MARKUSI 2 - KITABI HABARI MOPIOHE

Ti Isa lopoo̒luli ngotaalio tadidu mowali monao̒

¹ Dengolo hui mola lapatio mao̒ ti Isa luli lohualinga ode Kapernaum. Yi malo loladulo mola habari deu̒ Tio woluo tobele.

² Lapatao̒ dadaata tau lonao̒ mai. Timongolio helo tia̒mbu mola teto tunggula diilalo otambati. Tohuhebu olo huhuutoyoa̒ tau. Lapatao̒ ti Isa lopo tunggulao̒ habari lonto Allahu Taa̒ala ode limongolio.

³ Tou̒ Tio donggo hemo tahuda, tawopatota lohuluhei ngotaalio tadidu mowali monao̒ dilelolio odeli Isa.

⁴ Bo sababu tau mailaba huntualio, timongolio diila lowali lohimbideo̒ o-Lio. Oditolio, timongolio malo longgala watopo pasipasi toitaato tambati ti Isa woluo. Lapatao̒ uito, timongolio malo polaahe mola tadidu mowali monao̒ boito wolo amongio.

⁵ Tou̒ ti Isa lomiloheo̒ malo odito udaa̒ iimani limongolio, Tio lotahuda mao̒ ode tadidu mowali monao̒ boito, “Walau̒u-U̒, duduusaamu maa ilambungu.”

⁶ Dengolo lota guru lo agama tadonggo hihuloa̒a teto mahipo hihiintua todelomo hilao.

⁷ “Buheli tutu tau botie mobisala odito! Tio hemohina Allahu Taa̒ala. Tita tamowali mongambungu dusa, Tatoonu ngopohia Allahu Taa̒ala lohihilao?”

⁸ Tou̒ boito olo ilotaawa li Isa pikiilangi limongolio. Lapatao̒ Tio lotahuda mao̒, “Yilongola timongoli hipo hihiintua odito todelomo hilaa limongoli?

⁹ Toonu ulebe gambangi; molanggula, ‘Duduusaamu maa ilambungu,’ meaalo molanggula ‘Bongulo, bintaa̒lo amongumu wau ponao̒lo’?

¹⁰ Bo botia Wau̒ mamopo bukuti mai olemu deu̒ tutuulio tutu toitaato dunia botie Walao̒ Manusia okawasa mongambungu dusa.” Lapatao̒ ti Isa lotahuda mao̒ to tadidu mowali monao̒ boito,

¹¹ “Bongulo, bintaa̒lo amongumu wau pohualingolo!”

¹² Tio malobongu wau hua̒a lohama amongio lapatao̒ yilumualao̒ silakusia limongolio ngoa̒amila. Tau-tauwala boito hilinggolabe tulusi lomuji mola Allahu Taa̒ala. Uali mongolio, “Diipo pee̒enta mao̒ ito heloo̒onto ulotoduo mai debo odelo utie!”

Ti Isa lotianga olei Lewi

¹³ Ti Isa luli lohualinga mota ode Pentadu lo Bulalo Galilea. Ngohuntua tau lonao̒ mai ode o-Lio, wau Tio helo ngaajali olimongolio.

¹⁴ Tou̒ ti Isa donggo ntale-ntalenga teto, iloontonga-Lio ngotaalio tamootagia beya tanggulio Lewi, walae̒e Alpeus, donggo hulo-huloa̒a tokantoli lobeya. “Dudui̒ mai Wau̒,” tahuda mao̒ li Isa olio. Yi tei Lewi maa tilimihulo wau loduduo̒ li Isa.

¹⁵ Tou̒ ti Isa donggo hemo lamela tobele lei Lewi, ngohuntua tamootagia beya lonao̒ mai, wau tau-tauwalo tahe anggapuolo diila mopiohu lotuango lipu lolamela pee̒-pee̒enta woli Isa wau tahidudua̒ o-Lio. Sababu ngohuntua towolota limongolio lodudua̒i li Isa.

¹⁶ Dengolo lota guru lo agama kaumu lo Parisi loo̒onto mao̒ li Isa hemo lamela pee̒-pee̒enta wolo tahi potagia beya wau tahe anggapuolo diila mopiohu boito. Oditolio timongolio lohintu mao̒ to tahidudua̒ li Isa, “Yilongola gurumu helo lamela wolo tahi potagia beya wau tau-tauwalo tadiila hipiiohe boito?”

¹⁷ Ti Isa loo̒dungohe yiyintu limongolio boito, tulusi lolametao̒, “Taa seehati diila momalalu dokuteli; bo taa u mongongoto. Wau̒ dungga-dungga mai diila mai motianga totaa hipo nganggapua batangalio malo piohu, bo tahe anggapuolo hina.”

Sua̒li lou̒ mopuasa

¹⁸ Towakutu tuwau tahidudua̒ olei Yahya Tamopolihua wau tau-tauwalo Parisi donggo hipuasawa. Lapatao̒ woluo tau lonao̒ mai odeli Isa wau malohintu, “Yilongola tahidudua̒ olei Yahya Tamopolihua wau tahidudua̒ totaulo Parisi hemo puasa, hiambola tahidudua̒ li Paaa̒ diila?”

¹⁹ Ti Isa lolametao̒, “To potihunggu lonika, wolo tahe tiloduo diila molamelo? Wonu bulentiti lai̒ donggo pee̒-pee̒enta woli mongolio, maatantu timongolio molamelo.

²⁰ Bo mamei dungga mai wakutuulio bulentiti lai̒ boito hamaalo monto olimongolio. Tou̒ boito deu̒ito timongolio diila molamelo.

²¹ Diaaluo taa u momambola boo̒ deedelo wolo kaingi ngopita u bohu. Sababu kaingi pomambola boito mamowali umonggolongo wau mongedenga boo̒ boito, tunggula moo̒sababu kedengio lebe udaa̒ mao̒.

²² Odito olo diaaluo taa u moluango angguru bohu todelomo bututu lowalito u madeedelo. Sababu angguru bohu boito mamoo̒ sababu bututu boito mobutao̒. Pulitio mao̒ duuduluolo mohua̒yadu. Angguru u bohu mamusi tuangolo ode delomo bututu lowalito u bohu olo.”

Yiyintu tomimbihu dulahu Saabati

²³ Todulahu Saabati tuwau tou̒ ti Isa yilumaodeo̒ to halabolu lopale ngopita tahidudua̒ o-Lio malolipu pale.

²⁴ Lapatao̒ tau-tauwalo Parisi malo loi̒ya odeli Isa, “Yilongola tahidudua̒ ole-Mu diila modudua̒ butoo̒ lo agamanto wau hipohutua u dinidini todulahu Saabati?”

^25-26 Ti Isa lolametao̒, “Diipo pee̒enta timongoli lopobaca u pilohutu lei Dauda, tou̒ tei Abyatar donggo hemo kalaja lowali iimamu daa̒. Tou̒ tei Dauda wau wolo taulio mapilolango, wau diila o ua̒alo, tio tilumuwoto ode Bele lo Eeya, wau lolamela roti u mapilo dewolio ode Allahu Taa̒ala. Wau roti boito yilohilio olo ode taulio. Lebe-lebe pomao̒ modudua̒ agamanto, bo wambao̒ mongo iimamu tamowali molamelo roti boito.”

²⁷ Lapatao̒ ti Isa luli lotahuda mao̒, “Dulahu Saabati pilohutu duo̒lo manusia; diila manusia duo̒lo dulahu Saabati.

²⁸ Oditolio, Walao̒ Manusia okawasa, tumbao̒ todulahu Saabati.”