MARKUSI 3 - KITABI HABARI MOPIOHE

Taa uluu̒lio yilate ngotuwali

¹ Ti Isa luli lohualinga mota ode bele potabiaalo. Mota teto woluo ngotaalio taa uluu̒lio mailate ngotuwali.

² Mota teto woluo tahipo lolohe totala li Isa, alihu mowali moo̒ poduloheo̒ o-Lio. Oditolio timongolio tulusi hemo poo̒tuoto o-Lio wolo Tio mamo poo̒luli tau todulahu Saabati.

³ Ti Isa lotahuda mao̒ ode taa uluu̒lio yilate ngotuwali boito, “Dulo tihulai teea, totalu.”

⁴ Tulusi Tio lohintu mao̒ totau-tauwalo teto, “Modudua̒ao̒ to agama, ito mowali mohutu wolo todulahu Saabati? Mohutu umopiohu meaalo u moleeto? Mopoa̒ahu tau meaalo momate-mateelo mao̒?” Timongolio bo lotipoo̒oyo.

⁵ Wolo nahutu ti Isa lomilohe mota topali-Tio, bo Tio olo siluukali, sababu mailaba baaa̒ngi limongolio. Tulusi Tio lotahuda mao̒ ode tau boito, “Wudua mai uluu̒mu.” Tau boito lohudu mao̒ uluu̒lio, wau uluu̒lio loluli lomola.

⁶ Yi tau-tauwalo Parisi malololaa mao̒ bele potabiaalo boito, lapatao̒ hua̒a lodulohupa wolo dengolo lota tahidudua̒ olei Herodes, u momate li Isa mate-mateelo mao̒.

Taa dadaata tobiihu bulalo

⁷ Ti Isa wau tahidudua̒ o-Lio lonao̒ tilumouli mota ode Bulalo Galilea. Yi dadaata daa̒ tau lonto Galilea lonao̒ loduduo̒ li Isa. Dadaata olo talonao̒ mai lonto Yudea,

⁸ lonto Yerusalemu, lonto madala Idumea, wau lonto lipu to ambahu tiimulu lo Yordan, wau lonto tili lo kokoo-tawaalo to Tirus wau Sidon. Timongolio ngoa̒amila lonao̒ mai odeli Isa, sababu timongolio maloo̒ dungohe pasali u mapilohutu-Lio.

⁹ Tau-tauwala boito malo odito huntualio, tilinggula ti Isa lopoa̒hu mao̒ tahidudua̒ o-Lio lopo dapato bulotu pomake-Lio, sababu de Tio diila bolo poduduupea̒ lotau-tauwalo boito.

¹⁰ Odito huntualio tahe piloo̒luli-Lio, tilinggula ngoa̒amila tahi ngongota bolo hipo huhuuntula lomao̒ motolopani mohimbideo̒ o-Lio alihu moo̒ dedeta o-Lio.

¹¹ Wau tahe ilotuanga lorohu u moleeto, timii̒du moo̒onto o-Lio, tulusi wambao̒ hemo sujudu mola totalu-Lio wau hemo nguatia̒, “Yio̒olo Walao̒ Allahu Taa̒ala!”

¹² Boti Isa helodini daa̒ roroo-huwaalo u moleeto boito mopoo̒taa mao̒ tatoonu Tio.

Ti Isa lolulaoto mopulaa duulota rasulu

¹³ Lapatao̒ ti Isa lotao̒de mola ode huludu tuwau, wau lotiangao̒ tahe kilahandaki-Lio. Tau-tauwala boito lonao̒ mai,

¹⁴ tulusi Tio lolulaoto towolota limongolio mopulaa duulota. Tahuda-Lio mao̒, “Wau̒ molulaotao̒ olimongoli alihu timongoli modudua̒ ola-U̒ wau timongoli laolo-U̒ u mopololade Habari Mopiohe monto Allahu Taa̒ala,

¹⁵ wau timongoli mamoo̒tapu kawasa u mopohinggi roroo-huwaalo u moleeto.”

