YEREMIA 1 - KITABI HABARI MOPIOHE

¹ Buku botie tuatuanga tataa-heyaalo lei Yeremia walae̒e Hilkia, tala ngota iimamu lonto kota Anatot to madala lei Benyamin.

² Eeya lotahuda mai odelei Yeremia to taunu opulaa tolulio pamalenta lei Yosia walae̒e Amon olongia lo Yehuda.

³ Lapatao̒ uito Eeya luli lotahuda olio wuwuulia mola, tumulalo mai tomaasa pamalenta lei Yoyakim walae̒e Yosia demola taunu mopulaa tuwau pamalenta lei Jedekia walae̒e Yosia. To hulalo olimolio to taunu boitolo ulipu lo Yerusalemu bilintai̒o mota ode polayahu.

Titiango odelei Yeremia

⁴ Eeya lotahuda mai odelaatia,

⁵ “Tou̒ Wau̒ diipo lopowali mai olemu todelomo talomo liilamu, wau tou̒ yio̒ diipo pilotutulio mai, Wau̒ malo lulaota olemu wau lomudua̒ olemu u lowali nabi ode babaa-ngusawalo.”

⁶ Watia lolametao̒, “Yaa Eeya Taa Laba-labaalo molanggato, watotia diila motota mobisala sababu watotia donggo humula daa̒.”

⁷ Bo Eeya lolametai, “Diila mao̒ poloi̒ya yio̒ donggo humula daa̒. Wonu Wau̒ molao olemu penu boli olo tatoonu, yio̒ musi monao̒, wau ngoa̒amila u pei̒ polele-U̒ olemu, mamusi potunggulomu ode limongolio.

⁸ Diila mao̒ oohe olimongolio, sababu Wau̒ mapee̒-pee̒enta wolemu u moduo̒lai olemu. Wau̒, Eeya malo tahuda mai!”

⁹ Lapatao̒ uito Eeya lohudu mai uluu̒-Lio, wau lodedeta tunggiluu̒ tulusi lotahuda mai, “Dungohilo wau pomalaa-lumualo tataa-heyaalo upilo tahudaa-U̒ mai botie.

¹⁰ To dulahee botie Wau̒ mongohi mai olemu kawasa ode babaa-ngusawalo wau yiyii-laidiaalo – kawasa u mopolohubu wau mopoa̒ntulu, u mopowulide wau mopobinasa, u momongu wau mopomulo.”

Duluo bibilohu

¹¹ Eeya lohintu mai olaatia, “Wolo u iloontongamu Yeremia?” Watia lolametao̒, “Tango bungo lo ayu badam, Eeya.”

¹² “Otutu,” tahuda lo Eeya, “Wau̒ modaha alihu ngoa̒amila upilo tahudaa-U̒ mai mowali moi̒laalo.”

¹³ Lapatao̒ Eeya luli lohintu mai olaatia, “Wolo poli u luli iloontongamu?” Watia lolametao̒, “To wimbihu tilayo iloontonga lowatia ulongo u tuangio donggo lombu-lombula wau ngopee̒ lobulinggayanga odia mai.”

¹⁴ Eeya lotahuda mai, “Monto tilayo baala mamolepatai wau molemba ngoa̒amila tuango lipu botie.

¹⁵ Wau̒ mamopoa̒hu ngoa̒amila bangusa to ambahu tilayo monao̒ mai mokawaasa mao̒ Yerusalemu. Didii-ngingaalo meeseli topalito kota botie wau huhuu-hebuwaalo hulubangilio wau ngoa̒amila kota to Yerusalemu mahamaa limongolio.

¹⁶ Wau̒ mamo hukuumani mai umati-U̒, sababu timongolio odusa wau helo bulemenga ola-U̒. Timongolio malo podewo bake ode ila-ila wewo, wau helohutu bubuu-iyaalo wau helolubo mao̒.

¹⁷ Potidapatolo, Yeremia! Ponao̒lo wau potunggula mota ode limongolio, ngoa̒amila u pilohu-U̒ mai olemu. Diila mao̒ oohe toli mongolio, alihu yio̒ diila pohutuwo-U̒ mai lebe moohe poli wonu motaalua woli mongolio.

^18-19 Dungohilo! Yio̒ mateehengio lo tuango lipu botie, deu̒yito-yito mongo olongia lo Yehuda, tahidihuma pantungo lo pomalenta, mongo iimamu, wau ulipu. Bo to dulahee botie Wau̒ mamongohi mai lotolo olemu u moluwali olimongolio. Yio̒ mamowali debo odelo kota obiintengi, debo odelo wolihi wate wau dingingo meeseli tombaha. Timongolio diila tamowali mopoo̒laahe olemu, sababu Wau̒ mapee̒-pee̒enta wau moduo̒lai olemu. Wau̒, Eeya, malo tahuda mai.”