Palaong mPomakau i mPue Yesu 12 - Sura Magali Nuntu Ngkatuwu

Kakoteranga-rangani pejeani 12:1-5

¹ Ri tempo setu natepuʼumo i Mokole Herode mangajeani waʼa anggota dompu.

² Nasongka tau mampepate i Yakobu kasangkompo i Yohane, ndasambale.

³ Ua nakita i Herode powianya setu mampakawongko raya nto Yahudi painaka nasongka woʼu tau da mancoko i Peturu, tempo setu sindara mPosusa Roti anu Bareʼe Ndaragi.

⁴ Roo ndasoko i Peturu nepa ndawunca ri raya ntarunggu. Aopo regu surodado anu ndapokau majagai i Peturu njairia – sambaʼa regu seʼe reʼe aopo surodado. Ane roomo posusa Pasa, nepa da nabotusi i Herode i Peturu ri suara ntau sondo.

⁵ Mewali i Peturu njau ri raya ntarunggu; paikanya waʼa anggota dompu bareʼe naowe-owe mampekakaika i Peturu ri Pue.

I Peturu napapesuwu malaʼeka ungka ri raya ntarunggu 12:6-19

⁶ Ri wengi anu ri kabangke ndemenya i Peturu da ndapapombesuaramo pai i Herode pai tau sondo, yoremo i Peturu seʼi metaka-taka rante ndapunguka palenya pai witinya, ri raya ntarunggu naparitongoti ncurodado radua anu majagai siʼa. Ri wombo ntarunggu njau woʼu surodado anu mojaga.

⁷ Tingkarasaka setumo malaʼeka i mPue mekakore ri sori i mPeturu, makilaya pai merara puju ngkoronya marememo sandaya lincu setu. Nanjua malaʼeka i Peturu, nalike natoʼo, “Pembangu pakaliga!” Liu-liu marudumo rante pungu mbiti pai pungu mpale i mPeturu.

⁸ Roo setu natoʼo malaʼeka, “Porengkomo, soʼo wayaa ntalupamu.” Morengkono i Peturu napesoʼoka wayaa ntalupanya. Nepa natoʼo woʼu malaʼeka setu, “Pataka jubamu pai lulumo yaku.”

⁹ Nalulumo i mPeturu malaʼeka setu mesuwu ungka ri raya ntarunggu. Paikanya bareʼepa tekiwoi i Peturu, naepe siʼa ewa podo ri raya mpekita ndaya.

¹⁰ Karoonya naliunaka topojaga kaʼisa pai karadua, ratamo tau seʼe ri boboka besi inceʼemo wobo njaya njoʼu ri kota. Teloka ngkalionya dampo mbombo setu, mesuwumo tau seʼe – nalulu ntau seʼe jaya kodi. Tingkarasaka malaʼeka setu mampalaika i Peturu.

¹¹ Nepa menaa raya i mPeturu, natoʼo, “Seʼi-seʼi kuincanimo, kamonconya i Pue anu mampokau malaʼeka setu da malapasaka yaku ungka ri pale i Herode pai ungka ri anu da napowia nto Yahudi ri yaku.”

¹² Ponawa-nawanya ewanceʼe, malaimo i Peturu njoʼu ri banua i Maria ine i Yohane anu karua ntoʼonya i Marakusi. Njau narata njairia waʼa ntau sondo mompasambaka mekakai.

¹³ Natoki i mPeturu dampo wombo anu ri suara, njoʼumo toporioko weʼa i Rode toʼonya maloka dampo.

¹⁴ Liu-liu naincani i Rode oni nganga i mPeturu. Nakeni ngkawongko ndayanya, bareʼepa naloka dampo mbombo, mewalili muni siʼa mampetumbuka waʼa ntau ri raya banua natoʼo, “Njau i Peturu ri sambalikunya.”

¹⁵ Natoʼo ntau seʼe, “Siko seʼi Rode wandomo! Paikanya natoʼo i Rode, monco kojo njau i Peturu. Natoʼo ntau seʼe incetu podo malaʼekanya!”

¹⁶ Sindara setu natoki mpaliu i mPeturu dampo mbombo, paloka ntau seʼe dampo mbombo, jingki kojo raya ntau seʼe mangkita i Peturu.

¹⁷ Naokotaka i mPeturu palenya da naka rodo tau seʼe. Nepa napatuntu ewambeʼi ndapampapesuwu i mPue Ala siʼa ungka ri raya ntarunggu. Roo setu natoʼo, “Nditoʼoka i Yakobu pai waʼa ngkasangkompo anu ntaninya woʼu.” Ungka lairia malaimo siʼa njoʼu ri sambakanya.

¹⁸ Bangke reme mesuamo waʼa ncurodado anu mojaga ri tarunggu, lingu raya ntau seʼe mampepewoloka nunjaa anu mewali pai i Peturu.

¹⁹ Napokau i Herode tau da mampepali i Peturu, paikanya bareʼe narata ntau seʼe siʼa. Mewali napokau i Herode da naka ndaparesa kojo waʼa ncurodado anu mojaga setu nepa ndapepate tau seʼe. Roo setu malaimo i Herode ungka ri Yudea njoʼu maroo-roo ri Kaisaria.

Kamate i Herode 12:20-25

²⁰ Maʼai kojo kajaʼa ndaya i Herode ri waʼa nto Tiru pai to Sidoni. Inceʼe painaka njoʼu tau seʼe sangkani-ngkani mampomberataka i Herode. Riu-riunya nakanarasi ntau seʼe i Balasitu anu mantadulakoni banua i Herode, da naka siʼa sambira pai tau seʼe. Nepa njoʼu sangkani-ngkani tau seʼe mampomberataka i Herode merapi da naka simadago muni, maka tau seʼe podo mancarumaka pangkoni ungka ri tana i Herode.

²¹ Mewali ri anu sandeme ri reme anu roomo ndapakanoto, i Herode mampataka rengko ngkamokolenya, nepa motunda ri gadera mpoparentanya, nepa mopidato siʼa ri suara ntau sondo.

²² Padonge ntau sondo pompau i Herode, meboo-boo tau seʼe marimbo oni nganganya natoʼo, “Inceʼi oni nganga i lamoa, banya oni nganga ntolino!”

²³ Ri tempo setu seʼe malaʼeka i mPue mantoposaka i Herode, maka siʼa bareʼemo mantubunaka i Pue Ala. Nakokoti ntolodo wayaa ngkomponya rantani mate.

²⁴ Kakoteranga-rangani karoso mpapobambarika Nuntu i mPue Ala.

²⁵ Roomo tetala i Baranaba pai i Saulu ri Yerusale, mewalili muni tau seʼe ri dompu ri Antiokia, napoyunumo i Yohane Marakusi sangkani-ngkani pai tau seʼe.