkono pai kabiasata, pai maewa adata kita to Roma. Kita bareʼe tapokono malulu ada anu ewancetu!”

²² Meokomo woʼu waʼa ntau sondo mantompe i Paulu pai Silasi. Waʼa ntopoparenta masiati baju ungka ri koro ntau radua setu nepa napokau tau mantabasi tau radua setu.

²³ Osa raya ntau seʼe mantabasi nepa njoʼu tau seʼe nawunca ri tarunggu. Napokau ntau seʼe i tadulako ntarunggu da majagai kojo tau seʼe.

²⁴ Padonge i ntadulako ntarunggu songka setu, napapesua i Paulu pai i Silasi ri lincu anu ri aranya kojo nepa nasangkala woʼu.

²⁵ Tempo-temponya tongo mbengi mekakai i Paulu pai i Silasi, pai mongayu-ngayu maunde i Pue Ala. Waʼa ntau ndatarunguu ntaninya mampedongeka pongayu ntau seʼe.

²⁶ Tingkarasaka molindugi maʼai kojo, kanjua-njua tarunggu setu. Pura-pura dampo ntarunggu teloka pai waʼa rante anu ndapunguka waʼa ntau ndatarunggu teledemo.

²⁷ Jingki raya i ntadulako ntarunggu, kalumbangu siʼa. Butu nakita pura-pura dampo ntarunggu telokamo, nawutu penainya da menoo; nasarumaka puramo molonco waʼa ntau ndatarunggu.

²⁸ Paikanya meboo i Paulu marimbo oni nganganya natoʼo, “Neʼe menoo! Kami pura-pura seʼi ireʼi!”

²⁹ Naperapi i ntadulako ntarunggu setu silo nepa molonco siʼa mesua ri raya ntarunggu, kandende-ndende koronya, mombukotu siʼa metutu ri suara i mPaulu pai i Silasi.

³⁰ Nepa napoyunu tau seʼe mesuwu ungka ri raya ntarunggu natoʼo, “Nunjaa da kupowia da naka yaku tesorepaka?”

³¹ Mesono i Paulu pai Silasi natoʼo, “Ayamo i Yesu! Siko da tesorepaka, – siko sangkani pai waʼa bangani banuamu.”

³² Nepa natotoraka i mPaulu pai Silasi nuntu i mPue ri tadulako ntarunggu setu pai ri pura-pura tau anu reʼe ri banuanya.

³³ Ntongo mbengi setu seʼe napoyunu i ntadulako ntarunggu i Paulu pai i Silasi napakuli waʼa mbelanya. I tadulako ntarunggu sangkani pai tau bangani banuanya ndariu.

³⁴ Nepa napoyunu i Paulu pai i Silasi njoʼu ri banuanya napakoni. Ua peaya ntau seʼe ri Pue Ala mampareʼe wongko ndaya ntau seʼe sancombori.

³⁵ Bangke reme napokau waʼa ntoponcongka nto Roma polisi njoʼu ri tarunggu, da mamparata songka da naka ndalapa i Paulu pai i Silasi.

³⁶ Naparatamo i ntadulako ntarunggu ri Paulu natoʼo, “Reʼemo songka waʼa ntopoparenta nto Roma, anu mantoʼo da naka komi ndalapa ungka ri tarunggu. Mewali seʼi-seʼi komi mayamo mewalili. Madago-dago ri jaya!”

³⁷ Paikanya natoʼo i mPaulu ri waʼa mpolisi setu, “Kami seʼi to Roma, bareʼepa ndibotusi, kami roo ndawombo ri suara ntau sondo, nepa ndipari ntarunggu. Roo setu nepa da ndipokau kami mesuwu mponjii-njii? Kami bareʼe kapokono! Pokau waʼa ntoponcongka setu maʼi ngkalionya malapa kami.”

³⁸ Mewalili waʼa mpolisi setu napetumbuka waʼa ntoponcongka nto Roma pau i mPaulu. Butu nadonge ntau seʼe i Paulu pai i Silasi to Roma maeka raya ntau seʼe.

³⁹ Nepa njoʼu tau seʼe merapi neʼe nakitanaka i mPaulu pai Silasi, roo setu napoyunu tau radua setu mesuwu ungka ri tarunggu, pai merapi da naka malai tau seʼe ungka ri kota setu.

⁴⁰ Pesuwu i mPaulu pai Silasi ungka ri tarunggu setu, nepa njoʼu ri banua i Lidia. Karoonya momberata pai waʼa ntau meaya njairia mampakaroso raya ntau seʼe, malaimo i Paulu pai Silasi.