ILOOWALI 49 - KITABI HABARI MOPIOHE

Loi̒ya lei Yako u pulitio

¹ Lapatao̒ tei Yako malo tiangai mongo walai̒o wau loloi̒ya mao̒, “Potia̒mbulo mai tewe, totiliu̒. Mapoleleu̒ mai olemu wolo u mao̒lasaawa limongoli todulahee momooli;

² Potia̒mbulo mao̒, wuu mongo walae̒e Yako, dungohilo mai Isirai̒lu, ti paapamu,

³ Ruben, walau̒uu̒ tamomohula daa̒, yioo̒lo olootoluu̒, hungo bohulo olootolo wau obuheliu̒. Yio̒ laba-labaalo gaaga wau laba-labalo molotolo towolota lo ngoa̒amila walau̒uu̒.

⁴ Yio̒ gambangi mobaleyango debo odelo taluhu, tilinggula diila talaba-labaalo mopiohu; sababu yio̒ helo tuluhee wolo pipiyau̒, tilambiiu̒mu tambati lo pootuluhe li paapaamu.

⁵ Tei Simeon wolei Lewi mohutato; tingolo limongolio pakaakasi lo opopalangi.

⁶ Wau̒ diila tamo dudua̒ todelomo woomboa limongolio, wau olo diila todelomo oa̒ambua limongolio. Sababu timongolio helomate yila-yilateelo mao̒ todelomo oyiyingo, helo powoohu bintengi domi oosanangi.

⁷ Laa̒-laa̒natilo mola oyiyingo limongolio, sababu moo̒tihela hapato. Laa̒-laa̒anatilo mola oyiyingo daa̒ limongolio, sababu diila omanusia. Wau̒ mamopo bubuua̒yawa olimongolio to ngoilanggubu Isirai̒lu. Wau̒ mamopo pulepe olimongolio towolota lo ngoilanggubu bangusa.

⁸ Yehuda, yio̒ mamo dangapo longungu lo musumu; mongo wutatumu mamomuji olemu wau mosujudu totalumu.

⁹ Tei Yehuda debo odelo singa buboto; tio momate mateelo mao̒ mangusaalio, lapatao̒ muli mohualinga ode beelealio; tio mopotoi̒toi̒ tulusi motibalata, wau diaaluo penu ngotaa mao̒ tabuheeli momuyu olio.

¹⁰ Tei Yehuda mamodihu tunggudu lo bele biluloa̒ saaha li olongia, waliilio mola mamomalenta ohiheo-hiheolo mao̒. Babaa-ngusawalo mamodelo mai doi uwajibu pomayali odeli olongia, wau mosujudu wolo taa̒luku totalulio.

¹¹ Walao̒ kolodailio tilihutio tobungo lo angguru, bungo lo angguru u mopiohe daa̒. Tio mongulo pakeyangilio wolo angguru, angguru debo odelo welamo duhu

¹² Meela matolio sababu minumani lo angguru, moputio̒ dungitio sababu minumani susu.

¹³ Tei Jebulon mamo tipoo̒yo totili lodeheto; kakaa-paliyaalo mamo tirabua to pentadio; demola Sidon enggade lo madalio.

¹⁴ Tei Isakhar boito debo odelo kolodai molotolo uluu̒-luu̒to towolota lokalanji dudetohio.

¹⁵ Iloontongalio mao̒ malo odito piohio tambati boito wau malo odito g agalio lipu boito, yi malo tiwoonggo lomola tio iloheela lohilao dutoheelo, wau pilakusa mokalaja odelo wato.

¹⁶ Yio̒ Dan, mamomutoo̒ bangusamu, yio̒ mowali suku debo odelo suku uwewo to Isirai̒lu.

¹⁷ Yio̒ debo odelo tulidu tobiihu dalalo, tulidu obisa tobiihu lo hulupilo, u molopango tinggodu wadala tunggula motemba jokilio.

¹⁸ Yaa Eeya, oa̒ahu uwohi mai lo Eeya, boi-boitolo u hewimaa lo watotia.

¹⁹ Gad, yio̒ maluhuo lo pohehu bo yio̒ mamuli molambata olimongolio.

²⁰ Asyer, ua̒alomu laba-labaalo daata wau ngoa̒amilalo dadaata, yio̒ mamopo dapato mao̒ ua̒alo duo̒lo mongo olongia.

²¹ Tei Naptali, debo odelo buu̒lu moo̒ohuli malo odito gaaga mongo walai̒o.

²² Tei Yusu debo odelo kolodai bubuto, kolodai molinggelo totili butu lotaluhu, tetea̒ao̒-tetea̒ao̒ tobinggi lohui̒du.

²³ Musu moluhu wolo laba-labaalo mohenelo olio wolo buutio̒ wau pana.

²⁴ Bo tei Yusu debo motoheeto polotodu uluu̒lio, debo motoheeto panalio, sababu kawasa lo Sangi Diiti Laba-labaalo molotolo, Allahu Taa̒ala lei Yako, Tamoduo̒lawa Isirai̒lu.

²⁵ Allahu Taa̒ala lipaapamu motulungi mai olemu; Taa Laba-labaalo kawasa mobalakati mai olemu wolo didi monto hulungo wau taluhu monto walungo huta. Wolo walao̒ wau sapi,

²⁶ pale wau bunga. Balakati lo Allahu Taa̒ala lipaapamu mongilabotao̒ okokaya lo huhuu-iduwaalo u panggola daa̒. Hinta motuhutolo mai ngoa̒amila balakati boito odeitaato lunggongee Yusu, odeitaato tau̒lio. Tio-tiolo tapolu-polutuo̒ towolota lomongo wutatio.

²⁷ Tei Benyamin yito saligala mongantau. Tou̒ dumodupo tio modangapo mangusaalio. Tou̒ hui tio molaya-layadeo̒.”

²⁸ Ui-uitolo opulaa dulo suku lo Isirai̒lu, wau tataa-heyaalo uiloi̒ya lipaapa limongolio tou̒ longohi mao̒ salamu mobua̒ala olimongolio ngota-ngota.

Tei Yako yilate wau yilobungio

^29-30 Lapatao̒ tei Yako lolahuli mao̒ tomongo walai̒o, “Ngopee̒epo mola wau̒ maamate debo odelo loluuhuruu̒. De lobunga mao̒ wau̒ totili limongolio todelomo gowa to Makhpela, to ambahu tiimuru lo Mamre tohuta lo Kanaa̒n. Matilali lei Abraham gowa wau halabolu totiliilio lonto olei Epron taulo Het u pilohutulio mao̒ tambati polobungalo.

³¹ Mota teto yilobungio tei Abraham wau ti Sara, tei Isihaka wau ti Ribka; wau mota teto olo wau̒ lolobungaao̒ oli Lea.

³² Halabolu wau gowa uwoluo mota teto matilali lonto taulo Het. Lobungaalo wau̒ mota teto.”

³³ Lapatao̒ tei Yako helo lahuli mao̒ tomongo walai̒o, malo tibalato tio tulusi yilate.