¹⁶ Uti-utieelo tanggulo lo tamopulaa duulota boito; Simon (tai̒lunte-Lio olo Petrus),

¹⁷ Tei Yakobus wolei Yahya wutatio, deu̒ito-yito mongo walae̒e Jebedeus (timongolio botie ilunte-Lio tanggulo Boanerges boliilio mao̒ “walao̒ bulonggodu”),

¹⁸ Tei Andreas, Piliipus, Bartolomeus, Matiusi, Tomas, Yakobus walae̒e Alpeus, Tadeus, Simon si Patriot,

¹⁹ wau Yudas Iskariot talo hiyanati li Isa.

Ti Isa wau Beeljebul

²⁰ Lapatao̒ ti Isa lohualinga ode bele. Bo ngohuntua tau debo hiponaowa mai lotia̒mbu, tilinggula ti Isa wau tahidudua̒ o-Lio diila owakutu molamelo.

²¹ Tau-tauwalo hipo loi̒yawa deu̒, “Tio mabiliyongo!” Wau tou̒ ngaalaa̒-Lio loo̒dungohe sua̒li boito, malonao̒ mota timongolio lohama o-Lio.

²² Guguu-ruwaala agama talonao̒ mai lonto Yerusalemu helo loi̒ya deu̒, “Tio mai̒lo tuanga lo Beeljebul! Tau̒wa lo roroo-huwaalo u moleeto boitolo talongohi kawasa o-Lio helo pohinggi rohu u moleeto.”

²³ Yi ti Isa lotiangai taa ngohuntua boito, wau lohungguli mao̒ olimongolio demohelu ngoolo pohumaya. “Diila pongalo aakali rohu u moleeto mopohinggi rohu u moleeto,” tahuda li Isa.

²⁴ “Wonu lipu tuwau mopoo̒ hipole-polemboa̒ wau tinggai mumuusua, lipu boito diila moo̒ tahangi.

²⁵ Wau wonu todelomo ngaalaa̒ tuwau diila aa̒akolowa wau popoo-ngawaa̒alio tinggai mumuusua, ngaalaa̒ boito mamoa̒ntulu.

²⁶ Wonu todelomo bele biluloa̒ saaha li olongia lo Ibilisi motoduo owowoluwoa lobubuu-alaawa wau polomusa, bele biluloa̒ saaha li olongia boito diila moo̒ tahangi mohiheo wau tantulo mao̒ mamooli.

²⁷ Diaaluo penu boli ngotaa mao̒ tamoo̒ tuwoto ode delomo bele lo ngotaalio tamolotolo wau molambata halataalio wonu tio diila momungupo meimulo tamolotolo boito. Lapatao̒ uito, bolo tio mowali molambato halataalio.

²⁸ Ototai mao̒! Wonu bolo tau mohutu dusa wau moloi̒ya u mohina, yi tio mowali ambunguolo.

²⁹ Bo wonu bolo tio mohina Rohullah, tio diila mowali ambunguolo! Sababu umohina boito yito dusa u ohiheo-hiheolo mao̒.” (

³⁰ Ti Isa lotahuda odito sababu woluo taa loloi̒ya deu̒ ti Isa mai̒lo tuanga lorohu u moleeto.)

Tiilo wau mongo wutati Isa

³¹ Lapatao̒ uito tiilo li Isa wau mongo wuta-Tio lonao̒ mai. Timongolio hiwimawa to bulemengio wau mota lei̒toduo mai li Isa.

³² Tou̒ boito ngohuntua tau donggo hihuloa̒a topalito li Isa. Timongolio loloi̒ya mao̒ o-Lio, “Paaa̒, tiilo li Paaa̒ wau mongo wutati Paaa̒ woluo to bulemengio. Timongolio hemo lolohe li Paaa̒.”

³³ Ti Isa lolametao̒, “Tatoonu tiila-U̒? Tatoonu mongo wutatu-U̒?”

³⁴ Lapatao̒ Tio lomilohe ode tau-tauwalo tahi huloa̒a topali-Tio tulusi lotahuda mao̒, “Tabotieelo tiila-U̒ wau mongo wutatu-U̒!

³⁵ Taa u mohutu kahandaki lo Allahu Taa̒ala tioolo wutatu-U̒ talolai̒, wutatu-U̒ taabua, wau tiila-U̒.”