Palaong mPomakau i mPue Yesu 11 - Sura Magali Nuntu Ngkatuwu

I Peturu mampetumbu bambari ri Yerusale 11:1-18

¹ Tedongemo ri waʼa Ncuro pai ri waʼa ntau meaya ri tana Yudea kono waʼa ntau anu banya to Yahudi maayamo Nuntu i mPue Ala.

² Inceʼe puʼunya painaka kajela i mPeturu ri Yerusale, siʼa naposari waʼa nto Yahudi anu meaya, natoʼo ntau seʼe,

³ “Ara wenu painaka siko mesua ri banua waʼa ntau anu bareʼe ndasuna? Seʼi siko mangkoni sangkani-ngkani pai tau seʼe!”

⁴ Painaka napatuntu i mPeturu pura-pura anu mewalimo ungka ri tepuʼunya. Natoʼo i mPeturu,

⁵ “Ntongo mpekakai yaku ri Yope, yaku mangkita sambaʼa pekita ndaya ewa ayapa anu ndabini ndauyu ungka ri yangi, ndasoʼo ri sunonya aopomo seʼe, ayapa setu teʼonto ri soriku.

⁶ Kupeole waʼa anu njau ri rayanya, kukita waʼa mpinatuwu anu mowiti aopo, waʼa mpinatuwu anu maila, waʼa mpinatuwu anu menjoyo pai waʼa ntonci anu maila.

⁷ Nepa kudonge oni nganga anu mantoʼoka yaku, ‘Iomo peoko Peturu! Sambalemo pinatuwu setu nupangkoni!’

⁸ Paikanya mesono yaku, ‘Bareʼe Pue, bareʼepa kojo reʼe kupangkoni waʼa anu kapali bara karika setu.’

⁹ Paikanya kudonge woʼu oni nganga ungka ri yangi anu mantoʼo, ‘Nunjaa anu ndatoʼo i mPue bareʼe kapali neʼe nutoʼo kapali.’

¹⁰ Tatogo ngkani kukita pewalinya setu, kapusanya kukita teoretaka muni pura-pura ndeki suruga.

¹¹ Ri tempo setu karata ntau tatogo ri banua ngkareʼeku ungka Kaisaria anu ndapokau maʼi mantima yaku.

¹² Nepa napokau Inosa mPue Ala yaku da malai sangkani-ngkani pai tau setu, pantoʼo Inosa mPue Ala neʼe ipu-ipu rayamu malulu tau seʼe, pai waʼa ngkasangkompo anu aono seʼi woʼu loʼu mampoyunuki yaku ri Kaisaria. Pura-pura kami mesua ri banua i ngKoroneli.

¹³ Napatuntumo i ngKoroneli ri kami ewambeʼi pangkitanya malaʼeka mekakore ri banuanya anu mantoʼoka siʼa, ‘Pokaumo tau njoʼu ri Yope mampeboo tau sambaʼa i Simo Peturu toʼonya.

¹⁴ Siʼa da mantoʼoka komi nuntu anu da mancorepaka siko pai waʼa bangani ncomborimu.’

¹⁵ Natoʼo woʼu i mPeturu, ntongo-ntongo mpotuntu yaku ri tau seʼe, metudumo Inosa mPue Ala ri waʼa ntau seʼe, ewa petudunya ri kita, ri pontepuʼunya owi.

¹⁶ Nepa kono naendo, reʼe pantoʼo i mPue, ‘I Yohane mampopariuka ue, paikanya komi da ndariuka Inosa mPue Ala.’

¹⁷ Mewali tongawa i Pue Ala mawai woʼu Inosaa ri waʼa ntau anu bareʼe moʼagama Yahudi. Siwia pai anu ndawaika kita ua peayata ri Yesu Kerisitu. Inceʼe puʼunya ewambeʼi painaka da kupetangani i Pue Ala!”

¹⁸ Padonge ntau seʼe totoraka i mPeturu ewanceʼe manotomo raya ntau seʼe, bareʼemo nakoto ntau seʼe mancapu. Naunde ntau seʼe i Pue Ala natoʼo, “Ane ewanceʼe waʼa ntau anu banya to Yahudi woʼu ndawai i mPue Ala tempo da majea ungka ri waʼa ncalaanya pai da naparata anu monco!”

Dompu ri Antiokia 11:19-30

¹⁹ Karoonya ndapepate i Setepanu, ndadudukimo waʼa ntau anu meaya ri Yesu, painaka tewuragamo tau seʼe tesebu kanjoʼu mpalainya. Reʼe anu molonco njoʼu ri Fenesia, pai reʼe woʼu anu jela ri Kiperu pai Antiokia. Tau seʼe mampobambarika nuntu mPue Ala podo ri waʼa nto Yahudi.

²⁰ Paikanya reʼe ri oyo ntau meaya anu ungka ri Kiperu pai Kirene anu ndeku ri Antiokia, mampetumbu Nuntu ngKatuwu kono i Yesu ri waʼa ntau anu bareʼe moʼagama Yahudi woʼu.

²¹ Kuasa i mPue mayunuki tau seʼe painaka maria tau anu maayamo i Pue pai mampepombaikamo katuwunya ri Pue.

²² Pura-pura anu mewali setu tedongemo ri dompu i mPue anu lau ri Yerusale. Inceʼe puʼunya painaka napokau ntau seʼe i Baranaba ndeku ri Antiokia.

²³ Kajela i Baranaba ri Antiokia, nakita ewambeʼi padonco i mPue Ala tau seʼe, mawongko kojo rayanya. Natoʼoka tau seʼe da naka monco-monco kojo pepoʼinaya ntau seʼe ri Pue Ala ungka-ungka ri rayanya.

²⁴ I Baranaba seʼi tau madago raya pai nakuasai Inosa mPue Ala, naaya kojo i Pue Ala painaka sondo tau anu meaya ri Pue.

²⁵ Ungka lairia malaimo i Baranaba njoʼu ri Tarusu mampepali i Saulu. Narata i Saulu njairia nepa napoyunu maʼi ri Antiokia.

²⁶ Santaʼu muntu karoo-roo ntau seʼe ri dompu njairia maria tau anu napaguru ntau seʼe. Ri Antiokia seʼimo pontepuʼunya tau anu meaya ri Yesu ndatoʼo, to Kerisitu.

²⁷ Sindara setu jelamo bara tesangkuja nabi ungka ri Yerusale ri Antiokia.

²⁸ Ri oyo ntau seʼe reʼe sambaʼa anu mampotoʼo i Agabu. Ua popanini Inosa mPue Ala mompau siʼa natoʼo kono kareʼe oro bangke ri sambawo lino. (Pai inceʼe lawi mewali kojo ri tempo mpoparenta i Datu Kalaudiu.)

²⁹ Mogombo waʼa anaguru i Yesu, sintuwu tau seʼe da mampakatu petulungi ri waʼa ngkasangkompo anu njau ri tana Yudea! Sambaʼa-sambaʼa seʼe mompakatu malulu gori mpangkotonya.

³⁰ Tepasambaka kojo waʼa mpetulungi setu, nepa napokau ntau seʼe i Baranaba pai i Saulu da mangkeni rata ri waʼa ntadulako dompu.