MARKUSI 8 - KITABI HABARI MOPIOHE

Ti Isa lopotamela tawopato lihu lota

¹ Diila lohiheo lapatio mao̒ woluo poli taa ngopo lemboa̒ dadaata lonao̒ mai lotia̒mbu. Sababu timongolio diila o ua̒alo, ti Isa malo tiangai tahidudua̒ o-Lio wau lotahuda mao̒,

² “Lodehu hilaa-U̒ totaa dadaata botie. Matolohui hiheolio timongolio wola-U̒, wau botia timongolio mai̒lo pulita lou̒ aalo.

³ Wonu Wau̒ mopowalinga mota olimongolio wolo ombongo hipolaanga, timongolio mao̒leeta lohilao tohuungo dalalo. Tidiyolo mao̒ towolota limongolio woluo talonto u molamingo.”

⁴ Tahidudua̒ li Isa lolametao̒, “Totambati u tihitihi mai botie, tou̒toonu mowali poo̒tapulalo ua̒alo mowali moo̒tuheto totaa ngoa̒amila botie?”

⁵ “Ngoolo mao̒ daatalio roti to limongoli?” yilintu li Isa. “Pitu lobotu,” tametao̒ limongolio.

⁶ Yi ti Isa lopoa̒hu totaa dadaata boito lotihuloa̒ tohuta, tulusi Tio lohama roti pitu lobotu boito wau lolapali mola sukuru ode Allahu Taa̒ala. Lapatao̒ Tio lomita-mitangao̒ roti boito wolo uluu̒-Lio wau yilohi-Lio ode tahidudua̒ o-Lio alihu taya-tayadulio mota ode tau-tauwalo. Yi tahidudua̒ o-Lio malohutu odito.

⁷ Timongolio olo o uponula kekeei̒ dengolo botu. Ti Isa lolapali mola sukuru ode Allahu Taa̒ala to uu̒u-ponulaalo boito, lapatao̒ lopoa̒hu to tahidudua̒ o-Lio helo laya-layadeo̒ olo uu̒u-ponulaalo boito olo.

^8-9 Timongolio lolamelo tunggula lobutuhu – woluo tanu wopato lihu lota talo lamelo. Lapatao̒ tahidudua̒ li Isa lohimoa̒ lebelio lou̒ aalo – pitu lokalanji hipolua. Tulusi ti Isa helo poa̒hu totau-tauwalo boito lohualingo,

¹⁰ wau Tio wolo tahidudua̒ o-Lio lato lotitae̒ tobulotu wau lonao̒ ode madala Dalmanuta.

Tau-tauwalo Parisi mei̒hutu li Isa u moo̒linggolabe

¹¹ Dengolo lota taulo Parisi lonao̒ mai odeli Isa, wau helo hahaamawa wo-Lio u mohentabu olio. Timongolio mei̒hutu li Isa u moo̒linggolabe odelo tuoto deu̒ Tio lonto Allahu Taa̒ala.

¹² Ti Isa lopoi̒laalo suusa tulusi lolametao̒, “Wolo sababuulio tau-tauwala tojamani botie mei̒hutu ola-U̒ u moo̒linggolabe? Diila! Wau̒ diila tamongohi tuoto odelo uito ode limongolio!”

¹³ Lapatao̒ ti Isa lololaa mao̒ olimongolio, wau tilumuwoto ode delomo bulotu; tulusi lobite ode ngotuwali lobulalo boito.

Ragi tau-tauwalo Parisi wau lei Herodes

¹⁴ Tahidudua̒ li Isa loo̒lipato lodelo roti u tutuu̒de. Timongolio bo wambao̒ oroti ngobotu tobulotu.

¹⁵ “Poo̒daha-dahaalo mao̒ toragi tau-tauwalo Parisi wau ragi lei Herodes,” tahuda mao̒ li Isa ode limongolio.

¹⁶ Yi tahidudua̒ li Isa boito mahipo bisalawa losua̒li boito. Timongolio hipo loi̒yawa, “Tio loloi̒ya odito, sababu ito diila oroti,”

¹⁷ Otaawa li Isa wolo u heposua̒lia limongolio. Sababu uito Tio lohintu mao̒ olimongolio. “Yilongola timongoli hemopo sua̒li pasali diila oroti? Wolo diila otaawa limongoli wau debo diipo mongalati olo? Odito puntuhu pikiilangimu?

¹⁸ Timongoli omato – yilongola diila moo̒onto? Timongoli obulonga – yilongola diila modungohu? Madiila iloe̒ela mola limongoli

¹⁹ toroti limo lobotu boito u mapili-pilitangu-U̒ ode talimo lolihu lota? Ngoolo kalanji lebe lou̒ aalo uilimoi̒ mongoli?” “Mopulaa duluo,” tametao̒ limongolio.

²⁰ “Wau tou̒ Wau̒ helo mita-mitango roti pitu lobotu ode tawopato lihu lota,” yilintu mao̒ li Isa poli, “ngoolo kalanji lebelio lou̒ aalo u mailimoi̒ mongoli?” “Pitu,” tametao̒ limongolio.

