YESAYA 1 - KITABI HABARI MOPIOHE

¹ Buku botie tuatuanga tataa-huliyaalo pasali lo Yehuda wau Yerusalemu u piloi̒laalo Allahu Taa̒ala odelei Yesaya, walae̒e Amos, tou̒ tei Ujia, Yotam, Ahas wolei Hiskia hemo malenta to Yehuda.

Allahu Taa̒ala helodini umati-Lio

² Podungohulo wuu hulungo, poo̒tuotalo wuu dunia! Eeya lotahuda, “Tau̒kekeei̒ tamaa dilaaha-U̒ helo malakala to Olau̒.

³ Sapi moo̒onuhe taa ohuu̒wolio, kolodai moo̒onuhe tambati lo ua̒alo pilopo dapato lituanilio. Bo umati-U̒ Isirai̒lu diila; timongolio diila mongalati.”

⁴ Matopotala timongoli bangusa tao̒dusa, tau-tauwalo tahi luusawa wau moleeto. Timongoli malodehu ode delomo duduu-sawaalo limongoli. Timongoli malo potouli to Eeya wau mailulea limongoli Allahu Taa̒ala Laba-labaalo mantali tamusi tuboo limongoli.

⁵ Yilongola timongoli tulusi wambao̒ hemobatata? Tingga mohuto timongoli moo̒toduo hukuumani ulebe mobuheetao̒? Lunggongumu malopolu wolo bohe olaala mohutodu, hilaa wau pikiilangimu mopalato.

⁶ Monto lunggongo demola paladu oa̒ato diaaluo u seehati to wawaau̒mu. Timongoli polupolu lo himata-matanga, hibula-bulade wau hipali-palia. Papaa-liyaalo limongoli boito diipo pilobelesi meaambo pilolobani, diila olo yilunemo wolo winulo.

⁷ Lipumu mapilopo binasa; kokootaamu pilobu yilaahulo mao̒. Totalu lomatomu taa deli lohama hutamu wau helo ngaantulu totoonulalo u hitua-tuawua.

⁸ Bolo Yerusalemu u leitolaa, bo odelo kota u maleibala wau diilalo okawasa, debo odelo bele hitopo-topoa to ilengi lo angguru meaambo wombohe to ilengi lokatimu.

⁹ Humayaalio Eeya Taa Laba-labaalo kawasa diila lolopata deengolo lota ode olanto, ito mabilinaasa sama-samaata, debo odelo Sodom wau Gomora.

¹⁰ Yerusalemu, mongo tau̒wa wau bangusaamu malowali debo odelo taulo Sodom wau Gomora. Dungohilo wolo u pilotahuda lo Eeya olemu; poo̒tuotalo wolo upilo ngaajali mai lo Allahu Taa̒ala olanto.

¹¹ Eeya lotahuda mai, “To lantobumu Wau̒ motohilaa to ngoa̒amila bake u mololaalaaita hepo dewomu ola-U̒? Wau̒ madiilalo mohutu wolo hihii-mbawaalo bake yilalangumu wau tabo walao̒ sapimu. Duhu losapi ulai̒, himba wau batade diila otohilaa-U̒.

¹² Tatoonu talopoa̒hu olimongoli lodelo totoonulalo dewo boito tou̒ timongoli mai lotabia to ola-U̒? Tatoonu talopoa̒hu olimongoli odito mota odia mai to Bele Mantali-U̒?

^13-14 Diila ohuna wambai̒o helodelo dewoomu boito. Wau̒ mongingi wolo boolio. Wau̒ molonuo̒ wau diila loo̒taahangi loo̒onto olimongoli hemo porame Hulala Bohu, duduu-laheyaalo Sabaati wau duduu-laheyaalo buka wau duduu-nggayawalo agama. Ngoa̒amila boito hetilambio̒ limongoli wolo duduu-sawaalo limongoli wau debo odelo banta Olau̒; Wau̒ maloongolo lomanta mao̒.

