Palaong mPomakau i mPue Yesu 15 - Sura Magali Nuntu Ngkatuwu

Pogombo ri Yerusale 15:1-21

¹ Reʼe bara tesangkuja tau anu rata ri Antiokia ungka ri Yudea, mampaguru waʼa ntau meaya njairia natoʼo, “Waʼa ntau seʼe sangaya-ngaya da ndasuna malulu songka i mPue Ala anu napaguru i Musa, maka ane bareʼe ndasuna tau seʼe bareʼe da tesorepaka.”

² Pompaguru ntau seʼe ewanceʼe naewa pai nasapu i mPaulu pai i Baranaba. Pewalinya ewa nceʼe napokaumo ntau seʼe i Paulu pai i Baranaba pai bara tesangkuja tau ungka ri Antiokia njoʼu ri Yerusale da napampau kono inceʼe ri waʼa ncuro pai waʼa ntadulako dompu njairia.

³ I Paulu pai i Baranaba, naata waʼa dompu ri Antiokia rata ri sambali bente, palai ntau seʼe mojaya ri Penekia pai Samaria. Njairia napau ntau seʼe ewambeʼi pewalinya waʼa ntau anu banya to Yahudi mampepombaikamo koronya ri Pue Ala. Maʼai kawongko ndaya waʼa ntau meaya madonge bambari setu.

⁴ Kajela ntau seʼe ri Yerusale, madago napangkoho dompu njairia tau seʼe, ewanceʼe seʼe waʼa ncuro pai waʼa ntopombawanaka. Napaumo ntau seʼe ri waʼa ntau njairia, pura-pura anu ndapowia mPue Ala mampoliu tau seʼe.

⁵ Paikanya reʼe bara tesangkuja to Parisi anu meayamo ri Yesu, mekakore natoʼo, “Waʼa ntau anu banya to Yahudi anu meayamo ri Yesu, tau seʼe sangaya-ngaya da ndasuna, malulu songka i mPue Ala anu naparata i Musa.”

⁶ Mompasambakamo waʼa ncuro pai waʼa ntopombawanaka mampombetoʼoka kakononya inceʼe.

⁷ Masae napampombepauka ntau seʼe Meokomo i Peturu natoʼo, “Ee waʼa ngkasangkompo! Sangaya-ngaya ndiincanimo ungka ri pontepuʼunya yaku ndapilisi i mPue Ala ri oyomi, da mangkeni Nuntu ngKatuwu njoʼu ri waʼa ntau ntaninya anu banya to Yahudi, da napadonge ntau seʼe woʼu pai da napaaya.

⁸ I Pue Ala anu maincani raya ntolino pai tongawa Sira mantarimamo tau seʼe. Inceʼe tongawa kojo ri pantarimamo ntau seʼe Inosa mPue Ala. Bareʼe reʼe posisalanya pai anu roomo ndawai ri kita.

⁹ I Pue bareʼe mampaposisala kita pai tau seʼe. I Pue Ala mampakagali raya ntau seʼe, ua tau seʼe meayamo.

¹⁰ Mewali, nunjaa painaka seʼi-seʼi komi da maewa i Pue Ala, da mampapakoyoka waʼa ntau meaya kinoyo anu manee, sako kita pai waʼa ntau tuʼata bareʼe takoto mawianaka?

¹¹ Kamonconya, kita taayamo kakitanya ndasorepaka podo ua puru ndaya i Yesu; ewanceʼe woʼu tau seʼe.”

¹² Liu-liu monjii waʼa ntau setu pura-pura. Nepa napedongeka ntau seʼe pompau i Baranaba pai i Paulu, mampau waʼa mpetondoni ngkuasa anu ndapojingki anu ndapowia i mPue Ala anu mampoliu tau seʼe ri oyo waʼa ntau anu banya to Yahudi.

¹³ Roo mompau tau seʼe, meokomo i Yakobu natoʼo, “Ee waʼa ngkasangkompo! Koisa ndipedongeka yaku.

¹⁴ Roomo natotoraka i Ncimo ewambeʼi ndapancabemo i mPue Ala waʼa ntau anu banya to Yahudi, tau seʼe woʼu ndapilisimo i mPue Ala da mewali tau-A.

¹⁵ Inceʼe singkono pai anu napowatikamo waʼa nabi, maka reʼe ndaʼuki ewaseʼi,

¹⁶ ‘Roo setu Yaku da mewalili muni,’ pantoʼo i mPue, ‘Yaku da mawangu muni banua i Daudi anu madungkamo, da mawali mpakoroka anu mageromo, nepa da Kuwali mpatunda muni.

¹⁷ Da naka pura-pura tau yabinya setu da mampepali i Pue, sangkani-ngkani pai tau anu banya to Yahudi, anu roo Kupeboo da mewali tau-Ku.’ Ewanceʼe pantoʼo i mPue Ala,

¹⁸ anu roomo ndapapaincanika ungka ipiamo.”

¹⁹ Natoʼo woʼu i Yakobu, “Mewali malulu parata ndayaku, kita bareʼe maya mampakasusa waʼa ntau ntaninya anu banya to Yahudi anu mantambusakamo katuwunya ri Pue Ala.

²⁰ Paikanya da taʼuki sura rata ritau seʼe, anu da mantotoraka tau seʼe da naka neʼe mangkoni pangkoni anu karika anu roomo ndapanyombaka ri lamoa, bara mangkoni pinatuwu anu mate ndagogoli, pai mangkoni daa. Ewanceʼe seʼe da naka neʼe mosalara tau seʼe.