²¹ “Naa, debo diipo olo mongalati timongoli?” tehuda mao̒ li Isa poli.

Ti Isa lopoo̒luli taa pitoo̒ to Betsaida

²² Timongolio malei dungga mota ode Betsaida. Mota teto tau lodelo mai taa pitoo̒ ngota odeli Isa, wau lohile alihu ti Isa modedeto mato lotaa pitoo̒ boito u mopoo̒luli olio.

²³ Yi ti Isa malodihu uluu̒ lotaa pitoo̒ boito wau lodedea̒ olio ode bulemengo kota boito. Lapatao̒ ti Isa lonula loiyohu tomato lotaa pitoo̒ boito. Tio lopodutu uluu̒-Lio tomato lotaa pitoo̒ boito, tulusi lohintu mao̒ olio, “Mamowali moo̒onto yio̒ u hitua-tuawua masaatia?”

²⁴ Tau boito lomilohe mota ode talulio, tulusi loloi̒ya, “Joo, watia maloo̒onto tau hinao̒-nao̒wa; bo timongolio oontonga debo odelo batango ayu.”

²⁵ Ti Isa luli lopodutu uluu̒-Lio tomato lotau boito. Pee̒enta botie tau boito malo tolopani lomilohe wolo otu-otutuulo mao̒. Matolio loluli, wau tio maloo̒onto ngoa̒amilalo lou̒ mopatato daa̒.

²⁶ Lapatao̒ ti Isa lotahuda mao̒ olio, “Pohualingolo, wau diilalo pohualinga mota ode kota boito.”

Tei Petrus helongaku pasali li Isa

²⁷ Ti Isa wau tahidudua̒ o-Lio lonao̒ mota ode kakaa-mbunguwalo totili lo Kaisarea Pilipi. Tohuungo dalalo ti Isa lohintu olimongolio, “Modudua̒ loi̒ya lotau, tatoonu Wau̒ botie?”

²⁸ Timongolio lolametao̒, “Woluo talo loi̒ya: Tei Yahya Tamopolihua; woluo olo talo loi̒ya tei Elia, wau tawewo poli loloi̒ya: tala ngota lonabi.”

²⁹ “Bo modudua̒ olimongoli lohihilao, Wau̒ botie tatoonu?” yilintu mao̒ li Isa. Tei Petrus lolametao̒, “Ti Paaa̒ yito Olongia Tamoo-poa̒ahua!”

³⁰ Tulusi ti Isa lopoe̒elao̒ olimongolio, alihu diila mopoo̒taa penu boli olo tatoonu pasali lo batanga-Lio.

Ti Isa helo bisada pasali odudutolo wau opopate-Lio

³¹ Lapatao̒ uito ti Isa malo lumula longaajali to tahidudua̒ o-Lio deu̒ Walao̒ Manusia mamusi modutolo sikisa dadaata wau tuwalia lomongo tau̒wa, mongo iimamu tau̒wa, wau guguu-ruwaalo agama. Tio mapateelio mate-mateelo mao̒, bo too̒tolu dulahu Tio mamuli bongulo-Lio mai.

³² Wolo lopatato daa̒ ti Isa lopoo̒taa sua̒li boito ode tahidudua̒ o-Lio. Yi tei Petrus lomantanga li Isa ode ngotuwali, wau lodini o-Lio.

³³ Boti Isa loili wau lomiloheo̒ to tahidudua̒ o-Lio, tulusi longentela olei Petrus, “Pohinggi mao̒ monteea, Tamoo-heingawa ode dusa! Pikiilangimu boito pikiilangi lomanusia; diila pikiilangi lo Allahu Taa̒ala!”

³⁴ Lapatao̒ ti Isa lotiangai taa dadaata tawoluo teto pee̒-pee̒enta wolo tahidudua̒ o-Lio. Tulusi Tio lotahuda mao̒ ode limongolio, “Taa motohilaa modudua̒ ola-U̒, mamusi molipatao̒ u polohuna daa̒alio lohihilao, lapatao̒ momota salipulio, wau tulusi modudua̒ ola-U̒.

³⁵ Sababu taa umotohilaa momintengi tutumulio, mao̒olia lo tutumulio. Bo taa u mopobake tutumulio ode ola-U̒ wau ode Habari Mopiohe monto Allahu Taa̒ala mapo aahuwolio.

³⁶ Wolo pae̒daalio ode tahingota-ngotaawa, wonu ngoilanggubu dunia botie mowali milikiilio, bo tio mao̒olia lo tutumulio?

³⁷ Tingga mowali tutumulo boito tuloa̒alo wolo u hitua-tuawua?

³⁸ Wonu tahingota-ngotaawa moolito momasisi ola-U̒ wau pongaajali-U̒ tojamani diila moe̒elo to palenta wau u moleeto botie, Walao̒ Manusia olo mamoolito mongaku totau boito, tou̒ Tio demei dungga wolo kawasa li Paapa-Lio diludua̒ lo mamaa-li̒katiyalo tamantali.”