Palaong mPomakau i mPue Yesu 10 - Sura Magali Nuntu Ngkatuwu

Peturu pai Koroneli 10:1-33

¹ Ri Kaisaria lau sambaʼa tuama i Koroneli toʼonya. Siʼa sambaʼa Kapite “Ncurodado nto Italia”.

² Siʼa sambaʼa tau anu mampokaeka i Pue Ala. Maria petulunginya ri waʼa nto Yahudi anu kaasi-asi pai siʼa madoyo mekakai ri Pue Ala.

³ Ri anu sandeme tempo-temponya tinti tatogo tepile reme, yosa kojo pangkitanya ri pekita ndayanya, reʼe sambaʼa malaʼeka mPue Ala mampeboo siʼa natoʼo, “Koroneli!”

⁴ Napeole i ngKoroneli malaʼeka setu seʼi maeka rayanya, natoʼo, “Nunjaa Pue?” Mesono malaʼeka setu, “Pekakaimu pai kapande ndayamu ndatarimamo i mPue Ala, pai ndaendomo i mPue Ala siko.

⁵ Seʼi-seʼi pokaumo tau njoʼu ri Yope mampeboo i Simo, toʼonya kojo i Simo Peturu.

⁶ Siʼa njau melinggona ri banua i Ncimo, to poronu pela anu mosu ri wiwi ntasi.”

⁷ Roo mompau malaʼeka setu pai Koroneli, njoʼumo i Koroneli mampeboo anamayununya radua pai sambaʼa surodado anu mayoa rayanya.

⁸ Napatuntu i ngKoroneli ri tau seʼe nunjaa anu mewali setu nepa napokau tau seʼe njoʼu ri Yope.

⁹ Bangke reme njoʼumo kojo tau anu napokau i ngKoroneli, bepa rata tau seʼe ri Yope, i Peturu mepone ri kataba banua da mekakai.

¹⁰ Sindara setu naepe maoromo komponya da rayanya mangkoni. Pangkoni ntongo napatoka ntaliwanua. Siʼa mangkita sambaʼa pekita ndaya.

¹¹ Nakita teloka yangi pai nakita maʼi ewa ayapa ndabini teuyu ri lino, teloe-loe ua ndasoʼo ri sunonya aopo.

¹² Ri rayanya lau mpengaya-ngaya pinatuwu anu mowiti aopo anu menjoyo sangkani pai waʼa ntonci anu maila.

¹³ Nepa nadonge oni nganga anu mantoʼoka siʼa, “Peturu, peoko! Sambalemo nupangkoni!”

¹⁴ Paikanya mesono i Peturu, “Bareʼe Pue, bepareʼe kupangkoni mau sangkani pangkoni anu kapali pai karika.”

¹⁵ Nadonge woʼu oni nganga setu mantoʼoka siʼa, “Nunjaa anu ndatoʼo i mPue bareʼe kapali, neʼe boi nutoʼo kapali.”

¹⁶ Tatogo ngkani pewalinya ewanceʼe, nepa teoretaka muni ayapa setu ndeki suruga.

¹⁷ Monawa-nawa i Peturu, natoʼo ri rayanya nunjaa posokinya anu nakita setu. Sindara mponawa-nawanya ewanceʼe jelamo ri boboka tau anu napokau i ngKoroneli, naratamo banua i Ncimo pai tau seʼe laumo ri wobo dampo.

¹⁸ Napeboo ntau seʼe tau sambaʼa, nepa napeoasi, “Bara reʼe ireʼi linggona anu mampotoʼo i Simo Peturu?”

¹⁹ Ntongo mponawa-nawa i Peturu kono posoki pekita ndaya setu, mompaumo Inosa mPue Ala ri siʼa natoʼo, “Ee Peturu, lau tau tatogo mampepali siko.

²⁰ Peokomo pakaliga, neʼe ipu rayamu lulumo tau seʼe, maka Yaku anu mampokau tau seʼe.”

²¹ Liu-liu menaʼu i Peturu, natoʼoka waʼa ntau setu, “Yakumo anu maʼi ndipepali. Nunjaa anu ndikamaʼika?”

²² Mesono tau seʼe, “I Koroneli tadulako ncurodado anu mampokau kami maʼi ireʼi. Sira tau madago raya pai mepoʼinaya ri Pue Ala. Sira woʼu natubunaka waʼa nto Yahudi. Reʼe sambaʼa malaʼeka i mPue Ala, mampokau Sira da mamperapi komi da loʼu ri banuaa, kamonconya inceʼemo sono mpekakaia. Sira ndapokau da naka mampedongeka nunjaa anu da nditoʼoka Sira.”

²³ Nataʼamaka i mPeturu tau seʼe setu sambengi njairia. Bangke reme malaimo i Peturu sangkani-ngkani pai tau ndapokau setu. Reʼe woʼu bara tesangkuja tau anu meaya ri Yope mampoyunuki siʼa.

²⁴ Sandeme setu seʼe jelamo tau seʼe ri Kaisaria. Lawi napopopeamo i ngKoroneli da kajela ntau seʼe. Waʼa ngkasangkomponya pai waʼa bale-balenya njaumo pura-pura tepasambaka.

²⁵ Karata i mPeturu njairia, nasuncumo i ngKoroneli, mombukotu siʼa ri suara ri mPeturu.

²⁶ Paikanya napapeoko i mPeturu siʼa natoʼo, “Peoko! Yaku seʼe woʼu tolino.”

