2 Timotius 4 - Sura Magali Nuntu Ngkatuwu

¹ I Kerisitu Yesu da wali ngkarata muni ri lino seʼi da mabotusi huku ntau tuwu pai tau mate; pai Sira da rata ewa Datu anu da moparenta. Inceʼe painaka kuperapi kojo ri siko ri suara i mPue Ala pai Kerisitu Yesu.

² Mbolimo siko mampobambarika Nuntu ungka ri Pue Ala, tuarapa bareʼe bali-bali katoka ndayamu ri tempo anu madago bara bareʼe. Pakaroso raya ntau, tujuka kasalanya, pai da nuʼiowaka tau seʼe. Da nupagurumo tau ri gori-gori ngkanondo ndayamu.

³ Maka reʼe temponya bareʼemo da napokono ntau mampedongeka pompaguru anu monco. Paikanya tau seʼe da malulu pepokono ndayanya ngkalionya, pai da mampasambaka guru anu sondo da mampaguruka tau seʼe mpengaya-ngaya anu mawongi nadonge ntalinga ntau seʼe.

⁴ Bareʼemo da napokono ntau seʼe mampedongeka anu monco paikanya da nataʼa mpodago talinganya mampedongeka waʼa laolita anu pontopanyamo.

⁵ Mau ewanceʼe siko da todo ri mpengaya-ngaya katedikanaka. Katodomu ri raya ngkapari, wianakamo tetalamu ewa sambaʼa topongkeni Nuntu ngKatuwu setu pai wianakamo gori ngkadagonya waʼa ntetalamu ewa toporioko i mPue Ala.

⁶ Kono yaku, ratamo temponya, yaku da mate ewa sambaʼa panyomba ri Pue Ala. Bareʼemo masae da kupalaikamo lino seʼi.

⁷ Yaku malulumo posilumba ri gori-gori ngkatimamanya pai ratamo ri ungkanya. Yaku todo ri Kerisitu rata ri kapusanya.

⁸ Seʼi-seʼi saro mpenangiku mampopea yaku. Ri Eo Kiama, I Pue, Topobotusi anu mayoa da mawaika yaku saroku setu, maka madago pokentaku pai i Pue Ala. Pai banya podo yaku anu da marata saro setu, paikanya pura-pura tau anu mampopopea karata i mPue ri kaʼai ngkamawo ndaya.

Waʼa mpatada kapusanya 4:9-18

⁹ Pepalika jaya da naka ronga jela siko madadu yaku,

¹⁰ maka i Demasi mampalaikamo yaku ua pampomawonya lino seʼi, siʼa payamo njoʼu ri Tesalonika. I Kerekesi payamo njoʼu ri Galatia pai Titu njoʼu ri Dalamatia.

¹¹ Podo i Lukasi anu seʼi maroo-roo pai yaku. Da njoʼu nutima i Marakusi pai poyunukaku siʼa ri maʼi maka siʼa da mantulungi yaku ri jaya ntetalaku.

¹² Roomo kupokau i Tikiku njoʼu ri Epesu.

¹³ Ane maʼimo siko, kenikaku manteliku anu kupalaika ri banua i ngKarapu. Da nukeni woʼu waʼa ncuraku, pagonya waʼa ncura anu ndapowia ungka ri karatasa pela.

¹⁴ I Alesande, topompalu tambaga setu, maria ngaya kojo powianya anu majaʼa ri yaku. I Pue da mampesawaki ri siʼa silulu pai powianya.

¹⁵ Siko seʼe sangaya-ngaya da nusoro-soro siʼa, maka maʼai kojo paewanya nuntu anu tapetumbu.

¹⁶ Ri kupampesonoka uyu-uyunya kono kara-karaku, bereʼe sako sambaʼa tau anu mampoyunuki yaku; pura-pura mampalaika yaku. Tuarapa bareʼe da ndapetisala i mPue Ala tau seʼe ri powia ntau seʼe ewanceʼe.

¹⁷ Paikanya i Pue anu maaweri yaku. Sira mawaika yaku roso pai kupangkoto mampobambarika pura-pura Nuntu ngKatuwu setu, da napadonge waʼa ntau anu banya to Yahudi. Pai yaku lapa ungka ri karugi anu mangkeni kapate.

¹⁸ Lawinya i Pue da malapasaka yaku ungka ri pura-pura powia ntau anu majaʼa ri yaku. Sira da mangkeni yaku madago-dago ri raya mpoparenta ncuruga. Tuarapa Sira anu da mampapeawa rantani masae-sae! Ami.

Tabea kapusanya 4:19-22

¹⁹ Tabeaku rata ri Parisikila pai Akila pai ri waʼa ntau ri sombori i Onesiporu.

²⁰ I Erasitu maroo-roo ri Korinti pai i Teropimu njau kupalaika ntongo ngkajuʼa ri Miletu.

²¹ Pari-pari kojo da naka jelamo siko ri kabareʼepanya rata tempo ngkaranindinya. I Ebulu, i Pudesi, i Linusi pai Kalaudia tau seʼe mampakatu tabea rata ri siko; ewanceʼe seʼe pura-pura waʼa ngkasangkompo anu sambaʼa-mbaʼa mpeaya anu ntaninya.

²² Mbolimo i Pue da maaweri siko. I Pue da mangadonco komi pura-pura! Petubunaka ungka ri kami, Paulu