²¹ Maka songka i mPue Ala anu naparata i Musa montepuʼu ungka ipiamo, ndabasa sangkani-sangkani eo Umapo ri waʼa banua mpekakai, pai ndapobambarika ri pura-pura kota.”

Sura anu darata ri waʼa ntau meaya ungka ri banca ntaninya 15:22-35

²² Kabotu gombo waʼa ncuro pai waʼa nto pombawanaka sangkani pai anggota dompu, da mampilisi bara tesangkuja tau da mampoyunuki i Paulu pai i Baranaba da njoʼu ri Antiokia. Napilisi ntau seʼe i Silasi, pai i Yudasi anu karua ntoʼonya i Barasaba. Tau radua setu teimba tau anu ndatubunaka ri raya dompu ri Yerusale.

²³ Simpoyunu pai waʼa mpomokau setu mangkeni sura anu ewaseʼi banganinya, “Da rata ri waʼa ngkasangkompo anu ungka ri banca ntaninya anu banya to Yahudi anu njau ri Antiokia, Siria pai Kilikia. Tabea ungka ri kami waʼa ncuro pai waʼa ntopombawanaka inceʼemo waʼa ngkasangkompomi.

²⁴ Kadongemo, reʼe bara tesangkuja tau ungka ri kami anu ratamo ri komi mawai totoraka anu mampakalipo pai mampakalingu nawa-nawami pai pompaguru ntau seʼe. Ntanoka tau seʼe bareʼe kapokau da mawianaka inceʼe.

²⁵ Inceʼe puʼunya painaka roo mogombo kami, kaposintuwuimo da mampokau bara tesangkuja tau anu kapilisi da madadu komi. Tau seʼe simpoyunu pai i Baranaba pai i Paulu anu kapotowe.

²⁶ Tau radua seʼe siʼamo waʼa ntau anu roomo mampepombaika inosanya ua Pueta i Yesu Kerisitu.

²⁷ Mewali kapokau i Yudasi pai i Silasi rata madadu komi, tau seʼemo da mamparata ri komi bangani ncura setu ri katimamanya.

²⁸ Inosa mPue Ala masintuwunakamo – pai kami woʼu sintuwu – da naka komi neʼe ndawaika waʼa ngkinoyo anu manee ungka ri waʼa ngkinoyo anu moyowe ewaseʼi:

²⁹ neʼe boi ndikoni waʼa mpangkoni anu roomo ndapanyombaka ri lamoa; neʼe ndikoni daa, neʼe ndikoni pinatuwu anu mate ndagogoli pai nditilawangi waʼa mposalara. Ane ndikoto mantaʼamaka koromi ungka ri powia anu ewanceʼe, inceʼemo katongawanya komi mampowiamo anu madago ungka ireʼimo, tabea!”

³⁰ Roo ndapapoiwo tau seʼe, metompamo tau seʼe njoʼu ri Antiokia. Kajela ntau seʼe njairia, ndapeboomo pura-pura waʼa anggota dompu mompasambaka, da ndapamparata bangani ncura setu.

³¹ Butu nabasa ntau seʼe bangani ncura setu, mawongko raya ntau seʼe madonge banganinya anu mampalindo raya ntau seʼe.

³² I Yudasi pai i Silasi setu seʼe waʼa nabi, masae pompasimbaju ntau seʼe pai waʼa anggota dompu ri Antiokia, mampakaroso pai mampakakoje raya ntau seʼe.

³³ Masae sakodi karoo-roo i Yudasi pai i Silasi njairia waʼa ntau meaya ri Antiokia mampapoiwo tau seʼe mewalili, tau seʼe mampakatu tabea anu da naparataka waʼa ntau anu mampokaumo tau seʼe. [

³⁴ Paikanya i Silasi tetaʼamaka maka da rayanya maroo-roo ri Antiokia.]

³⁵ Ewanceʼe seʼe i Paulu pai i Baranaba masae sakodi karoo-roonya ri Antiokia. Tau seʼe mompaguru pai mampetumbu Nuntu i mPue sangkani-ngkani pai waʼa ntau ntaninya.

Katepogaʼa i mPaulu pai Baranaba 15:36-41

³⁶ Bareʼe masae ungka njairia nasalemo i mPaulu i Baranaba natoʼo, “Maʼimo tapalai woʼu maluluwaka pelinjata owi, da madadu waʼa ntau anu meayamo ri Yesu ri waʼa ngkota anu roomo tapetumbuka nuntu i mPue; da tapeole bara ewambeʼi katedikanaka ntau seʼe.”

³⁷ Pampokono i Baranaba da ndapoyunu woʼu i Yohane Marakusi.

³⁸ Paikanya i Paulu bareʼe napokono da mampoyunu i Marakusi anu bareʼe napokono da motetala sangkani-ngkani pai tau seʼe, maka roomo napalaika tau seʼe owi ri Pampilia.

³⁹ Inceʼe puʼunya painaka mewalimo popaiso i mPaulu pai i Baranaba, ua posisala ntau seʼe painaka tepogaʼamo: I Baranaba moyunu pai i Marakusi mosumomba njoʼu ri Kiperu.

⁴⁰ I Paulu mampilisi i Silasi, nepa malai pai siʼa ri karoonya waʼa ngkasangkompo ri Antiokia mampepombaika tau seʼe ri puru ndaya i mPue.

⁴¹ Malaimo tau seʼe natolilimi tana Siria pai Kilikia, moliliwu mampakaroso raya dompu njairia.