¹⁵ Wonubolo timongoli momintaa̒ uluu̒ limongoli u modua̒, Wau̒ diila mohuto mopoo̒tuotai. Diila pandungi ngoolo mola daata lodua̒amu, Wau̒ diila mohuto modungoheo̒, sababu wolo uluu̒ limongoli boito timongoli madilaata helomate yila-yilateelo mao̒.

¹⁶ Wuloilo batangamu tunggula belesi. Huheelia mao̒ ngoa̒amila ololeeto u pilohutu limongoli boito. Ooo̒, diilalo pohutu u moleeto,

¹⁷ pobalaajalilo mohutu u mopiohu. Potulideelo uaadili; wau yinggilalo polodeehe; wohia mao̒ to tadidu otiilo otiyamo haku limongolio wau poduulua mao̒ palakala lomongo janda.”

¹⁸ Eeya lotahuda mai, “Dulo ito mopobelesi palakala botie. Eleponu timongoli meela jingga sababu duduu-sawaalo limongoli, timongoli mabuboa̒a-U̒ mowali moputio̒ belesi debo odelo pini. Eleponu duduu-sawaalo limongoli dadaata wau mobuheeto, timongoli maa ambunguwo-U̒ lealeaatulo mao̒.

¹⁹ Wonu timongoli mohuto modungohe to ola-U̒, timongoli mamoo̒ toduo mai ngoa̒amila u mopiohu u tilapulao̒ lo lipumu.

²⁰ Bo wonu timongoli moluwali ola-U̒, timongoli maamate todelomo popaatea. Wau̒, Eeya, malo tahuda mai.”

Kota lomaahu parenta

²¹ Kota u muloololio mai tatapu wau molotolo hilao, botia debo odelo ngotaalio lo tasuuntali! Muloololio mai ngoa̒amila ulipulio aadili wau motulidu hilao, bo botia mapilo tibiluloa̒ lo tahi pomatea mate-mateelo mao̒.

²² Yerusalemu, muloololio mai yio̒ debo odelo talaa̒, bo botia diilalo ohalaga. Muloololio mai yio̒ debo odelo angguru u motabo, bo botia bolo taluhu wambai̒o.

²³ Mongo tau̒wamu tamoo-malakalaawa wau wakili lo tamootao̒wa; timongolio mohuto mololimo palaseni wau doi sooloi̒. Timongolio diila mohuto mopoduulua tadidu otiilo otiyamo to bubutoo̒; diila mohuto modungohe dudulohu lomongo janda.

²⁴ Sababu uito Eeya Taa Laba-labaalo kawasa, Allahu Taa̒ala lo Isirai̒lu lotahuda mai: “Wuu, mumuusuu-U̒, Wau̒ mamolontuli mai olimongoli, tilinggula timongoli diilalo moposuusa ola-U̒.

²⁵ Wau̒ mamohutu mai olimongoli. Debo odelo taa u mopobelesi logamu, timongoli pobelesiyo-U̒; totoonulalo u kootolo mainggilo-U̒ monto olemu.

²⁶ Timongoli mamuli wohiya-U̒ mai mongo hakimu wau tamoo-nasehatia debo odelo muloololio mai. Yi Yerusalemu mau̒nteelo kota u aadili wau tatapu molotolo hilao.”

²⁷ Eeya aadili, yi Eeya mamo poa̒ahu Yerusalemu wau tau-tau-Lio tamolee̒e.

²⁸ Bo tau-tauwalo odusa tahelo malakala to Eeya mapo binasaa-Lio, wau ngoa̒amila talo lolaa to Eeya maa̒antuluo-Lio.

²⁹ Timongolio mamoo̒ toduo woolito sababu hemolubo bubuu-ngowaalo ayu wau hemopo-tolomodu ii̒i-lengiyaalo ode dedeewaalo.

³⁰ Timongolio mamowali debo odelo bungo lo ayu leidaa̒ u mololante duungio, wau debo odelo ilengi udiila yilohia taluhu.

³¹ Debo odelo laato mopobu lo polotio̒ tulu, odito olo tau-tauwalo okawasa mapobinasaa lo totoonulalo huhutu limongolio lohihilao, wau diaaluo tamoo̒ pohuheli mao̒ oa̒antulu boito.