²⁷ Seʼi mompasimbaju siʼa pai i Koroneli, mesuamo i Peturu ri raya banua. Nakita njau tau sondo mompasambaka.

²⁸ Natoʼo i mPeturu ri tau seʼe, “Lawi ndiincanimo, malulu ada agama nto Yahudi, to Yahudi bareʼe maya da maogalo-galo pai tau anu banya to Yahudi. Paikanya i Pue Ala mampapakitaka yaku da naka neʼe kutoʼo kapali anu ndatoʼo i mPue Ala bareʼe kapali.

²⁹ Inceʼe puʼunya painaka ndipamperapi yaku da maʼi madadu komi, bareʼe reʼe kabarataku. Mewali seʼi da rayaku maincani nunjaa puʼunya painaka ndipeboo yaku.”

³⁰ Mesono i Koroneli natoʼo, “Tatogo ndeme liu sindara yaku mekakai tinti tatogo tepile reme ri banuaku, tingkarasaka mekakore sambaʼa tuama ri suaraku. Rengkonya makilaya.

³¹ Natoʼoka yaku, ‘Koroneli! Pekakaimu ndapedongeka i mPue Ala pai ndaendomo kapande ndayamu.

³² Mewali pokaumo tau njoʼu ri Yope mampeboo tau sambaʼa anu mampotoʼo i Simo Peturu. Siʼa njau ri banua nto poronu pela i Simo toʼonya, banuanya reʼe ri wiwi ntasi.’

³³ Inceʼe painaka maliga-liga kupokau tau mampeboo komi. Pai tongawa kojo kabuya ndayami maʼi ri kami pura-pura anu tepasambaka seʼi ri suara mPue Ala da mampedongeka pura-pura anu ndapepokauka i mPue Ala da nditoʼoka kami.”

Potuntu i mPeturu 10:34-43

³⁴ Natepuʼumo i mPeturu motuntu natoʼo, “Seʼi-seʼi kurata ndayamo, i Pue Ala siwia-wia ndapampeole tau.

³⁵ Tau anu mampokaeka i Pue Ala pai monco powianya inceʼe anu ndapokono i mPue Ala, bareʼe ndapilisi bara ungka ri lemba mbeʼi.

³⁶ Ndiincanimo ewambeʼi nuntu i mPue Ala anu ndaparataka to Isaraeli. Nuntu setu inceʼemo Nuntu ngKatuwu kono kasimadago ua i Yesu Kerisitu. Siramo Pue ntau pura-pura.

³⁷ Sangaya-ngaya ndiincanimo ri sambawo ntana Yudea, anu montepuʼumo ungka ri Galilea, karoonya popariu anu napepokauka i Yohane.

³⁸ Ndiincanimo kaʼi Pue Alanya mampilisi i Yesu to Nasare, ndawaikamo Sira Inosa-A pai kuasa-A. Ndiincanimo i Yesu roomo moliliwu ri mbeʼi-mbeʼi. I Pue Ala anu mayunuki Sira mampakaʼosa waʼa ntau anu nakuasai i Majaʼa.

³⁹ Kamimo waʼa ntau anu mangkita pura-pura anu roo ndawianaka ri tana nto Yahudi pai ri kota Yerusale. Mau ewanceʼemo napepate ntau seʼe Sira.

⁴⁰ Paikanya ri katatogo ndemenya ndapapembangu muni Sira ungka ri kapate, nepa mepapamara Sira ri tolino.

⁴¹ Sira mepatongawa banya ri pura-pura tau paikanya ri kami anu roomo ndapilisi i mPue Ala da mewali sabi-A. Kami mangkoni pai manginu sangkani-ngkani pai Sira ri karoonya membangu Sira ungka ri kapate-A.

⁴² Pai Siramo anu mampokau kami da mampetumbu Nuntu ngKatuwu ri pura-pura tau pai da mangasabi kamonconya Siramo anu ndapakanoto i mPue Ala mewali to pobotusi huku ntau tuwu pai tau mate.

⁴³ Pura-pura waʼa nabi mantoʼo kono Sira. Natoʼo ntau seʼe pura-pura tau anu meaya ri Yesu bareʼemo da ndakitanaka salaanya ua kuasa Yesu.”

Waʼa ntau anu banya to Yahudi mantarima Inosa mPue Ala 10:44-48

⁴⁴ Ntongo motuntupa i Peturu, metudumo Inosa mPue Ala ri waʼa ntau anu mampedongeka potuntunya setu.

⁴⁵ Waʼa nto Yahudi anu meayamo ri Yesu anu mampoyunuki i Peturu ungka ri Yope, jingki raya ntau seʼe pura-pura mangkita, i Pue Ala mawaimo Inosa-A ri waʼa ntau anu banya to Yahudi.

⁴⁶ Maka nadonge waʼa ntau setu mompaumo ri mpengaya-ngaya basa maunde-unde kabangke mPue Ala. Nepa natoʼo i mPeturu,

⁴⁷ “Koisa ndipeole! Waʼa ntau seʼi maratamo Inosa mPue Ala ewa kita. Mewali ewambeʼi da tapampetangani tau seʼe da ndariuka ue?”

⁴⁸ Napokau i mPeturu tau seʼe da ndariu ri toʼo i Yesu Kerisitu. Roo setu naperapi ntau seʼe i Peturu da maroo-roo pai tau seʼe bara tesangkuja ndeme.